1-2. Waigu rengbe gu kpiapai nga ga gu mokedi nangia Pauro ka undo abaakumba areme?

 GU MOKEDI nangia Pauro aima kpinyemu awirinako. Ko aamanga nyanyaki asadatise tipa kaa ngerafuo yo. (Amo. 20:31) Si du nga ndu gupai awirinako akpinyemuko ti ni ni bakerehe gbe. Ti kura regbo sa, ho agu abaakumba naadu Efesa yo aini gupai ni nga i abingo Pauro berewe te, “i ki nikpari akpara ni aume gbe.” (Amo. 20:37) Wakina gure a, gu gaani abaakumba namangasunge nyanyaki gbe ima kpinyemu awirinayo ni bakerehe na i namanga ai gupai rengbe yo ka mangaha tipa kaa undo yo. (Frp. 2:16, 17) Ono ti kura aregbo, abaakumba nagbiatiyo agbia na akpakarapai. Ginipai rengbe ka undo yo i dibe agu akpakarapai re?

² Gaani abaakumba namangasunge nyanyaki ima rengba ka wisigo gu kpiapai nangia ga Pauro. (1 Kor. 11:1) Ko aadunga na gu tandu mangaapai nga gu du ti amaraika te. Pauro angia kpakpa boro nanaasota asota ti kura aregbo tipa ka manga gupai du ni ruruhe. (Rom. 7:18-20) Na ko adu na badungu akpakarapai tiko. Ono Pauro aambunga mangasunge nyanyaki tipa awirinako watadu kadu na gberãrago tipa mangaha wo te. Ho abaakumba awirika Pauro ni, i ima rengba kaa ndu kindi kumbatayo kaa iriso Yekova na ngbarago zavura ho i agbiatiyo ni na akpakarapai. Ani nika sakapai awere tipa wai rengbe yo ka mangaha.

3. Gini apai ani nika sakapai tipaha rogo gi kekeapai re, na gini kuraapai ani nika wirikaha?

³ Rogo gi kekeapai re, ani nika sakapai tipa apai biama nga gu naima rengba kadu ni kpakarakpakaraha fu abaakumba i mangihe: (1) du na regbo rengbe arengba tipa sunge tungusapai na tipa kura asunge, (2) gbia regbo tipa ka ngarasa awirina (3) diabe agu arungbura nga ga borose, na (4) mangasunge na kpakpa aboro. Ani nika sakapai tipa wai Pauro adibe agu akpakarapai re ni basasa  na wai rengbe abaakumba ka wirika gako kpiapai.

4. Tipagine si ni du ti ni ti kura aregbo ni kpakarakpakaraha fu abaakumba i moi wene kpiapai rogo sunge tungusapai?

⁴ Ndu gupai si narengbe kadu ti ni ni kpakarakpakaraha. Dungu asunge du be abaakumba kupati gu nga ngbembatayo rogo sunge tungusapai. Ni kpiapai, agu akurayo nidu dedede ni abasungu-rii kiti ti regbo gu dunguratise nga ga bebere poso watadu i naamanga Gu Wisigo Ziazia Kekeapai Nga ga Dungurati. I ima rengba a kaa manga kura agumbapai. I namanga kura dungu apai amanga a tipa kaa raba amoundo abaakumba na kini ndu kindi kumbatayo kaa ngarasa awirina. (1 Pet. 5:2) Gu kura abaakumba namangasunge meka aBambu Kindo na kini bandaha gbiati kura mekemeke arago nga ga siokrasia. Wa vura duhe wo, wakina gu kura abatungusipai dunduko rogo dungurati, gu nyanyakipa sunge kisusi abaakumba amangaha nga sunge tungusa wene pangbanga.​—Mt. 28:19, 20.

