Ẹbho eso ne wo re ẹjẹje tie ene ulọnlẹn nin bhi Baibo, wo nọọn ọne inọnta nin. Sokpan, ikpea eva a ha tie ele Mephibosheth bhi ene ulọnlẹn nin. Sẹyẹ, mhan dẹ miẹn emhin luẹ sade mhan zilo nyan ebe sunu.

Saul nin Ojie ọsi Izrẹl da ha mhọn iminkpea ihinlọn, bi iminkhuo eva. Jonathan da ha yi ọmọn okpea nin ọhẹnhẹn ọsi Saul. Akizẹbue, Saul da ha mhọn ọmọn okpea ọbhebhe natiọle Mephibosheth. Okhuo ọkpa natiọle Rizpah nin ọle zẹ bhi ọshọ biẹ ọle nanlẹn. Sẹyẹ, Jonathan da yẹ ha mhọn ọmọn okpea natiọle Mephibosheth. Bhiriọ, Saul nin Ojie da ha mhọn ọmọn bi eyẹ natiọle Mephibosheth.

Saul nin Ojie da munhẹn ha khọẹkẹ ibhokhan Gibeon. Bhiriọ, ọle da dọnmhegbe nin ọle rẹ gbono ele rebhe a. Iriọ a ha da miẹn a gbono eso bhi ẹwẹ ele a. Emhin ebe wo khọnan. Bezẹle? Ranmhude, bhi ẹghe nọnsi Joshua, ekhaẹmhọn ọsi Izrẹl da deba ibhokhan Gibeon ve akovẹn ghe, ele dẹ ko ha nyẹnlẹn bhi ọfure.​—Josh. 9:3-27

Ọne akovẹn nin yẹ ha ribhọ bhi ẹghe nin Saul nin Ojie rẹ ha gbẹloghe. Saul bha re obọ ọbhi ọne akovẹn nan. Bhiriọ, ọle da ha guanọ nin ọle gbono ibhokhan Gibeon an. Ọne emhin nan nin Saul rẹ ha ho nin ọle lu, da re ọle bi azagba-uwa nọnsọle ha mhọn aranlẹn bhi obọ. (2 Sam. 21:1) Akizẹbue, David da kiẹn ojie. Bhiriọ, ibhokhan Gibeon ne ha ribhọ da taman ọlẹn emhin ebe nin Saul rẹ ha ho nin ọle lu. David da nọọn ele ebi ele ho nan rẹ zọese ọbhi emhin ọbe nọnsi Saul, beji Jehova ha da nan erọnmhọn ọbhi otọ nọnsele. Ibhokhan Gibeon bha yọle nan re igho nin ele. Sokpan, ele da yọle ghe, nan gbono iminkpea ihinlọn nesi Saul a. (Num. 35:30, 31) David da lu beji ele tale.​—2 Sam. 21:2-6

Bhi ọne ẹghe nan, Saul bi Jonathan yu bhi okhọnlẹn. Sokpan, Mephibosheth nin ọmọn nọnsi Jonathan yẹ ribhi agbọn. Akhun ọle ha khin ranmhude emhin nọn sunu ji ọle ẹghe nin ọle rẹ ha ribhi obhokhan. Sẹyẹ, ọle bha re obọ ọbhi ebi Saul nin aba ọle nọn nẹ lu da ibhokhan Gibeon. David ka deba Jonathan ve akovẹn ghe, ele dẹ ha yi imọẹ. Imọn nesi David rẹ dọ sẹbhi ọmọn nọnsi Jonathan nin Mephibosheth, dẹ miẹn elele bhi ọne akovẹn. (1 Sam. 18:1; 20:42) Baibo yọle: “Ọne ojie [David] da mhọn ẹkẹ-ẹjẹjẹ da Me·phibʹo·sheth nin ọmọn nọnsi Jonʹa·than, nin ọmọn ọsi Saul, ranmhude akovẹn nin [David bi Jonʹa·than nin ọmọn ọsi Saul] ko ve bhi isira Jehova.”​—2 Sam. 21:7.

David da lu beji ibhokhan Gibeon tale. Ọle da mun iminkpea eva ọsi Saul​—ọkpa bhi ẹwẹ ele da ha yi Mephibosheth, bi iminkpea isẹn ne yi eyẹ nesi Saul nin ele. (2 Sam. 21:8, 9) Ebi David lu nan da re ele miẹn ghe, a bha yẹ nene aranlẹn tẹ ele obọ.

Ọne okha nan gbera nin mhan rẹ gheghe lẹn ebe sunu bhi ẹghe nọn gbera. Uhi nọnsi Osẹnobulua yọle ghe, nan hẹi gbe ọmọn an, ranmhude ebi aba ọle lu. (Deut. 24:16) Jehova ida rẹ re obọ ọbhọ nan gbono iminkpea eva bi eyẹ isẹn nesi Saul a, sade obọ ele khiale. Ọne uhi da yẹ yọle ghe, nan gbe ọria a ranmhude olukhọ nọnsọle. Ọ diabe imọn ihinlọn nesi Saul ne yulu mhọn obọ bhi ebi Saul rẹ ha guanọ nin ọle lu da ibhokhan Gibeon. Bhiriọ, ene iminkpea ihinlọn da re uhọnmhọn ọbhọ ranmhude emhin ebe nọnsele.

Ọne okha nan rẹkpa mhan rẹ lẹn ghe, ọria dẹ miẹn ebe nabhọre sade ọle lu emhin ebe, aharẹmiẹn ọle riale ghe, adia nan re nanlẹn ọle gheghe ha rẹkhan. Ebe ọsi Proverbs yọle: “Gbẹlokotọ bhi ukpoẹ nin uwẹ zẹ, emhin rebhe nin uwẹ lu dẹ kiọnlẹn.”​—Prov. 4:24-27; Eph. 5:15.