Bamo aba bikubelenga mwakubopela inkhani iyi balalusisyemo ilalusyo bo ili. Loli amavesi agha ghikuyoba isya bandu babili abakukindana loli bosa ingamu syabo bali bo ba Mefibosheti kangi tubaghile ukumanyilako simo mwakuketa kangi isi syabombiwe.

Umwalafyale Sauli wa ku Israeli ali na bana 7 abanyambala na balindwana babili. Umwana unnyambala uwakwanda wa Sauli ali yo Yonatani. Ukufuma apo ali numwana uyu ingamu yake ali yo Mefibosheti, uyu alimpapile mwa Rizipa unkikulu wa mbutitu. Syakuhobosya ukuti Yonatani yope ali numwana uyu ali yo Mefibosheti ingamu. Umwalafyale Sauli ali nu mwana unnyambala uyu ingamu yake ali yo Mefibosheti kangi numwisukulu wake uyu yope ali ni ngamu iyakufwana itolo.

Umwalafyale Sauli alyandile ukubabenga Abagibeoni kangi alondagha ukuti bosa baghoghiwe. Ukubomba isi kwali kubibi fiyo. Nongwa yafiki? Panongwa yakuti nkabalilo ka Yoswa, Abaisraeli bapangile ulufingo ukuti baye palutengano na Bagibeoni.​—Yos. 9:3-27.

Ulufingo ulu lwakindilile ukubomba imbombo nkabalilo ka Mwalafyale Sauli. Mwakukindana nulufingo ulu lwalipo, umwalafyale alondagha ukubaghogha Abagibeoni. Isi syapangisye ukuti ‘Sauli na ba nnyumba yake baye ninongwa iyakona ilopa.’ (2 Samu. 21:1) Pabumalilo, Davidi ali mwalafyale. Abagibeoni aba baponile bayobesenie nawe isyakufwana na bandu aba baghoghiwe. Davidi abalalusisye abene muno bayagha pakubombela ukufwana na isi Sauli abombile kangi isi syapangisye ukuti Yehova abasaye. M’malo mwakulalusya isya ndalama, Abagibeoni basumile abana 7 abanyambala aba mundu uyu “alondagha ukubaghogha” kisita kundekapo nayumo. (Kuba. 35:30, 31) Davidi alitikisye isi basumile.​—2 Samu. 21:2-6.

Pakabalilo kala, Sauli na Yonatani bafwile ku bwite, loli umwana unnyambala wa Yonatani, Mefibosheti, akafwile. Umwene balindekile panongwa yakuti ali nikilema kangi akalyeghilepo ikighaba pa kulwa na Bagibeoni. Davidi afingile ukuya pabumanyani na Yonatani, isi syayagha pakusaya abanduyungu lwabo ukongelelapo umwana wa Yonatani, Mefibosheti. (1 Samu. 18:1; 20:42) Inkhani iyi yikuti: ‘Umwalafyale [Davidi] alinkunnangisya ikisa Mefibosheti, umwana wa Yonatani umwisukulu wa Sauli, panongwa ya luyigho ulu Davidi na Yonatani bayighanike nkyeni mwa Yehova.’​—2 Samu. 21:7.

Loli Davidi akindilile ukughindika isi Abagibeoni basumile. Umwene ababikile mmaboko gha bana abanyambala babili aba Sauli, yumo ali yo Mefibosheti kangi 5 bali bisukulu ba Sauli. (2 Samu. 21:8, 9) Isi Davidi asalile ukubomba syapangisye ukuti aleke ukuya ninongwa iyakona ilopa.

Inkhani iyi yabombiwe naloli. Ululaghilo lwa Kyala lwali lwakupilikiwa kanunu. Lwatighi: “Abana bangaghoghiwagha panongwa ya bisabo.” (Kukumbu. 24:16) Yehova akayagha pakwitikisya isi ukuti sibombiwe ku bana abanyambala ba Sauli na kubisukulu bake 5 linga bali basitanongwa. Ululaghilo ulu longelelangapo ukuti: “Umundu wesa yo fikuti aghoghiweghe panongwa iyi yake yuyo.” Sikuboneka ukuti abanduyungu 7 ba Sauli aba bafwile babaghile ukuti balyeghilepo ikighaba pa isi Sauli abombile ukuti Abagibeoni baghoghiwe. Ifyakukongapo fyake, abandu 7 aba balyambilile ulufundo panongwa ya mbibi syabo.

Inkhani iyi yikunangisya ukuti umundu akabaghila ukwihobokela mwene panongwa yakubomba ifindu ifibibi mwakwinong’ona pamo ukuyoba ukuti aghelaghelagha ukukonga indaghilo. Ifundo yimo iya mu Baibolo yikuti: “Uketeghe bununu injila iyi kwendamo, po lelo ulwendo lwako lutisakusukanikagha.”​—Mbu. 4:24-27; Ef. 5:15.