Yatun i pakkiavu na karuan nga nakabibbig tatun ira nga teksto. Ngem makkaduma nga Mefiboset i nakagi tatun nga istoria anna egga i magigiammu tam nu ammuattam i nesimmu.

Pitu nga lalaki anna dua nga babay i ána ni Patul Saul na Israel. Si Jonatan i kaka nga ana na nga lalaki. Turi kua, nakka-ana si Patul Saul anna i atawa na nga si Rizpa tapus ningaganadda yatun tu Mefiboset. Ngem ammum kari nga nakka-ana gapa si Jonatan tapus ningaganan na gapa yatun tu Mefiboset? Egga gafu i ana anna afu ni Patul Saul nga parehu nga mangngagan tu Mefiboset.

Egga i tiempo nga kala-kalussaw ni Patul Saul i Gibeonita ira yatutta pinurueban na nga ipapatay ira ngamin. Aru ta nira i napatay. Ugal yatun nga kingngua na. Ngatta? Ta tiempo gare ni Josue, nakipakkasinabban para ta imammo i panakallan ira na Israelita ta Gibeonita ira.​—Jos. 9:3-27.

Adde ta tiempo ni Patul Saul mawag lagapa nga mepatuppal yatun nga pakkasinabban. Ngem ari na nga sinuttul yatun tapus pinurueban na nga patayan i ngamin nga Gibeonita. Megafu tatun, “nakaliwa ta daga si Saul anna i tangabbalayan na.” (2 Sam. 21:1) Turi kua, nabbalin tu patul si David anna nipakibbida nisa na sigga-matolay paga ira nga Gibeonita i ugal nga nakua ta nira. Tapenu bendisionan ni Jehova i davvun na Israel, niyavu ni David nu anni i awayya da nga kuan onu iyawa bilang katali ta grabe nga kiningngua ni Saul ta Gibeonita ira. Imbes tu makkiddaw i Gibeonita ira tu kuartu, nikiddaw da lallagu nga meyawa ta nira i pitu nga ana nga lallaki na tolay nga ‘napplano nga mangufu ta lahi da’ tapus patayadda ira. (Num. 35:30, 31) Minanugu si David ta kiddaw da.​—2 Sam. 21:2-6.

Tatun nga tiempo, natay ngana si Saul anna si Jonatan megafu ta gerra. Ngem matolay paga i ana ni Jonatan nga si Mefiboset. Napilay yayya ta kabbinna megafu ta tadday nga aksidente yatutta ari yayya nga nakisali ta pangatake na kakay na ta Gibeonita ira. Nakipakkasinabban gapa si David ta kofun na nga si Jonatan. Mammakapia tatun i gaka ira ni Jonatan, nelagum i ana na nga si Mefiboset. (1 Sam. 18:1; 20:42) Kunnaw i mabibbig tatun nga istoria: ‘Nikallo ni Patul David si Mefiboset, i ana ni Jonatan nga ana ni Saul, megafu ta pakkasinabban ta arubang ni Jehova.’—2 Sam. 21:7.

Ngem kingngua lagapa ni David i kiddaw na Gibeonita ira. Niyawa na ta nira i dua nga ana nga lalaki ni Saul, nelagum si Mefiboset kunne na gapa i lima nga afu ni Saul. (2 Sam. 21:8, 9) Megafu tatun nga kingngua ni David, nalsa i pakaliwatan ta daga ta nasion na Israel.

Ari laman tu istoria yatun nga nesimmu. Manawag i dob na Dios: “Ari nga mapatay i ana megafu ta kingngua na yama na.” (Deut. 24:16) Magga ari nga minanugu si Jehova ta nesimmu ta dua nga ana anna lima nga afu ni Saul nu awan talaga tu liwa da. Kunnaw paga i kagian natun nga dob: “Mapatay laman i tadday nga tolay megafu ta sarili na nga liwa.” Posible gafu nga nakiparte i pitu nga gaka ni Saul turi ta pinurueban na nga ufutan i Gibeonita ira. Megafu tatun nga nakaliwatadda, napapatay ira.

Magigiammu tam tatun nga istoria nga ari nga awayya nga nonopan onu irason na tadday nga nakaliwa nga tuttuttulan na laman i nepakua ta nisa. Kunnaw i kagian na tadday nga masirib nga akkagianan: “Piesammu i lakarammu, ay mabbalin tu tunung ngamin nga lakag mu.”​—Prov. 4:24-27; Efe. 5:15.