5. Gini kpiapai Pauro amoihe wa ko angia batungusipai?

⁵ Gupai rengbe abaakumba ka wirikaha be Pauro. Rogo AFiripoio 1:10, Pauro ape ndu gupai furani ko adu ti ni ni gu batungusipai naadu na diabese, ko aya: “Oni ka ida pa agu apai ti ni nangba” watadu ka rugatironi na pa agu apai du na nyanyakipaha. Pauro aima mangapai kuti gu gako rugute re. I aima fu sunge tungusapai fuko, na tipa dungu bawe agarã, sunge tungusapai nangia nyanyakipa pai rogo gako raka yo. Ko anaatungusapai “gbayaga, nitangara bambu a.” (Amo. 20:20) Ko anaatungusanga pai kina ti kura regbo rogo uru yo watadu uru sa vuru poso yo te. Ko anaatungusapai rogo ai gu ba na ti ai gu regbo ko anidu na rengba ka tungusapai! Ni kpiapai, ho ko aasungudo gako abadiasunge ni Atenai yo, ko atungusipai fu nyanyakipa aboro, na agu akurayo amangipai wenengai kuti ni. (Amo. 17:16, 17, 34) Na zavura ho Pauro adu ni ni ziziko rogo “azogbo,” ko atungusipai fu agu aboro naadu patiko.​—Frp. 1:13, 14; Amo. 28:16-24.

6. Pauro araba kura aboro i mangi wai?

⁶ Pauro amangisunge na gako regbo ngba wene gene gbe. Ko anaayamba gu kura aboro dedede i naandu na ko kaa tungusapai. Ni kpiapai, ti gu bambata regbo ko andu tua nga ga amokedi, ko adi Yoane Marako, na ti gu uehe, ko ki di Timoteo. (Amo. 12:25; 16:1-4) Zanga kapa, Pauro aima manga nyanyaki asadatise wa omeko arengbe na ni tipa ka yugopai fu agi akumba re tipa wai ka mbakada apai rogo dungurati, wai kaa ngarasa awirina, na wai kadu ni wene abayugupai.​—1 Kor. 4:17.

7. Waigu rengbe abaakumba ka manga gupai Pauro agumbaha rogo AEfeso 6:14, 15?

⁷ Gu pai rengbe ani ka wirikaha. Abaakumba  ima rengba ka wirika Pauro, angianga ni tungusa yo pai sa kina kporo na kporo ya ono ni du yo regerege a ka tungusapai rogo ai gu ba na ti ai gu regbo rengbe yo ka tungusapai ti ni. (Oni gedi AEfeso 6:14, 15.) Ni kpiapai, i ima rengba ka manga dezirepai ho i andu ni ka ngbeahe watadu ba gayo asunge yo. Watadu ho i amanga agu asunge mekaarago ni nga ga siokrasia, i ima rengba ka tungusa wene pangbanga fu gayo amurakporo na fu agu aboro nabagaahe fuyo. Wakina Pauro, abaakumba ima rengba ka mangasunge na gu regbo i adia ha gene tungusapai yo tipa ka raba aboro, kodihe na amoundo abaakumba.

8. Ginipai si narengbe ka ida bakumba mangihe ti kura aregbo?

⁸ Abaakumba ima rengba kadu na badungu asunge beyo i amangaha rogo dungurati watadu rogo badona adungurati si ki sa gupai nga ka regbo du nga beyo tipa sunge tungusapai ya. Ti kura aregbo, si naida aida i ká kura dungu asunge tipa wa ka i du na rengba ka manga agu apai dunduko i aida ka mangaha. Fuo manga yo kparakpee na ki berẽkurii he, i ima rengba ka bi gupai nga ka i idi gu sunge re, i adunga na rengba ka manga kura nyanyakipa apai te. Gu nyanyakipa apai re nakoda manga gu irisombori nga ga aborokporo na aposo dũ, mangasunge tungusapai kakaka, watadu raba awiriyo tipa tungusapai. Gu kura aboro nabihe ni kpakarapai tipa ka ká kura asunge, ono i ima rengba kadu na gu kido nga Yekova ima rugatiko na pa gu nyemupai du yo na ni tipa ka manga agu asunge dunduko i afuhe fuyo.

