Antu amakwawu atañaña iyi nsañu, hiyayitiyishishañaku. Ilaña ashimunahu majina ayedi aMefibosheti, amayala ayedi ambuka, nawa tunateli kudizilaku kuyuma yamwekeni.

Mwanta Sawulu wawaIsarela wadiña nawanyana awamayala 7 niawambanda ayedi. Wedi waSawulu wadiña Yonatani. Chimwahitili mpinji mwanta wavweli mwana watuumbiliyi nindi Mefibosheti, wavwaliliyi mudi ntombu Rizipa. Yonatani niyena wavweli mwana nawa wamutuumbili nindi Mefibosheti. Dichi, Mwanta Sawulu wadiña namwana wejina daMefibosheti nimwijikulu wadiña nejina dodimu.

Mpinji yimu, Mwanta Sawulu wayibalumukililimu aGibeyoni ashakamineña nawaIsarela kulonda ayijilumuni ejima wawu. Hadaha ayijahili amavulu. Chadiña chuma chatama. Muloñadi? Muloña kunyima mumafuku aYoshuwa, akulumpi jawaIsarela akwatili chitiyañenu chakuwunda naweni Gibeyoni.—Yosh. 9:3-27.

Achina chitiyañenu chachidiña kuzatika nimumafuku aMwanta Sawulu. Mwanta wakeñeleña kujilumuna eniGibeyoni ejima hela chakwila kwadiña ichi chitiyañenu. Chumichi chamuletesheli “Sawulu niamwitala dindi [kwikala] namuloña wamashi.” (2 Sam. 21:1) Nkumininaku, Davidi wekalili mwanta. AGibeyoni apulukili amulejeli chuma chatama chayikoñeliwu. Davidi wayihwili chuma chakubuta hanshidi yasweja yakoñeliyi Sawulu hakwila nawu Yehova akiswili ituña. Chatela alombi mali, eniGibeyoni alombeli nawu anyana 7 kamuntu “wakasili kafuta kakukeña kutujiyisha” atwinkiwu nawa ayijahi. (Kuch. 35:30, 31) Davidi wayinkeliwu.—2 Sam. 21:2-6.

Haniyi mpinji, Sawulu niYonatani adiña afwa dehi kunjita, ilaña mwana kaYonatani Mefibosheti wachidiña wamumi. Wadiña chifwayi kufuma kuwansi windi muloña wamaposu nawa hadibombeli nankaka yindi kulukuka eniGibeyoniku. Davidi watiyañeni chitiyañenu chawubwambu naYonatani, chadi kukwasha anyanindi, kushilahu nimwana kaYonatani Mefibosheti. (1 Sam. 18:1; 20:42) Bayibolu yahosha nawu: “Mwanta [Davidi] wamutiyilili Mefibosheti wushona mwana kaYonatani mwana kaSawulu, muloña wakusanyika . . . kwasanyikiliwu kumesu aYehova.”—2 Sam. 21:7.

Hela chochu, Davidi watejeli chuma chalombeli eniGibeyoni. Wayinkeli anyana kaSawulu ayedi, hakachi kawu hadiña Mefibosheti, niejikulu aSawulu atanu. (2 Sam. 21:8, 9) Chuma cheliliyi Davidi chamanishili muloña wamashi mwituña.

Kudi yuma yayivulu yitunateli kudizila kuniyi nsañu. Nshimbi jaNzambi jahitili mumbadi wanyi. Yahosheli nawu: “Anyana niwena bayi ayijaha kukoola nshidi yawatata jawuku.” (Kuhit. 24:16) Yehova hadi kwiteja kujaha anyana kaSawulu ayedi niejikulwindi atanu neyi hiyadiña namuloñaku. Ayina nshimbi yabombelelihu nawu: “Muntu wejima atela kumujahila hohu hanshidi yindi yomweni.” Chinamwekani neyi anyana kaSawulu niejikulwindi afwili adibombelimu hampinji Sawulu yajilumwineñayi eniGibeyoni. Chafuminimu, awa 7 afwili kukola nshidi jawu.

Iyi nsañu yinakutudizisha nawu muntu hanateli kudiyiñisha yomweni kuhitila mukutoñojoka hela mukuhosha nindi wakoñeli chuma chatama muloña wakulondela wunlomboliku. Chishimu chamaana chahosha nawu: “Wahishaku njila mwakwenda nyendu yeyi, nawa njila jeyi jejima jakawaha.”—Yish. 4:24-27; Efwe. 5:15.