Antu yamwi aakabelenga ilyasi lii ukwaula ukwelenganyapo sana, yakauzya iuzyo lii. Lelo ilyasi lii likalanda pali vino vyacitikiile antu yaili aizina ilyakuti Mefibosyeti, nupya tungasambilila vimwi kuli vino vyacitike.

Umwene wa ina Izlaeli Saulo, wakweti ana aonsi 7 na akazyana yaili. Iiyeli lyakwe Saulo wali a Yonatani. Lyene pa cisila umwene Saulo wizile akwata umwana umonsi uwi zina lyakuti Mefibosyeti umu muci wakwe uwa pambali uwi zina lyakuti Lizipa. Nupya na Yonatani kwene wakweti umwana umonsi uwi zina lyakuti Mefibosyeti. Fwandi Saulo wakweti umwana uwi zina lyakuti Mefibosyeti nu mwizikulu uwi zina ilili limwi.

Pa nsita imwi Umwene Saulo wizile apata sana aina Gibyoni nupya walondanga ukuti yakomwe yonsi. Ni cacitike icakuti aingi yakomilwe. Cintu cii cifile sana. U mulandu ci? Pano umu manda yakwe Yoswa, intunguluzi zya ina Izlaeli zyapangine upangano wa mutende na ina Gibyoni.—Yoswa 9:3-27.

Upangano uwa waombanga nu mu nsita kwene ino Saulo wali umwene. Lelo ukupusanako ni vyali umu upangano, Saulo walondanga ukukoma aina Gibyoni yonsi. Cii calenzile ukuti Saulo na aa mu ng’anda yakwe yaye nu mulandu wa wazi. (2 Sam. 21:1) Lyene Devedi wizile aya umwene. Nupya aina Gibyoni aapuswike yamulondolwelile vino Saulo walondanga ukuyakoma yonsi sile. Devedi nawe wayuzizye pali vino wali nu kucita pa viipe vino Saulo wacisile pakuti Yeova apaale antu aali umu mpanga iya. Ukucila ukulenga impiya, aina Gibyoni yamunenyile ukuti ana aonsi 7 aamonsi ‘uwalondanga ukuyakoma’ yakomwe. (Mpe. 35:30, 31) Fwandi Devedi wacisile vino yamunenyile.—2 Sam. 21:2-6.

Pa nsita iya ala Saulo na Yonatani yafwa, lelo Mefibosyeti umwana wakwe Yonatani ala acili nu umi. Walemiile ala acili umwance, nupya wene atakomileko aina Gibyoni pamwi na isikulu Saulo. Devedi wapangiine upangano uwa kutwalilila ukuya ivyuza na Yonatani, nupya upangano uwo wali nu kulenga ukuti vintu vizipile ana yakwe kumwi na Mefibosyeti umwana wakwe Yonatani. (1 Sam. 18:1; 20:42) Baibo ikati: “Pa mulandu wa ulayo uno wene yalaine na Yonatani, pa manso yakwe Yawe, wene atakomile Mefibosyeti umwana wakwe Yonatani, nupya umwizikulu wakwe Saulo.”—2 Sam. 21:7.

Lelo Devedi wacisile vino aina Gibyoni yamunenyile. Wazumilizye ukuti ana aonsi yaili yakwe Saulo, apali na Mefibosyeti, alino na aizikulu yakwe Saulo 5 yakomwe. (2 Sam. 21:8, 9) Vino Devedi wacisile vyalenzile ukuti umulandu wa wazi uno Saulo wacisile, usile.

Kwaya ivingi vino tungasambilila ukwi lyasi lii. Leza wisileko isunde lya kulungatika ilyakuti: “Ana nayo yatalinzile ukukomwa pa mulandu wa nkota zya akwasi yao.” (Malan. 24:16) Yeova nga atazumilizye ukuti ana yakwe Saulo yaili na aizikulu yakwe 5 yakomwe nga yatakweti umulandu. Nupya isunde lili lyalanzile nu kuti: “Cila muntu alinzile ukukomwa pa nkota zyakwe.” Cikaloleka kwati antu yaya 7 aa mu lupwa lwakwe Saulo akomilwe, yatungilileko Saulo lino walondanga ukukoma ina Gibyoni yonsi. Fwandi antu yaya 7 yakomilwe pa mulandu ni viipe vino yacisile.

Ilyasi lii likatulangilila ukuti ndi cakuti umuntu wacita iviipe pa mulandu wakuti yamwi iyamunena sile ukucita vivyo ala cisikupiliula ukuti atakweti umulandu. Ipinda limwi likati: “Leka inzila yako iye itambalale, na pali ponsi pano ukupita paye apakome ndii.”—Mapi. 4:24-27; Efes. 5:15.