9. Ginipai rengbe kadu ni kpakarakpakaraha fu abaakumba mbiko i na dungu apai tiyo i amangaha?

⁹ Ndu gupai si narengbe kadu ti ni ni kpakarakpakaraha. Ga Yekova aboro nagbiatiyo na dungu akpakarapai. Ti gi yangara arame re, ani dunduko naida na ngarasaro, undo, gbiati wasa. Na ti kura aregbo, kura aboro naida na undo tipa ka ne gbegberẽ mangaapai. (1 Tesa. 5:14) Rengo ngaha nga, ka abaakumba dinga agu akpakarapai dunduko kusayo ga Yekova aboro agbiatiyo na ni te. Ono wa vura duhe wo, Yekova naida gupai nga abaakumba mangi ai gupai rengbe yo ka mangaha tipa ka ngarasa gako aboro na ka banda yo. Waigu rengbe agu abaakumba du na dungu asunge tiyo ka fu gu undo fu awirina si aidaha?

10. Ringbisihe kuti 1 ATesaroniko 2:7, waigu Pauro angerefuo ga Yekova aboro?

¹⁰ Gupai rengbe abaakumba ka wirikaha be Pauro. Pauro anidu ti aregbo dunduko regerege na nyemu ka fu tambuahe fu kura aboro na kini ngarasi yo. Si ni wenepai fu abaakumba ka wirika gako kpiapai na kini yugo nyemuse na wenesino fu awirinayo. (Oni gedi 1 ATesaroniko 2:7.) Pauro agumba gupai fu awirinako nga ko ima kpinyemuyo na Yekova ima kpinyemu yo a. (2 Kor. 2:4; Ef. 2:4, 5) Pauro anaamangapai na agu aboro naadu rogo dungurati wa abakureako, na ko kini di regbo na yo. Ko ayugu gupai fuyo nga ko ima du na kido kutiyo ni gumba ko pa gako agunde na arungbura fuyo gbaiga. (2 Kor. 7:5; 1 Tim. 1:15) Ono tie, Pauro aamaanga  berãko kina tipa gako akpakarapai te. Kuba kure, ko aaida ka undo awirinako.

11. Tipagine Pauro afu rugute ti ni fu awirinako?

¹¹ Ti kura aregbo, si anaaida aida Pauro fu rugute fu awirinako. Ono ko anaamangangaha wo mbiko gupai nga ko anidu na zinga te. Ko anaafu rugute fuyo mbiko ko anaaberãpa yo aberã na ko aaida ka banda yo be dungu kereapai. Ko anaˈasada ka sa gako rugute si du taata aboro rugutiyo na ni, na ko aida i dihe kugume. Ni kpiapai, Pauro afu nyanyaki rugute fu aKorindo rogo gu waraga yo ko akehe fuyo. Fuo ke ko gu waraga re, ko akedi Tito koyo du yo ni. Pauro aabakabangiriko abaka tipa wai i nika mangapai kuti gu waraga re. Ko adu na bakere ngbarago ka ino gupai nga i aima dia gako rugute kugume na ki mangipai kutini!​—2 Kor. 7:6, 7.

12. Waigu rengbe abaakumba ka ngarasa akurayo airisimbori?

¹² Gu pai rengbe ani ka wirikaha. Abaakumba rengbe ka pekafuo ga Pauro kpiapai ni dia yo regbo na akurayo airisimbori. Gene sa rengbe yo ka manga gipai re ngbaha nga ni da yo ba adunguratise yo mbu regbo kindi koyo tipa wa ka i fura na aboro na ki ngarasi yo. Dedede, si naadia kina bete aminiti gbua tipa ka fu gu ngarasaro nga ga nyemuse awirina aidaha. (Rom. 1:12; Ef. 5:16) Gu bakumba napekafuo ga Pauro kpiapai nika mangasunge na Fugo Mbori tipa ka nyakasa gu idapase nga ga awirinani na ki kido yo na pa ga Mbori nyemuse tipa yo. Kurigure, ko nasayo asa i ini gupai nga ko ima kpinyemu yo. Ko nafura na yo dedede na kini ngere tipa agu apai rengbe ko ka fu tambuahe ti ni fuyo. Ho si aida bakumba fu rugute ni, ni namaamburu he rii Fugo Mbori. Ni nagumba kina boro gupai duho, ono ni nayugo nunga ayugo mbiko ni naida aida wirinani mangipai kuti gani rugute.​—Gara. 6:1.

