Quiñeque che papeltufilu tüfachi troquiñ Biblia, ramtuuquei tüfa. Huelu feitachi versiculo mu, mülefui epu huentru Mefibóset pingequefulu. Papeltufiliyiñ ñi chem ñi rupan, quimürpuafuiñ quiñe falin dungu.

Ti rey Saúl niefui regle fotüm ca epu ñahue. Tañi hunen fotüm Jonatán pingefui. Rupachi antü mu, tañi domo Rizpá pingelu elueyu quiñe fotüm, Mefibóset pingelu. Huelu Jonatán ca niefui quiñe fotüm Mefibóset pingelu. Feimu, ti rey Saúl niefui quiñe fotüm Mefibóset pingelu, ca niefui quiñe lacu ca femngechi üi yeniefui.

Tati rey Saúl üderpufi tati pu gabaonche, fei ayüfui com engün ñi langümngeal. Huelu tañi raquiduam huesalcalefui. ¿Chumngelu? Cuifi mu, Josué ñi antü mu, pu loncolelu Israel mu ca pu gabaonche feipicünuufuingün ñi cüme yeucüleal engün (Jos. 9:3-27).

Tañi feipicünufel fei engün petu falin-ngefui tati rey Saúl ñi antü meu. Femfulu rume, Saúl raquiduamcülefui ñi langümafiel pu gabaonche, fei eluhui ñi femal (2 Sam. 21:1). Rupachi antü mu, David reyngerpui. Tati pu gabaonche mongetripalu amuingün ta David mu ñi feipimeafiel ñi huesalcaeteu ta Saúl. Fei David feipieyu: “¿Chumafuiñ am taiñ perdonamuafiel?”. Pu gabaonche plata pedilaingün, huelu mai feipifi ta David ñi eluaeteu Saúl tañi regle fotüm, femngechi ñi langümafiel (Núm. 35:30, 31). David femi tañi feipieteu engün (2 Sam. 21:2-6).

Feichi mu, Saúl ca Jonatán deu larquefuingu. Huelu Jonatán tañi fotüm, Mefibóset, petu mongelerquefui. Pichicalu Mefibóset allfürquei, feimu pepi trecaquelafui. Quisu coneltulai tañi lacu Saúl huechamefilu pu gabaonche. David Jonatán engu feipicünuufuingu ñi rumel hueniyeucüleal engu. Tañi feipicünuhun mu engu, cümelcangeafui tañi pu cüpanche, fei ca cümelcangeafui Mefibóset, Jonatán tañi fotüm (1 Sam. 18:1; 20:42). Biblia feipi: “Chau Jehová ñi üi mu, David Jonatán engu feipicünuhuingu tañi chumal. Feimu ti rey David cutranpiuqueyefi ta Mefibóset, tüfa ta Jonatán ñi fotüm, Saúl ñi lacu” (2 Sam. 21:7).

David falintufi tañi feipieteu pu gabaonche. David elufi engün Saúl tañi epu fotüm, quiñe tüfa Mefibóset pingefui. Ca elufi Saúl tañi quechu lacu (2 Sam. 21:8, 9).

Com feitachi dungu ñi rupan quimeltuafeiñmu quiñe falin dungu. Chau Dios tañi ley feipiquefui: “Tati pu yall ngelai ñi langümngeal tañi pu chau ñi duam mu” (Deut. 24:16). Feimu, ¿chumngelu Jehová catrütulafi ta David ñi elunoafiel pu gabaonche Saúl tañi epu fotüm ca quechu lacu? Tati ley feipiquefui: “Caque quiñeque che mülei ñi langümngeal quisu ñi culpan mu”. Feimu, Saúl tañi epu fotüm ca quechu lacu coneltuingün chi Saúl langümcafilu pu gabaonche. Feichi regle che langümngeingün tañi culpan mu.

Tüfachi nütram quimeltueiñmu quiñe che huesa femlu feipilayafui: “Culpalan. Quisu ngünehun mu femlan. Femün tañi feipingeel müten” pilayafui. Quiñe proverbio feipi: “Cüme ngüneduamafimi cheu tami trecaquen. Femngechi, cüme miyahuaimi com tami rüpü meu” (Prov. 4:24-27; Efes. 5:15).