Ibadị awe dị aạl ilọ oghaạph phọ ophọn phọ ropuru ghan ni ḍipuru phọ aḍiphẹ phọ. Kuolọ siẹn asiikpịgh phọ iphẹn phọ iyạl awe kụ umheera ghan Mephibosheth, kụ yira kotuughạ ni iyaạr esi ooḅeghiọn ipẹ ekạr bọ emite.

Uw-emhạ phọ Izrạl Sọl amhoọgh oḍual anmụny r’iyạl anmanyaạn. AJonathan kụ oḅẹl. ASọl aḅilhẹ ni amhoọgh oọny dị oghol mọ Mephibosheth, dị oyugạ odị dị oghol mọ Rizpah amharanhaạn nyodị. AJonathan kẹn amhoọgh aani ni oọny dị oghol mọ Mephibosheth. Esi iduọn phọ, oọny Uw-emhạ phọ Sọl r’oọny oọny odị kụ umheera ghan bọ ḍien phọ Mephibosheth.

Eniin amem Uw-emhạ phọ Sọl anyạ ni azuom we phọ aGibeon orugh bọ r’awe phọ Izrạl, kụ awạ ozẹ oomo abidị. Dị iikia i/lo iphẹn phọ ikọm ni ḍuugh ibadị abidị. Iphẹn phọ eeph ni iboom. Eeghe kụ iḍighi? Loor esi dị siḍio phọ aJoshua, aruw-emhụ arughunhughun phọ Izrạl ughiran ni iyọ eephọ r’awe phọ Gibeon.—Josh. 9:3-27.

Kuolọ dị egbạgh r’iyọ eephọ phọ, Uw-emhạ phọ Sọl anyạ ni ozẹ oomo awe phọ aGibeon. Iphẹn phọ ikọm ni idị ‘aSọl r’eghunotu phọ odị okọ enu.’ (2 Sam. 21:1) Mem mọ aDevid aḍighi bọ uw-emhạ phọ, abuọ aGibeon dị okpetenhaan ughị ni oteẹny Devid ilọ ikarạph phọ aSọl aḍighi bọ bidị. ADevid apuru ni iyaạr dị kongọ bidị okpiọm ikarạph phọ aSọl iphẹn phọ, pidị aZihova asẹph de phọ. Kparipẹ dị bidị kopuru ikpoki, awe phọ aGibeon uḅẹm ghụn mọ ongọ bidị oḍual phọ anmụny phọ aSọl phọ “awạ bọ oogulemhi” abidị, pidị osin. (Num. 35:30, 31) ADevid amheeraam ni oḍighi ipẹ bidị oghaạph bọ.—2 Sam. 21:2-6.

Mem mọ amuphẹ phọ aSọl r’aJonathan momhugh eghạm, kuolọ oọny phọ aJonathan Mephibosheth o/mhugh aani. Odị o/rue ghan orelhe loor ekperenhom iiḅaghamhị dị emitenhaan nyodị k’eghoroghọr, kụ odị o/ḍighan aani ogbogh odẹ phọ odị ozuoghom awe phọ aGibeon. ADevid aghiran iyọ r’aJonathan, dị kengoọm suọ eemharạ eemharạ phọ aJonathan, dị eḅarạm oọny phọ odị Mephibosheth. (1 Sam. 18:1; 20:42) ABaibul phọ aḅẹm mọ: “Uw-emhạ phọ [Devid] aḍeenhaan ni igbiririph Mephibosheth oọny phọ aJonathan oọny oko phọ aSọl, loor esi iyọ phọ bidị oghiran bọ ghisigh aZihova.”—2 Sam. 21:7.

Kuolọ aDevid aḍighi ni angọ ilọm awe aGibeon phọ. Odị aḅọgh ni angọ bidị iyạl anmụny aSọl, oniin ughol mọ Mephibosheth r’oogh anmụny anmụny aSọl. (2 Sam. 21:8, 9) Ipẹ aDevid aḍighi bọ ikọm ni idị aZihova asẹph de phọ.

Iphẹn phọ koo/pho iphirigba bịn. Olhogh phọ Enhaạn aagholaan ni. Eḅẹm mọ: “K/etuạn ikarạph aburudẹ ezẹ nmụny.” (Deut. 24:16) AZihova mu/meera mọ ozẹ iyạl phọ anmuy phọ aSọl r’oogh anmụny anmụny phọ odị eru maạr lọ aḍighaạgh abidị i/ḍighom aani. Kụ olhogh phọ aḅẹm kẹn ni mọ: “Torobọ oye katelhian ghan r’ikarạph odị.” Oḍual anmuny phọ aSọl ozẹ bọ uḍighan aani ni oḅian odẹ phọ abidị oḅeer awe phọ aGibeon. Eekunha phọ, oḍual phọ abidị urelhan ni ikarạph phọ abidị.

Iphẹn phọ itughemhị iyira mọ oye dị arelhe ḍikarạph adom kapinhom aani ni bin iikpiạ ikarạph phọ ipẹ phọ. Aḍiniin aḍidogh eḅẹm mọ: “Maạr agbiighi ilọ nạ raḍighi, bịn oomo ilọ nạ aḍighi kenighẹ ni.”—Prov. 4:24-27; Efẹ. 5:15.