13. Gini maapai rengbe agu arungbura nga ga borose kadu na ni kurii bakumba?

¹³ Ndu gupai si narengbe kadu ti ni ni kpakarakpakaraha. Rengberengbe aboro nga abaakumba te. Wakina kura aboro, i namanga aingahe amanga. (Rom. 3:23) Si ima rengba kadu ni kpakarakpakaraha fuyo i du na ruru bipai tipa gayo arungbura. Agu akurayo ima rengba kaa bakabangiriyo tipa gayo arungbura ni bakerehe gbe si ki sa gupai nga i du na gberãrago. Agu akurayo ima rengba ka berã gupai nga pa gayo arungbura anyakanga te na si aidanga i mangi ai ariapai te.

14. Ringbisihe kuti AFiripoio 4:13, waigu ga Pauro umbasitise aundo ko ko dibe gako arungbura?

¹⁴ Gupai rengbe abaakumba ka wirikaha be Pauro. Mbiko gupai nga Pauro adu na umbasitise, ko aima rugatiko na gupai nga ko arengbanga ka diabe gako arungbura nitiko te. Ko aaida na gu ome nga gu Mbori narengbe ka fuhe. Mbata kusayo, Pauro anaarungosi aKristano  nyanyaki gbe. Ono kusa, ko aima ye ka rugatiko na gupai nga, gupai ko amangihe angia gbegberẽpai na ko kidu na nyemu ka aria gako bipai na asino. (1 Tim. 1:12-16) Mbiko ga Yekova undo, Pauro adu ni gu bakumba naadu na nyemuse, nunga, gbiati umbasitise. Ko aima ino gupai nga ko aima du na dungu azangarengba; ono ko aanyenga kindi kaa berã kina kuriihe te. Kuba gure, ko adu na gu kido nga Yekova nika mbupai ambu fuko. (Rom. 7:21-25) Ko aabingo ho nga si naida ko du ni rengberengbe boro te. Kuba gure, ko amangi nyanyaki asadatise tipa ka manga aariapai ti gako asino nga ga aKristano na ko akido ni umbasitise kuti ga Yekova undo tipa ka digiso gako sunge.​—1 Kor. 9:27; oni gedi AFiripoio 4:13.

15. Gini ruru bipai si aida abaakumba du na ni tipa gayo arungbura?

¹⁵ Gu pai rengbe ani ka wirikaha. I amaanga abaakumba mbiko gupai nga i nga rengberengbe aboro te. Ono tie, Yekova naida gupai beyo nga i idipa gayo aingahe na kini mangi aariapai ti gayo asino nga ga aKristano. (Ef. 4:23, 24) Si naida bakumba mangisunge na Baibiri tipa si undo ni ni bi wari si aida ni mangi ariapai ni na ni ki mangi agu aariapai si aidaha. Fuo gure, Yekova nika undo ni ni du na ngbarago na kidu niwene bakumba.​—Yak. 1:25.

16. Ginipai rengbe ka manga ka si du nga bakumba namaa berã ni kina kuti gu zangarengba nga ga kura aboro?

¹⁶ Ndu gupai si narengbe kadu ti ni ni kpakarakpakaraha. Ho abaakumba adia bakere regbo ni na awirinayo rogo dungurati, i ima rengba ka bi agu azangarengba nga gayo niipo. Ka abaakumba aadunga na rubangirise ya, i ima rengba kadu na zinga, gbegberẽ sino, watadu kaa sapangbanga awirinayo. Pauro aima fu zahe fu aKristano nga Satana naida gupai nga i mangi gupai re.​—2 Kor. 2:10, 11.

17. Waigu Pauro anaabi awirinako?

¹⁷ Gupai rengbe abaakumba ka wirikaha be Pauro. Ko anidu ti aregbo dunduko na wene bipai tipa awirinako. Ko aima ino gupai nga i namanga aingahe amanga, mbiko gayo mangaapai anaaimisa ko aimisa. Wa si avura duwo, Pauro aima ino gu kparakparapai naadu dagba gbegberẽ mangaapai na gbegberẽ aboro. Ko aima kpinyemu awirinako na ko anaamaaberãko tipa gayo wene asino. Ka si du nga si anidu ni kpakarakpakaraha fu awirinako tipa ka manga gupai du ni ruruhe, ko anaasia kaa berãkurii gupai nga i naida aida ka manga rurupai ono i naida na undo.

