Bantu baguma basomere olula lwandiko juba-juba, bachibaza echila chibazo. Aliko ahola haderheere balume babiri, bombi bayirikirwe Mefibosheti. Hali n’echintu rhwakayiga mw’eyo ngani omu kushuba kuyibuka ebyabaga.

Omwami Sauli we Izraeli aliherhe bagala mushanvu na bali babiri. Mugala wa Sauli w’olubere aliri Yonatani. Buzinda Mwami Sauli agwarha owindi mugala mpu ye Mefibosheti, aburhaga oku mwirakazi Rizpa. Ech’okusimisa, Yonatani naye aliherhe omugala oyirikirwe Mefibosheti. Nantyo, Mwami Sauli agwarha omugala oyirikirwe Mefibosheti, n’omunjukulu oyirikirwe kw’elyo zino lyen’elyola.

Mango maguma Mwami Sauli ashomba Abagibeoni balilamire omu Baizraeli, alonza abasibye boshi. Bishushire oku aliyirhire banene mubo. Kweri alijirire kubi bwenene. Bulagurhe? Bulala embere w’aho, omu siku za Yoshua, abakulu be Izraeli balijirire endagano y’omurhula haguma n’Abagibeoni.​—Yos. 9:3-27.

Eyola ndagano yalichili yakola omu siku za Mwami Sauli. Ayigera eburhambi alonza oku asibye Abagibeoni. Echola chalerha “echisobe ch’eshagama ku Sauli n’enju yage.” (2 Sa. 21:1) Buzinda, Daudi aba mwami. Abagibeoni bafumaga bamubwira eju y’obola bubi bungan’aho. Daudi abazabo chihano chihe balonzeze chichibwe oku maligo Sauli abakoleraga. Ahola, aba ey’amafungulira Yehova enjira y’okugisha echihugo. (Hes. 35:30, 31) Ahali h’okuhema efuranga, Abagibeoni bahema, oku bagala mushanvu b’oyola mulume “walonzaga kubasibya,” boshi bayirhwe. Daudi ayemera echibahemere.​—2 Sa. 21:2-6.

Ahola, Sauli n’omugala Yonatani bali bafire omu vita, aliko eyi Mefibosheti mugala wa Yonatani yewe achili ho. Alipatire eaksida ey’achili mwana yalimulekere chilema, nantyo arhajaga omu ntambala y’eshe-kulu y’okurhera Abagibeoni. Daudi alijirire endagano y’obwira na Yonatani, n’oluburho lwage lwakayungukire nayo, luhirirwe mu n’omugala Mefibosheti. (1 Sa. 18:1; 20:42) Engani ederhere: “Omwami [Daudi] ayunvira Mefibosheti obonjo, mugala wa Yonatani, munjukulu wa Sauli, eju y’echihango Daudi ajaga bombi Yonatani embere za Yehova.”​—2 Sa. 21:7.

Ahola, Daudi alikengere ech’Abagibeoni bahemaga. Abarheegeza bagala ba Sauli babiri, muguma mu bo aliyirikirwe Mefibosheti, na banjukulu barhano. (2 Sa. 21:8, 9) Echijiro cha Daudi chamala echisobe ch’eshagama omu chihugo.

Eyila erhali ngani konyine. Esheriya ya Yehova yaliri wazi. Yaliderhere: “Abana barhakwanene bafe oku bi b’eshe bajiraga.” (Kum. 24:16) Yehova arhakayemerere abala bagala ba Sauli babiri na banjukulu barhano bafe, nka kweri baliri mweru-kweru. Eyola Sheriya yalishubire kuderha: “Omuntu akwanene ayirhwe oku chaha chage chonyine.” Bishushire oku abola bantu mushanvu b’omu luburho lwa Sauli bafaga, baliri mw’eyola nama y’okushembanga Abagibeoni boshi. N’echola charhuma, oku banali mushanvu bajuha obubi bwabo.

Eyila ngani eyerekene ok’omuntu arhakwanene kukola amabi ey’ali achirhebeka mpu yewe nta gosa aherhe bula y’akenga abamurhumaga konyine. Omugani guyengehere guderhere: “obumbagize ah’amagulu mawe magera, enjira zawe zoshi zaba zikomere.”​—Mez. 4:24-27; Efe. 5:15.