Angịhyẹ ịlẹ kị wa oja ọwẹ la agaga kaa tọ ịtọ ẹla ọwẹ. Ma angị imiiye i ya ẹla rụ́ wẹ ká ẹnyị nyaa ri iMefibochẹtị lẹ, ahị tị ka jẹ́ ẹlẹhẹ bwu ẹpwụ nyamwụ bwula ọ-da ẹhị wụla ẹla ọlẹ kọ họ.

ỊSọlụ Adịrahụ nya ala Isirẹlụ ma anyị alẹng irwiye bala anyang imiiye. Ọnyị ọlẹng nya ọgbanyẹ nya ịSọlụ ri iJonatan. Nyọlẹ kọ nọ chẹẹ iRisipa, ko ri ahụ-igu ma ọnyị ọlẹng ọkịla ha adịrahụ ịSọlụ. Ẹnyị nya ọnyị ọọwa à ri iMefibochẹtị lẹ. Ọ kpịpyọ nyori iJonatan ma ọnyị ọhẹ ká ẹnyị nyamwụ ịnyịnyị ri iMefibochẹtị. Lẹ, Adịrahụ ịSọlụ la ọnyị ọlẹ ká ẹnyị nyamwụ ri iMefibochẹtị bala ọnyị ọtụma ọlẹ ko ri ẹnyị ọwọwa.

Nyọlẹ kọ pwụ ụka ọhẹ, Adịrahụ ịSọlụ jahị da ala iGibiyọn ịlẹ kị kụ jula ala Isirẹlụ bala ọ-maga nyọka taa ayịreji. Ị dọmwụ nwụ angịhyẹ nyaa. Ẹla ọọwa tị tịpyọ. Ịyẹ à tị́ du? Chajị kẹkpẹ la ahyẹẹnụ nya iJochuwa, alegbeju nya ala Isirẹlụ nwa iro nya okpunyi bala ala iGibiyọn.​—Joch. 9:3-27.

Iro ọnwanwa ọọwa tị juwa họ ụkụrwọ pwụ ụka nya Adịrahụ ịSọlụ wẹẹ. Ọlẹ ká adịrahụ wẹẹ maga nyọka ta ala iGibiyọn ayịreji á pwoku iro ọnwanwa ọọwa ka. Ẹla ọọwa kpa abyị nya “ọngịnyị ọnwụnwụ” wẹ uhye nya “ịSọlụ bala alugbiyegu nyamwụ.” (2 Sam. 21:1) Ụka ohyẹẹkpẹ, iDevidi ri adịrahụ. Ala iGibiyọn ịlẹ kị chịda kpa ẹla ọtịpyọ ọwẹ kaka gbọọ. IDevidi taa wo nya abwọlẹ kị ka bwu ju ijwo nyọka myị uguru ẹla ọlẹ ká ịSọlụ họ wẹ chajị ká iJihova ka jẹ́-ẹ wahị kụrụ ọpyị. Ọkọkọ ká ala iGibiyọn ka tịtọ nya okpoko, ị ya nyori nyị ya anyị irwiye nya ọlẹng ọlẹ kọ ‘tịtọ nyọka taa ayịreji’ ha ịwa ká ịwa nyị nwaa mẹ. (Ọwa. 35:30, 31) IDevidi họ jaabwọ kị tịtọ.​—2 Sam. 21:2-6.

Ụka ọwẹ wẹẹ, ịSọlụ bala iJonatan gbu ẹ-ẹwụ lẹ, ma iMefibochẹtị ọnyị nya iJonatan tị ji la ọhịhị wẹẹ. Ọwa ju ẹjẹẹ bwu eji-eji ọọlajị nyọlẹ kị yọọ mileji, ang ẹjẹẹ á tị ji nyori ọ la ụbwọ ẹ-ẹpwụ nya ẹla ọlẹ ká adamwụ ọgbahị họ ala iGibiyọn ka. IDevidi nwa iro nya igu oriri bala iJonatan, apyobwuna nyamwụ tị ka chị wu anyị nyamwụ tụ iMefibochẹtị ọnyị nya iJonatan ịnyịnyị. (1 Sam. 18:1; 20:42) ỊBayịbụụ yẹkẹẹ: “IMefibochẹtị ọnyị nya iJonatan ri ọnyị ọtụma nya ịSọlụ, iDevidi tị chọọ da ọọ-lajị nya iro ọlẹ kọọwa bala iJonatan nwa tawụlẹ.”​—2 Sam. 21:7.

Kpọkpọọkpọ, iDevidi họ ẹla ọlẹ ká ala iGibiyọn ya. Ọ ya anyị alẹng imiiye nya ịSọlụ, ká ẹnyị nya ọngọhẹ nyaa ri iMefibochẹtị, bala anyị alẹng ịtụma nya ịSọlụ ịrụ jwaa ụ-ụbwọ. (2 Sam. 21:8, 9) Ẹla ọlẹ ká iDevidi họ wẹ myị́ abyị nya ịwọ ọlẹ ko ji uhye nya epweji.

Oja ọwẹ á ri ẹla nya ego ịịwẹ chwee ka. Ehile nya Ohe la gbagbịla. O yẹkẹẹ: “Ánụ ka wu . . . ọnyị nwụ chajị nya ang onyobyi nya adamwụ koo.” (Ehile. 24:16) IJihova á ka myị́ ju ẹla ọlẹ kọ họ ta anyị imiiye nya ịSọlụ bala anyị ịtụma nyamwụ ịrụ, ó ri ká abyị ọhẹ-lọhẹ á ju uhye nyaa ka lẹ ka. Ehile ọọwa myịmyị yẹkẹẹ: “Ọngọng-ọngọng ka gbu u-uhye nya ang onyobyi nya ịlọmwụ.” Ọ lala o-ri anyị ịtụma irwiye nya ịSọlụ ịlẹ kị gbu wẹ nyị la ụbwọ ụ-ụgbẹyị ọhẹ ẹ-ẹpwụ nya ala iGibiyọn ịlẹ kị tịtọ nyọka ta ayịreji. Chajị nya ọọwa, angị irwiye ịwẹ nwụ uri nya ang ọtịpyọ ọlẹ kị họ.

Oja ọwẹ mẹjẹ nyori ọngịnyị-ị́ ka jẹ́-ẹ ya eje rụ ịlọmwụ u-uhye nya ang ọtịpyọ ọlẹ kọ họ bwula ọ-kụ irya lee o-ya nyori ẹla ọlẹ kị nyị ya ọwa nya-à ba jẹ lẹ ka. ỊBayịbụụ da etu ọnyịịla-ọnyịịla ọhẹ yẹkẹẹ: “Kụ irya ju ang ọlẹ ká wẹẹ ka họ, chajị ká ang myị́ ang ọlẹ ká họ ka godayị giri-giri.”​—Etu 4:24-27; Efe. 5:15.