18. Ginipai oni awirikaha nibi gupai naadu dagba Euodia na Sunduke? (AFiripoio 4:1-3)

¹⁸ Ni kpiapai oni bingo wai Pauro aundo awirina ue rogo gu dungurati naadu Firipoi yo. (Oni gedi AFiripoio 4:1-3.) Si nangera wa aEuodia na Sunduke adu na zangagiatise dagbayo na i aadunga berewe ni abakure te. Pauro aasapanga ngbanga yo te; ko amoiberãko kuti gayo wene asino. Gi ruru awirina re aima iriso Yekova tipa gbanga regbo. Pauro aima ino gupai nga Yekova ima kpinyemu yo. Gu wene bipai Pauro adu na ni tipa agi awirina re asako ko ngarasi yo tipa i mbakadi gayo azanga giatise. Mbiko gupai  nga Pauro amaaberã ko kuti gu wene asino nga ga kura aboro, ko adu na rengba ka banda gako ngbarago na ki banda nyanyaki pabakure na agu aboro naadu rogo dungurati.

19. (a) Waigu rengbe abaakumba ka banda wene bipai tipa akurayo airisimbori? (b) Ginipai rengbe mo ka wirikaha ti gu sura nga ga bakumba ko nigirisi Bambu Kindo?

¹⁹ Gu pai rengbe ani ka wirikaha. Abaakumba, oni ngere tipa gu wene asino awirinaroni ayugoho. Aboro ni basasa dunduko nga aboro zangarengba; ono ai boro na kina asino ti ni rengbe ka ngba tirani. (Frp. 2:3) Si ni rengo nga, ti kura aregbo, si ima rengba ka ida abaakumba fu rugute fu wirina. Ono wakina Pauro, si naida abaakumba mangi nyanyaki asadatise ka zanga maaberã yo kina kuti agu afugo na mangaapai nga ga boro nga gu naimisa ngbadu boro. Kuba gure, si naida i moiberã yo kuti gu nyemuse du gu boro re na ni tipa Yekova, gani hipai tingba iriso Mbori, na gu nyemupai du tini ka manga gupai du ni wenehe. Agu abaakumba namaaberã yo kuti gu wene asino nga ga kura aboro naundo awirinayo i bihe nga aboro dunduko rogo dungurati ima kpinyemu yo.

20. Waigu rengbe abaakumba kaa ndu kindi kumbatayo kaa gbia undo ti ga Pauro kpiapai?

²⁰ Abaakumba, oni nika bihe nipa undo ka oni aandu kindi kumbatayo kaa wisigo gu kpiapai nga ga Pauro. Ni kpiapai, rogo Watch Tower Publications Index, mo ima rengba ka ngera tii gu riipai nga “Paul” na mo ki ngere tii gu umba riipai nga “example for elders.” Wa mo nikaa geda bete agu apai i natangaraha yo, mo sana tiro nga, ‘Waigu rengbe ga Pauro kpiapai ka undo re mi banda gimi ngbarago wa mi nikaa manga gimi sunge ni bakumba?’

21. Ginipai rengbe abaakumba kadu na kido tipaha?

²¹ Abaakumba, oni tingidi gupai nga Yekova asananga roni oni du ni rengberengbe roni te; ko nasanaroni oni du niruru roni. (1 Kor. 4:2) Yekova aima du na tambuahe tipa gu nyanyaki sunge Pauro amangihe gbiati gako padu ni ruruse. Oni ima rengba kadu na gu kido a nga Mbori nabi agu apai oni amangaha tingba gako sunge na nyanyakipaha. Bangiri Yekova “ago nga ti gaoni sunge te, na ti gu nyemuse oni ayugu ti rimoko, na ti gu pai oni amangi fu gako aboro” te.​—Eb. 6:10.