Avo mu nzaki-nzaki tutangidi lusansu lwalu, tulenda kukiyuvula e kiuvu kiaki. Kansi, lusansu lwalu wantu wole baswaswana luyikanga bena ye nkumbu Mefibosete. Tulenda longoka mayingi avo tufimpulwidi mana mavangama muna lusansu lwalu.

Saulu wa Ntinu, wana nsambwadi amakala ye wana wole amakento kakala yau. Mwan’andi antete i Yonatane. Kuna kwalanda, Saulu wawuta mwan’ayakala yo Resepa wa makangu mandi yo kumvana e nkumbu Mefibosete. Yonatane mpe wakala yo mwan’ayakala wakala ye nkumbu Mefibosete. Ozevo, Saulu wa Ntinu wakala yo mwana yo ntekelo bayikilwanga vo Mefibosete.

Ekolo kayalanga, Saulu wa Ntinu wayantika menga esi Ngibone yo vava kubafukisa. Nanga, ayingi muna yau bavondwa kikilu. E diambu diadi diambi kikilu diakala. Ekuma? Kadi muna lumbu ya Yosua, Aneyisaele bakanga e kangu dia luvuvamu ye esi Ngibone.—Yos. 9:3-27.

E kangu diadi diakwamanana yamuna lumbu ya Saulu wa Ntinu. Kana una vo i wau, Saulu wa Ntinu wakulula e kangu diadi yo vava fukisa esi Ngibone. Muna kuma kiaki, ‘nkanu a menga wakala muna Saulu ye nzo andi.’ (2 Sam. 21:1) Kuna kwalanda, Davidi wakituka se ntinu. Esi Ngibone bavovesa Davidi e diambu diadi diansoki bavangwa. Davidi wabayuvula dina difwete vangwa mu kuma kia diambu diadi diansoki dina Saulu kavanga kimana Yave kasambula e nsi a Isaele. Vana fulu kia lomba e nzimbu, esi Ngibone balomba vo bavewa o wana nsambwadi a muntu ‘ona wavava kubafukisa emvimba’ kimana bavondwa. (Nta. 35:30, 31) Davidi watonda e ndomb’au.—2 Sam. 21:2-6.

Muna kolo kiokio, Saulu yo Yonatane bayifwila muna vita. Kansi, Mefibosete wa mwan’a Yonatane moyo kakala. Sumbula kabwila vava kakala nsedia yo vanguka ye kayisia ko muna vangu diansoki dia nkak’andi dia fukisa esi Ngibone. Mu kuma kia kikundi kiakola kakala kiau yo Yonatane, Davidi wakanga e kangu ye mbongo a Yonatane kumosi ye Mefibosete wa mwan’andi. (1 Sam. 18:1; 20:42) O lusansu luyikanga vo: “O ntinu [Davidi] ovukisi Mefibosete wa mwan’a Yonatane wa mwan’a Saulu mu kuma kia ndofi badia Davidi yo Yonatane wa mwan’a Saulu vana vena Yave.”—2 Sam. 21:7.

Kana una vo i wau, Davidi watonda e ndomba ya esi Ngibone. Wavana wan’a wole a Saulu, mosi muna yau wayikilwanga vo Mefibosete ye atekelo tanu a Saulu. (2 Sam. 21:8, 9) Dina Davidi kavanga diafokola o nkanu a menga muna nsi.

Lusansu lwalu, ke mpasi lusansu ko. O nsiku a Nzambi watoma kiá. Wavovanga vo: “O wana mpe ke bafwete vondelwa mu dina mase mau bavangidi ko.” (Nsi. 24:16) Yave kadi tonda ko vo wan’a wole a Saulu ye atekelo andi tanu bavondwa kele vo minkondwa kuma kwau. O nsiku wakudikila vo: “O muntu kafwete vondelwa kaka muna sumu dia yandi kibeni.” Ozevo, wan’a wole a Saulu ye atekelo tanu ana bavondwa bakala muna buka kia awana bavava fukisa esi Ngibone. Muna kuma kiaki, yau nsambwadi bafuta muna sumu diau.

Lusansu lwalu lusonganga vo, o muntu kafwete vava vakuba ko mu kuma kia diambu diambi kavangidi yo yindula yovo vova vo luludiku kaka kalemvokele. Kafwete tá e mbalu muna mavangu mandi. Kingana kimosi kiangangu kivovanga vo: “Leleka nzil’a malu maku, e nzila zaku zawonso zisikila. Kuvengomoki kulunene ko ngatu kulumonso. Katula malu maku muna mambu mambi.”—Nga. 4:24-27; Efe. 5:15.