Vamwe ava ava genderere kuresa sihorokwa esi kwa lipura epuro eli. Monovelise odo kwa tumbura mo vagara vavali ava va kara nedina lyokulifana, Mefiboseti ntani ose kuvhura kulirongera ko yuma pokukonakona sihorokwa esi.

Hompa Sauru goVaisraeli kwa kere novana ntambali wovagara ntani novana vavali wovakadona. MunaSauru gombeli kwa kere Jonatana. Ano hompa ga ya kere namunendi gomugara gedina Mefiboseti, ogu ga reterere pwaLisipa. Nye ayo kutetukisa sili, morwa Jonatana nage ga ya kere namunendi gedina Mefiboseti. Yipo nye, hompa Sauru kwa kere namunendi gedina Mefiboseti ntani namutekurwendi ogu nage va rukire edina lyokulifana.

Posiruwo simwe, hompa Sauru kwa tamekere kunyenga Vangibiyoni ava va tungire mokatji koVaisraeli ntani kwa hetekerere ko kuvadipaga navenye. Ayo kumoneka asi Vangibiyoni vamwe kwava dipagere. Oyo kwa kere epuko. Morwasinke? Morwa nare-nare momazuva gaJosuwa, vagendesi woVaisraeli kwa tulisire po egwanekero lyombili kumwe noVangibiyoni.—Jos. 9:3-27.

Egwanekero olyo kwa twikilire kukara po nomomazuva gahompa Sauru. Nye hompa age kwa hetekere ko kudipaga Vangibiyoni. Ano ngoyitundwamo ‘Sauru nepata lyendi kwa kere nonzo zedipago.’ (2 Sam. 21:1) Ano konyima, Ndafita kwa ya kere hompa. Vangibiyoni ava va parukire edipago kwa uyungire nage kuhamena sininke sosidona esi sa horokere. Ndafita kwa va pulire eyi na va ruganena koudona ou ga va ruganene Sauru yipo Jehova a tungike sirongo. Mevango lyokupura yimaliwa, Vangibiyoni kwa pulire Ndafita ava pe vana ntambali womugara ogu ga here kuvahanagura po yipo nawo va ka va dipage. (Num. 35:30, 31) Makura Ndafita yipo ga va pulisilire va rugane eyi va here kurugana.—2 Sam. 21:2-6.

Posiruwo oso sa horokere sihorokwa oso, Sauru naJonatana awo nare va fa moyita, nye munaJonatana Mefiboseti age opo muzuni. Age kwa kere sirema kutundilira unona wendi ntani age kapi ga lihamekere mo apa ozinakuru va rwisire Vangibiyoni. Ndafita kwa tulisire po egwanekero lyoukaume kumwe naJonatana, eli lya ya reterere mauwa ruvharo rwendi kukwatera mo munendi Mefiboseti. (1 Sam. 18:1; 20:42) Matjangwa kwa uyunga asi: ‘Hompa Ndafita kwa liganenene naJonatana komeho zaHOMPA, yipo nye ga fililire Ndafita Mefiboseti nkenda. Mefiboseti munwaJonatana zaSauru.’—2 Sam. 21:7.

Nye nampili ngoso, Ndafita simpe ga sikisire mo ehundiro lyoVangibiyoni. Ndafita kwa geve vana vavali vaSauru, gumwe gwawo edina lyendi Mefiboseti ntani vatekuru vatano wovagara vaSauru. (2 Sam. 21:8, 9) Yirugana eyi ga rugene Ndafita kwa ya hagekesere po nzo zedipago ezi za kere mosirongo.

Yinzi sili natu vhura kulirongera ko kosihorokwa esi. Veta zaKarunga za zerere nawa-nawa. Azo kwa tente asi: “Vana nawo si nokuvakandwira si konomfa morwamausima govakurona vawo.” (Deut. 24:16) Jehova ngano kapi ga haferere eyi vana vavali vaSauru ntani novatekuru vendi vatano va va rugene nsene asi kapi va kere nounzoni. Veta kwa uyungire hena asi: “Muntu kumukandwira konomfa ntudi morwamausima gamwene ntani.” Ayo kumoneka asi vagara owo ntambali womoruvharo rwaSauru ava va dipagere kwa kwatesere ko Sauru mononkedi dimwe apa ga here kuzonagura po Vangibiyoni. Ngoyitundwamo, vagara owo ntambali kwa va futisire morwa yirugana yawo yoyidona.

Sihorokwa esi kulikida asi muntu kapi ta vhuru kulipopera mwene mokurugana udona pokugazara ndi pokuuyunga asi ame kuna kwama tupu mavyukiso. Sisewe simwe kwa tanta asi: “O gazare nawa eyi ono kurugana, makura nayinye eyi ngo rugana tayi kuretere uwa.”—Yis. 4:24-27; Efe. 5:15.