Anyinji amene oŵelenga nkhani iyi mofulumila, ezikonshapo kale konsho yoteti. Koma mavesi aŵa ofotokoza za analume aŵili amene onse enze na zina yolingana yakuti Mefiboseti. Kuti timvwishishe nkhani iyi, tiyeni tilaŵizhyane zecitika noona zatingaphunzilepo.

Mfumu Sauli wa ku Isiraeli, enze na ŵana analume 7 na ŵana anakazi aŵili. Mwana wake woyamba kuvyalika enze Yonatani. M’kuluta kwa nthawi, Sauli evyala mwana munalume kufumila kwa Rizipa wamene enze kapolo wake munakazi. Mwana uyu em’pasa zina yakuti Mefiboseti. Zocitisha cidwi n’zakuti naye Yonatani enze na mwana munalume wa zina yakuti Mefiboseti. Tetyo, Mfumu Sauli enze na mwana wa zina yakuti Mefiboseti na mzukulu wa zina imozimozi.

Pa nthawi iyakine, Mfumu Sauli eyamba kuzonda Agibeoni amene enzonkhala pakati pa Aisiraeli, ndipo enzofuna kuŵapaya onse. Ndipo cuoneka kuti anyinji epaiwa. Kucita izi, kwenze kulakwa ngako. Ndaŵa yanji? N’cifukwa cakuti m’nthawi ya Yoswa, akulu-akulu a mu Isiraeli epangana pangano yamtendele na Agibeoni.—Yos. 9:3-27.

Pangano iyi, yenze ikalukata nchito olo m’nthawi ya Mfumu Sauli. M’malo mocita zinthu mokatizhyana na pangano iyi, Sauli eyamba kupaya Agibeoni ndipo enze na colinga cakuti aŵasilizhyiletu onse. Izi zecitisha kuti ‘Sauli na onse a m’ng’anda yake ankhale na mlandu wa milopa.’ (2 Sam. 21:1) M’kuluta kwa nthawi, Davide eyamba kulamulila monga mfumu. Agibeoni amene epulumuka, em’fotokozela colakwa cecicita Sauli. Davide eŵasenga kuti amuuzhye zaangaŵacitile kuti alipile mlandu wecicita Sauli, kuti Yehova adalise calo cao. M’malo molaŵila kuti aŵapase ndalama, Agibeoni esenga kuti ŵana 7 ŵa munthu wamene ‘ekonza ciwembu cakuti aŵaononge,’ apaiwe. (Num. 35:30, 31) Davide ecimvwa pempho yao.—2 Sam. 21:2-6.

Pa nthawi iyi n’kuti Sauli na Yonatani apaiwa ku nkhondo, koma Mefiboseti mwana wa Yonatani enze akali moyo. Yove enze wolemala mendo cifukwa ca ngozi yecitika peenze akali mtontho. Ndipo aliyotoleko mbali pa ciwembu coukila Agibeoni ceenze ekonza asikulu ŵake. Davide enze epanga pangano ya ushamwali na Yonatani, yamene yenzopindulisha mbadwa zake kuyangizhyilapo mwana wake Mefiboseti. (1 Sam. 18:1; 20:42) Baibo yulaŵila kuti: “Mfumu Davide eonesha cifundo kuli Mefiboseti mwana munalume wa Yonatani wamene enze mwana wa Sauli, cifukwa ca lumbilo yecipanga pamenso pa Yehova.”—2 Sam. 21:7.

Olo n’tetyo, Davide ecimvwa pempho ya Agibeoni. Ndipo eŵapasa ŵana aŵili a Sauli na azukulu ŵake 5. M’mozi mwa ŵana a Sauli enze Mefiboseti. (2 Sam. 21:8, 9) Zecicita Davide zecitisha kuti calo ca Aisiraeli cisankhale soti na mlandu wa milopa.

Nkhani iyi, yutiphunzisa mfundo iyakine yokhuza Yehova. Malamulo a Mulungu yenze yelaŵililatu mosapita m’mbali kuti: “Ŵana ofunika lini kupaiwa cifukwa ca macimo ya ausuwao.” (Deut. 24:16) Yehova sembe aliyolole kuti ŵana aŵili a Sauli na azukulu ŵake 5 apaiwe ngati kuti enzeve mlandu. Cilamulo cepitilizhya kulaŵila kuti: “Munthu ofunika tyala kupaiwa cifukwa ca cimo yake.” Cuoneka kuti ŵana aŵili aŵa a Sauli na azukulu ŵake 5, etolako mbali pa ciwembu copaya Agibeoni. Tetyo, epaiwa cifukwa ca macimo ŵao.

Nkhani iyi, yutiphunzisa kuti ngati munthu wacita cimo, angapewe lini cilango cake mwa kuganiza olo kulaŵila kuti nenzokonkhelezhya tyala ŵanthu ayakine. Mwambi uyakine ulaŵila kuti: “Salazhya njila ya mendo ŵako, ndipo njila zako zonse zinkhale zosimikizhyilika.”—Miy. 4:24-27; Aef. 5:15.