Bantu ya nkaka yina ke tangaka disolo yai ntinu-ntinu, me kudiyulaka ngiufula yina. Kansi baverse yina ke tubilaka ba Mefibosheti zole. Beto lenda longuka mpi diambu mosi ya mfunu kana beto tadila diaka mambu yina salamaka.

Ntotila Saule ya Izraele vandaka ti bana-babakala nsambwadi mpi bana-bankento zole. Yonatani vandaka mwana ya Saule ya ntete. Ntotila Saule butaka mwana mosi ya bakala ti makangu na yandi Rispa. Zina ya mwana yango vandaka Mefibosheti. Kima ya ke benda dikebi kele nde Yonatani mpi vandaka ti mwana mosi ya bakala. Zina na yandi mpi Mefibosheti. Yo yina ntotila Saule vandaka ti mwana na zina ya Mefibosheti mpi ntekolo na zina ya Mefibosheti mpi.

Na ntangu mosi buna, ntotila Saule yantikaka kumenga bantu ya Gibeoni yina vandaka kuzinga ti bantu ya Izraele mpi yandi sosaka kufwa bo yonso. Yo ke monana nde bo fwaka bantu mingi ya Gibeoni. Yo vandaka mbi kibeni. Sambu na nki? Sambu na bilumbu ya Yozue, bamfumu ya Izraele salaka kuwakana ya ngemba ti bantu ya Gibeoni.—Yoz. 9:3-27.

Kuwakana yina vandaka kaka tii na bilumbu ya ntotila Saule. Ata mpidina, ntotila Saule fwaka bantu ya Gibeoni. Yo nataka ‘mfuka ya menga na zulu ya Saule mpi na zulu ya nzo na yandi.’ (2 Sam. 21:1) Nsuka-nsuka, Davidi kumaka ntotila. Bantu ya Gibeoni yina gulukaka songaka Davidi mambu ya mbi yina ntotila Saule salaka. Davidi songaka bo na kutuba amande yina bo fwete futa sambu na diambu ya mbi yina Saule salaka sambu Yehowa kusakumuna insi ya Izraele. Na kisika ya kulomba mbongo, bantu ya Gibeoni lombaka nde bo pesa bo bana-babakala nsambwadi ya muntu yina “kanaka kumanisa” bo mpi yina fwaka bo. (Kut. 35:30, 31) Davidi ndimaka mambu yina bo tubaka.—2 Sam. 21:2-6.

Na ntangu yina, Saule ti Yonatani fwaka na bitumba. Kansi Mefibosheti mwana ya Yonatani vandaka na luzingu. Yandi kumaka kikata sambu yandi salaka aksida ntangu yandi vandaka mwana-fioti. Yandi vandaka ve na kati ya bantu yina vukanaka ti nkaka na yandi sambu na kunwanisa bantu ya Gibeoni. Davidi salaka kuwakana ya kinduku ti Yonatani. Kuwakana yina zolaka kunatila bana ya Yonatani mambote; Mefibosheti mpi vandaka na kati ya bana yina. (1 Sam. 18:1; 20:42) Biblia ke tuba nde: “Ntotila [Davidi] wilaka Mefibosheti mwana ya Yonatani mwana ya Saule mawa, sambu na ndefi yina Davidi ti Yonatani mwana ya Saule, diaka na ntwala ya Yehowa.”—2 Sam. 21:7.

Davidi salaka mambu yina bantu ya Gibeoni lombaka. Yandi pesaka bana zole ya Saule mpi Mefibosheti yina Saule butaka ti Rispa vandaka na kati ya bana yango. Davidi pesaka mpi bantekolo tanu ya Saule. (2 Sam. 21:8, 9) Mambu yina Davidi salaka manisaka mfuka ya menga na insi.

Disolo yai ke longa beto mambu mingi. Nsiku ya Nzambi vandaka pwelele. Yo vandaka kutuba nde: “Bo fwete fwa ve bana sambu na mambu yina batata na bo ke sala.” (Kul. 24:16) Yehowa zolaka kundima ve nde bo fwa bana ya Saule zole mpi bantekolo na yandi tanu kana bo salaka ve mbi. Nsiku yina tubaka diaka nde: “Muntu fwete fwa kaka sambu na masumu na yandi mosi.” Yo ke monana nde bana nsambwadi yina ya Saule vukanaka mpi ti yandi sambu na kufwa bantu ya Gibeoni. Yo yina bo futaka masumu na bo.

Disolo yai ke monisa nde muntu fwete kudinungisa ve sambu na kima ya mbi yina yandi me sala mpi kuyindula to kutuba nde yandi me sala kaka mambu yina bo songaka yandi na kusala. Yandi fwete futa masumu na yandi. Kingana mosi ke tuba nde: “Kumisa lelensi nzila ya makulu na nge, ebuna banzila na nge yonso ta vanda ya kusungama.”—Bing. 4:24-27; Baef. 5:15.