Jo mogo ma gukwano lok meno oyotoyot gupennye ki lapeny man. Ento i tyeng magi, tye co aryo mapatpat ma gin ducu nyinggi Mepibocet, dok watwero pwonyo gin mo ki i kwano gin mutimme man.

Kabaka Caulo me Icrael onongo tye ki lutino awobe abiro ki anyira aryo. Latin kayo pa Caulo onongo obedo Yonacan. Lacen dako angeca pa Kabaka Caulo ma nyinge Rijpa onywalo ki Caulo latin awobi ma nyinge Mepibocet. Ki tungcel, Yonacan bene onongo tye ki wode ma nyinge Mepibocet. Dong, Kabaka Caulo onongo tye ki wode ma nyinge Mepibocet ki lakware acel ma tye ki nying meno bene.

I kare mo, Kabaka Caulo ocako kwero jo Gibeon ma gibedo i kin Luicrael dok otemme me neko gin ducu. Nen calo, en oneko jo Gibeon mapol. Timme meno obedo bal. Pingo? Pien yam con i kare pa Yocwa, lutel wi lwak me Icrael onongo gumoko gicikke me kuc ki jo Gibeon.—Yoc. 9:3-27.

Gicikke meno onongo pud tiyo kadiwa i kare pa Kabaka Caulo. Kabaka otemme me jwero jo Gibeon woko, ma meno oturo gicikke man. Tutene meno okelo “alii me remo i kom Caulo ki i kom jo me ode.” (2 Cam. 21:1) Lacen, Daudi odoko kabaka. Jo Gibeon ma onongo gubwot guloko bote i kom bal ma Kabaka Caulo otimo i komgi. Daudi openyogi kit ma kitwero culo kwede kwor pi bal madit adada ma Caulo otimo wek oyab yo pi Jehovah me goyo laane i kom lobo Icrael. Me kaka penyo pi cente, jo Gibeon gupenyo ni kiminigi awobe abiro pa laco ma ‘oyubo pi tyekogi woko’ wek kinekgi. (Wel 35:30, 31) Daudi oye legagi.—2 Cam. 21:2-6.

I kare ma meno timme, Caulo ki Yonacan onongo dong guto woko i dog lweny, ento Mepibocet wod pa Yonacan onongo pud tye kwo. En onongo tye langolo pi awano ma onongo i kare ma pud tidi dok pe oribbe ki kwarone i timme me neko jo Gibeon. Daudi onongo omoko gicikke ki Yonacan, ma onongo bikelo adwogi maber bot lutinone, ma i kine onongo tye iye Mepibocet wod pa Yonacan. (1 Cam. 18:1; 20:42) Lok ma kicoyo waco ni: ‘Kabaka Daudi onyuto kica bot Mepibocet, wod pa Yonacan wod pa Caulo oweko odong, pien yam gukwongo kwong i nyim Jehovah ma tye i kingi.’—2 Cam. 21:7.

Kadi bed kit meno, Daudi oye kwac pa Lugibeon. En omiyogi awobe aryo pa Caulo, ma ngat acel i kingi nyinge Mepibocet, ki likwayo pa Caulo abic. (2 Cam. 21:8, 9) Gin ma Daudi otimo-ni okwanyo alii me remo woko ki i lobo Icrael.

Gin mutimme man pe obedo mere lok macon keken, ento watwero pwonyo gin mo ki iye. Cik pa Lubanga onongo ngene ka maleng. Onongo waco ni: “Latin bene pe gibineko pi bal pa wonne.” (Nwo. 24:16) Jehovah onongo pe biye gin ma kitimo i kom awobe aryo pa Caulo ki likwayone abic-ci ka onongo pe gitye ki bal mo. Cik meno omedo ni: “Dano acel acel gibineko pi balle kikome.” Nen calo litino pa Caulo abiro ma guto-ni gunywako i yo mo i tute pa Caulo me jwero Lugibeon woko. Macalo adwogine, awobe abiro-ni guculo pi balgi.

Gin mutimme man nyuto ka maleng ni ngat mo pe twero gengo ngeye pi balle ki tamo nyo waco ni ebedo mere ka lubo tira. Carolok mo me ryeko waco ni: “Myero ingi gin ma ilubo, ci bimiyo gin ma itiyo ducu bedo atir.”—Car. 4:24-27; Ep. 5:15.