Abantu bamo ababelenga ili lyashi lubilo lubilo balepusha sana ici cipusho. Na lyo line, ili lyashi lilanda pa bantu babili abakwete ishina limo line ilya kuti Mefiboshete. Kabili kuti twasambililako kuli ili lyashi nga twatontonkanya sana pa fyacitike.

Imfumu Shauli iyaleteka abena Israele yakwete abana baume 7 e lyo na banakashi babili. Umwana umwaume uwa kubalilapo uwa kwa Shauli, ali ni Yonatani. Pa numa, imfumu yaishilekwata umwana mwaume muli kanakashi wa iko Rispa kabili bamwinike ati Mefiboshete. Na Yonatani na o alikwete umwana uo ainike ati Mefiboshete. Kanshi Imfumu Shauli yalikwete umwana Mefiboshete e lyo no mwishikulu Mefiboshete.

Inshita imo Imfumu Shauli yatendeke ukupata abena Gibeone ica kuti yalefwaya ukubalofya bonse. Cimoneka kwati yalipeyepo na bamo. Ici cali cilubo. Mulandu nshi? Pantu mu nshiku sha kwa Yoshua abakalamba ba mu Israele balipangene icipangano ca mutende na bena Gibeone.—Yosh. 9:3-27.

Cilya cipangano tacapwile na mu nshita ya Mfumu Shauli. Filya imfumu yalefwaya ukulofya abena Gibeone fyalipusene ne fyo Yoshua apangene nabo. Ici calengele Shauli e lyo na ba mu ng’anda yakwe ukuba no ‘mulandu wa mulopa.’ (2 Sam. 21:1) Lyena ilyo Davidi aishileba imfumu, abena Gibeone abashelepo balimwebele pa cilubo icikalamba ico Shauli acitile. Davidi alibepwishe ifyo ali no kucita pa kuti afute umulandu, na pa kuti Yehova atendeke ukupaala abena Israele na kabili. Mu cifulo ca kulomba indalama, abena Gibeone balombele ukuti babapeele abana 7 aba muntu ‘uwacitile amapange ya kubalofya,’ pa kuti bepaye abana bakwe. (Impe. 35:30, 31) Davidi alibapeele ifyo balefwaya.—2 Sam. 21:2-6.

Pali iyi nshita ninshi Shauli na Yonatani balifwa mu bulwi, lelo umwana wa kwa Yonatani Mefiboshete ena ninshi acili uwa mweo. Alemene ilyo ali umwaice kabili ilyo Shauli shikulu wakwe alesansa abena Gibeone ena taliko. Davidi alipangene icipangano na Yonatani ica kuba ifibusa kabili ici cipangano calikumine abana ba kwa Yonatani ukubikako fye na Mefiboshete wine. (1 Sam. 18:1; 20:42) Baibolo itila: “Imfumu [Davidi] yaumfwilile uluse Mefiboshete mwana Yonatani mwana Shauli pa mulandu wa mulapo uo Davidi na Yonatani mwana Shauli balapile mwi shina lya kwa Yehova.”—2 Sam. 21:7.

Nangu cali ifi, Davidi alicitile ifyo abena Gibeone bamulombele. Alipeele abena Gibeone abana babili abaume aba kwa Shauli kabili umo pali aba ali ni Mefiboshete e lyo na beshikulu ba kwa Shauli abali 5. (2 Sam. 21:8, 9) Ifi Davidi acitile fyalengele afute umulandu wa mulopa uo abena Israele bakwete.

Kwaliba ifyo twingasambililako kuli ili lyashi. Ifunde lya kwa Lesa lyalandile fye mu kulungatika ukuti: “Abana bekafwila pa mulandu wa bashibo.” (Amala. 24:16) Nga ca kuti abana ba kwa Shauli babili e lyo na beshikulu 5 tabaliko ilyo Shauli aile mu kwipaya abena Gibeone, Yehova nga tasuminishe ukuti babepaye. Lilya ifunde lyalandile no kuti: “Lelo umo umo akafwila pa mulandu wakwe.” Cimoneka kwati balya 7 aba mu lupwa lwa kwa Shauli abo baipeye, baletungilila Shauli ilyo alefwaya ukulofya abena Gibeone. Kanshi balya baume 7 tababafyengele, babepaile pa fyo bacitile.

Ili lyashi litusambilisha ukuti umuntu nga alecita ifyabipa pantu fye e fyo bamwebele ukucita, te kuti abe uwa kaele. Ipinda limo ilyaba mu Baibolo litila: “Ulewamya umwenda amakasa yobe, kabili leka imibele yobe yonse ipampamikwe.”—Amapi. 4:24-27; Efes. 5:15.