Piga-piga kalak si la megermet mbaca kejadin e banci saja pernah tersungkun-sungkun kerna si e. Tapi, Mepiboset si ikataken bas ayat 7 la seri ras Mepiboset si ikataken bas ayat 8. Selain si e, arah kejadin e, lit pelajaren si penting si banci sidat.

Saul, raja Israel, lit pitu anakna dilaki ras dua diberu. Anakna sintua gelarna Jonatan. Bas pudi wari, lit anak Saul si gelarna Mepiboset si ilahirken gundikna, Rispa. Selain si e, Jonatan pe lit anakna si gelarna Mepiboset. Emaka, Raja Saul lit anakna ras kempuna si gelarna Mepiboset.

Bas sada paksa, mulai segat ate Raja Saul man kalak Gibeon janah kernepkenna atena kalak e. Banci saja, piga-piga arah kalak e enggo bunuhna. Situhuna, la banci lakokenna bage. Engkai? Perban bas jaman Josua, peminpin-peminpin Israel enggo erban perjanjin dame ras kalak Gibeon.​—Jos. 9:3-27.

Perjanjin e berlaku denga seh ku jaman Raja Saul. Emaka, sanga usahakenna engkernepken kalak Gibeon, enggo ilanggarna perjanjin e. Akibatna, “enggo ersalah Saul ras keluargana.” (2 Sam. 21:1) Bas pudi wari, Daud me si jadi raja. Ikataken kalak Gibeon man bana kerna kesalahen Saul si seh kel belinna. Emaka, isungkun Daud kalak e uga carana nebusi kesalahen Saul gelah ipasu-pasu Jahwe mulihi negri Israel. Labo pindo kalak Gibeon sen, tapi pindo kalak e gelah pitu dilaki arah keturunen Saul ‘si kernepkenna tena’ kalak e, iserahken man kalak e guna ihukum mate. (Bil. 35:30, 31) Ikutken Daud pemindon kalak e.​—2 Sam. 21:2-6.

Paksa si e, Saul ras Jonatan enggo mate sanga erperang, tapi Mepiboset anak Jonatan nggeluh denga. Mepiboset cacat perban ndabuh ia sanga kitik denga. Labo ia terlibat sanga iserang bulangna kalak Gibeon. Daud ras Jonatan erteman, janah lit sada perjanjin si iban kalak e. Perjanjin e erguna man keturunen Jonatan termasuk man anakna eme Mepiboset. (1 Sam. 18:1; 20:42) Bagenda nina Pustaka, “Mekuah ate Daud man Mepiboset anak Jonatan kempu Saul, perban enggo pernah ersumpah Daud ras Jonatan anak Saul i lebe-lebe Jahwe.”​—2 Sam. 21:7.

Amin pe bage, ikutken Daud pemindon kalak Gibeon. Iserahkenna dua anak Saul si dilaki, salah sada gelarna Mepiboset bage pe lima kempu Saul si dilaki. (2 Sam. 21:8, 9) Kai si ilakoken Daud e erban lanai lit utang dareh bas negri Israel.

Kejadin enda labo terjeng sejarah, tapi lit pelajaren penting i je. Jelas kel ikataken bas undang-undang Dibata maka, “Anak pe la banci ihukum mate perban kai si lakoken bapakna.” (Ul. 24:16) Emaka, adi memang kin duana anak Saul ras lima kempuna e la ersalah, pasti labo pediat Jahwe kalak e ihukum mate. Nina ka bas undang-undang e, “Tiap kalak arus ihukum mate perban dosana sendiri.” Banci saja pituna dilaki e ikut terlibat sanga kernepken Saul atena kalak Gibeon. Akibatna, arus ipertanggung jawapken kalak e kesalahenna.

Kai si banci sipelajari arah kejadin e? Sanga lit kalak si ngelakoken kesalahen, labo banci ia erpengakap maka la ia ersalah amin pe si ilakokenna e perentah arah kalak si deban. Arus ipertanggung jawapkenna perbahanenna e. Bagenda nina Pustaka, “Ratakenlah dalan si man dalanenndu, janah paguh pagi kerina dalan-dalanndu. Ula kam nilah ku kanan ntah pe ku kiri. Pedauhlah nahendu arah kai si jahat.”​—Kua. 4:24-27; Ep. 5:15.