Bantu badi babala muyuki eu mu lupitapita mbadiele lukonko elu. Kadi mu kuamba kuimpe kudi bantu babidi bavua ne dîna dia Mefibosheta; nunku tuetu babalulule bualu buvua buenzeke tudi mua kumanya malu muvuawu.

Mukalenge Shaula wa mu Isalele uvua ne bana ba balume muanda mutekete ne ba bakaji babidi. Yonatana ke uvua muanende muanabute. Pashishe Lisepa mukaji uvua Shaula mubanjije wakamulelela muana wa balume diende Mefibosheta. Bualu budi bukoka ntema mbua ne: Yonatana uvua pende ne muanende wa balume diende Mefibosheta. Nunku mukalenge Shaula uvua ne muana wa balume diende Mefibosheta ne muikuluende uvua pende ne dîna dimue dimue edi.

Musangu kampanda mukalenge Shaula wakatuadija kukina bena Gibeona bavua basombe ne bena Isalele kupangadijaye bua kubashipa bonso. Bimueneka ne: bakashipa ba bungi ba kudibu. Tshivuaye muenze atshi tshivua tshibi, bualu mu tshikondo tshia Yoshua bamfumu ba mu Isalele bavua badie tshipungidi tshia ditalala ne bena Gibeona.​—Yosh. 9:3-27.

Tshipungidi atshi katshivua tshianji kufua to, too ne mu tshikondo tshia mukalenge Shaula. Kadi mukalenge wakapangadija yeye bua kubutula bena Gibeona kayi unemeka tshipungidi atshi to. Bualu abu buakabueja ‘Shaula ne ba mu nzubu wende mu dibanza dia mashi.’ (2 Sam. 21:1) Ndekelu wa bionso Davidi wakalua mukalenge. Bena Gibeona bavua bapanduke bakaya kuakula nende bua tshienzedi tshibi atshi. Davidi wakabebeja tshivuabu mua kuenza bua kubuikila mpekatu mubi menemene uvua Shaula muenze au, biobi kuambuluisha bua Yehowa alue kubenesha bena Isalele. Bena Gibeona kabakalomba makuta to, kadi bakalomba bua babapeshe bana ba balume muanda mutekete ba muntu uvua ‘muele meji a kubabutula’ au, bua babashipe. (Nom. 35:30, 31) Davidi wakitaba dilomba diabu adi.​—2 Sam. 21:2-6.

Tshikondo atshi Shaula ne Yonatana bakafua ku mvita, kadi Mefibosheta muana wa Yonatana uvua yeye ne muoyo. Wakashala utebuka bua njiwu ivuaye mupete ku buana buende, ne kavua yeye mubuelakane mu tshifufu tshia kakuende tshia kubutula bena Gibeona to. Davidi uvua mudie tshipungidi tshia bulunda ne Yonatana. Bivua mua kuambuluisha bua kukuba bana bende, kukuba ne Mefibosheta muana wa Yonatana. (1 Sam. 18:1; 20:42) Badi balonda mu Bible ne: “Mukalenge [Davidi] wakumvuila Mefibosheta muana wa Yonatana muana wa Shaula luse, bualu bua mutshipu uvua muenzeke kumpala kua Yehowa.”​—2 Sam. 21:7.

Nansha nanku Davidi wakenzela bena Gibeona tshivuabu bamulombe atshi. Wakafila bana ba Shaula babidi ba balume ne bikulu bende batanu, umue wa ku bana bende abu dîna diende divua Mefibosheta. (2 Sam. 21:8, 9) Tshivua Davidi muenze atshi tshiakafuta dibanza dia mashi divua mu bena Isalele.

Muaba eu kabena balonda anu bualu buvua buenzeke patupu to. Mikenji ya Nzambi ivua yamba patoke ne: “Kabena ne bua kushipa bana bua malu adi batatuabu benza to.” (Dut. 24:16) Yehowa kavua mua kuanyisha tshivuabu benzele bana ba balume babidi ba Shaula abu ne bikulu bende batanu abu bu bobu kabayi ne bualu buvuabu benze to. Mikenji ayi ivua yamba kabidi ne: “Badi ne bua kushipa muntu yonso anu bua mpekatu wende yeye nkayende.” Bidi bimueneka ne: bana ba Shaula ne bikulu bende bavuabu bashipe abu, bavua pabu babuelakane mu mushindu kampanda mu dipangadika dia Shaula dia kubutula bena Gibeona adi. Ke bua tshinyi bobu bonso muanda mutekete bakapeta difutu dia bubi buvuabu benze.

Muyuki eu udi uleja ne: muntu kena mua kudibingisha bua malu mabi adiye wenza, wela meji anyi wamba ne: uvua ulonda anu mêyi avuabu bamutumina to. Lusumuinu kampanda lua muena meji ludi luamba ne: “Ulandakaje njila wa makasa ebe, ne njila yebe yonso neyikale mijalame.”​—Nsu. 4:24-27; Ef. 5:15.