Atu waze akutanga kafuji-fuji lusango yono kakulihula chihula chacho. Alioze mu lusango wacho muli malunga aali waze te akwete jina lia Mefiposhete, nawa mutuhasa kulilongesa yimwe ha kuhengwola yize yalingiwileko.

Mwanangana Saulu wa mu Izalele, kapwile ni ana a malunga shimbiali ni a mapwo aali. Jonata kapwile mwanenyi mutangu. Mwanangana Saulu kapwile nawa ni mwana yoze te avuluka ngwo Mefiposhete, asemene ni konkubina Rizipa. Jonata neye kapwile ni mwana te avuluka ngwo Mefiposhete. Hachino, Mwanangana Saulu kapwile ni mwana ni mujikulu waze te avuluka ngwo Mefiposhete.

Ha chimwe chikuma, Mwanangana Saulu yaputuka kuvwila kole A-Ngibeone waze te atunga mu Izalele, chocho yafupa kwashiha eswe. Kota amwe a kuli ayo kaashihile. Nyonga lino liapwile lipi chinji. Mumu liaka? Mumu nyi mutufuna ha mashimbu ja Yoshua, makulwana A-Izalele kalingile usendo wa sambukila ni A-Ngibeone.—Yoshu. 9:3-27.

Usendo wacho te muchinunga ndo ha mashimbu a Mwanangana Saulu. Mwanangana yehuka usendo wacho ha kufupa kushiha A-Ngibeone eswe. Hachino, ‘Saulu ni munyachi wenyi yamwanga manyinga.’ (2 Samue. 21:1) Kulutwe, Ndawichi yapwa Mwanangana. A-Ngibeone waze asalile ni mwono yamulweza upi uze Saulu alingile. Ndawichi yaahula ngwenyi, yika twatamba kulinga mumu lia yitanga yipi ya Saulu hanga tukwase chifuchi chizuke yiwape ya Yehova. Shimbu amwite mbongo, A-Ngibeone yamwita hanga ashihe ana shimbiali a lunga yoze ‘wawonwene ni kwatakila chipi.’ (Kwa. 35:30, 31) Chocho, Ndawichi yalinga yize ayo etele.—2 Samue. 21:2-6.

Ndo hano, Saulu ni Jonata te hanafu kulu ku jita, alioze mwana wa Jonata, Mefiposhete te uchili ni mwono. Iye te chilema chize ku wanuke, kashika kakalinjishile mu vunda yize kako alingile hali A-Ngibeone. Ndawichi kalingile usendo wa usepa ni Jonata, uze te muyukisa munyachi wenyi, kuchingako mwana wa Jonata, Mefiposhete. (1 Samue. 18:1; 20:42) Lusango wacho kanambe ngwo: “Mwanangana [Ndawichi] walamwinyine Mefiposhete mwana wa Jonata mwana wa Saulu, mumu ha shingo lia Yehova lize liapwile hakachi ko.”—2 Samue. 21:7.

Chipwe chocho, Ndawichi yalemesa kwita cha A-Ngibeone. Iye yahana ana aali a Saulu, umwe yoze te avuluka ngwo Mefiposhete ni ajikulu ja Saulu atano. (2 Samue. 21:8, 9) Yize Ndawichi alingile yiyihwisa mulonga wa manyinga mu chifuchi.

Lusango yono hi chishima ko, kanalumbunuka yuma yinji. Shimbi ya Zambi yapwile zwalala ngwo: “Kanda ashiha ana mumu hali yisemi.” (Shimbi 24:16) Nyi ana aali a Saulu ni ajikulu jenyi atano kakapwile ni chitela, kachi Yehova kakatayijile hanga aashihe. Shimbi yinawezela ngwo: “Ashihe mutu ha mulonga wenyi mwene.” Chinasoloka ngwe malunga jacho shimbiali amu jiko lia Saulu waze ashihile, kota kakwashile nyonga lia Saulu lia kunongesa A-Ngibeone. Hachino, akwa-jiko lienyi shimbiali yaashiha mumu lia mulonga wacho.

Lusango yono kanasolola ngwo, mutu kechi kufupa kaliongelo hanga alinge upi ha kunyonga hanji kwamba wika ngwenyi ngunakaula usongwelo. Maliji amwe a mana kanambe ngwo: “Tala kanawa kuze unatalikisa molu je, mba majila je eswe makawaha.”—Yishi. 4:24-27; Efwe. 5:15