Menli bie mɔ mɔɔ kenga edwɛkɛ ɛhye ndɛndɛ la ɛbiza kpuya ɛhye. Noko mrenyia nwiɔ mɔɔ bɛfɛlɛ bɛ Mɛfebɔhyɛte la a bɛhanle bɛ nwo edwɛkɛ wɔ ngyehyɛnu ɛhye mɔ anu a, na saa yɛsuzu mɔɔ zile la anwo a, yɛbahola yɛazukoa debie yɛavi nu.

Yizilayɛ belemgbunli Sɔɔlo wole mrenyia nsuu yɛɛ mraalɛ nwiɔ. Sɔɔlo ara kpanyinli a le Dwɔnatan. Nzinlii, belemgbunli ne nee ye nwewe Relezepa wole ralɛ nrenyia mɔɔ bɛfɛlɛ ye Mɛfebɔhyɛte. Yɛɛ Dwɔnatan noko wole ɔ ra nrenyia mɔɔ bɛfɛlɛ ye Mɛfebɔhyɛte. Ɔti ɛnee Belemgbunli Sɔɔlo lɛ ɔ ra mɔɔ bɛfɛlɛ ye Mɛfebɔhyɛte yɛɛ ye anlɔnra mɔɔ bɛfɛlɛ ɔdaye noko Mɛfebɔhyɛte a.

Mekɛ bie, Belemgbunli Sɔɔlo dwazole Gebɛyɔnoma mɔɔ de Yizilayɛma avinli la anwo zo na ɔbɔle mɔdenle kɛ ɔbɔ bɛ bo zo. Ɔbayɛ kɛ bɛhunle bɛ nuhua dɔɔnwo kpalɛ. Ɛhye ɛnle kpalɛ fee. Duzu ati ɔ? Ɔluakɛ ɛnee Yizilayɛ mgbanyima nee Gebɛyɔnoma ɛyɛ anzodwolɛ ngyekyeleɛ wɔ Dwɔhyua mekɛ zo.​—Dwɔh. 9:3-27.

Na ɛnee ngyekyeleɛ zɔhane tɛbɔ ɛkɛ wɔ Belemgbunli Sɔɔlo mekɛ zo. Belemgbunli ne anli ngyekyeleɛ ne azo na ɔbɔle mɔdenle kɛ ɔbɔ Gebɛyɔnoma abo zo. Ɛhye maanle “Sɔɔlo nee ye abusua ne [lile] mogya nwo fɔlɛ.” (2 Sa. 21:1) Akee Devidi rayɛle belemgbunli. Gebɛyɔnoma mɔɔ ɛnee tɛte aze la hanle ɛtane kpole zɔhane anwo edwɛkɛ hilele ye. Devidi bizale bɛ mɔɔ ɔwɔ kɛ bɛyɛ bɛkpɔda ɛtane kpole mɔɔ Sɔɔlo yɛle la amaa Gyihova ayila azɛlɛ ne la. Gebɛyɔnoma ne anga kɛ bɛkpondɛ ezukoa, emomu bɛhanle kɛ bɛva ahenle mɔɔ “ɔbɔle kpɔkɛ kɛ ɔbɔ [bɛ] bo zo” la amra mrenyia nsuu bɛrɛla bɛmaa bɛhu bɛ. (Nɔm. 35:30, 31) Devidi liele bɛ edwɛkɛ ne dole nu.​—2 Sa. 21:2-6.

Mekɛ zɔhane, ɛnee Sɔɔlo nee Dwɔnatan ɛwu wɔ konle nu, noko ɛnee Dwɔnatan ara Mɛfebɔhyɛte tɛte aze. Mɔɔ ɔle kakula la, esiane bie dole ye maanle ɔyɛle abubura, na ɛnee ɔmboka ye nenyia anwo a bɛhɔhunle Gebɛyɔnoma ne a. Ɛnee Devidi nee Dwɔnatan ɛyɛ agɔnwolɛvalɛ ngyekyeleɛ, na ɛnee Dwɔnatan abozoamra mɔɔ ɔ ra Mɛfebɔhyɛte boka nwolɛ la banyia zolɛ nvasoɛ. (1 Sa. 18:1; 20:42) Baebolo ne ka kɛ: “Belemgbunli ne [Devidi] zele Sɔɔlo ara Dwɔnatan ara Mɛfebɔhyɛte anwunvɔne, ɔlua ndane ne mɔɔ Devidi nee Sɔɔlo ara Dwɔnatan hanle ye wɔ Gyihova anyunlu la ati.”​—2 Sa. 21:7.

Noko Devidi yɛle mɔɔ Gebɛyɔnoma ne hanle la. Ɔvale Sɔɔlo amra mrenyia nwiɔ, bɛfɛlɛ ko Mɛfebɔhyɛte, yɛɛ ye nlɔnra nnu ɔmaanle bɛ. (2 Sa. 21:8, 9) Mɔɔ Devidi yɛle la yele mogya nwo fɔlɛlilɛ ne vile azɛlɛ ne azo.

Edwɛkɛ ɛhye ɛnle tetedwɛkɛ bie ala. Ɛnee Nyamenle mɛla ne anu la ɛkɛ. Ɔse: “Ɔnle kɛ bɛku ngakula wɔ mɔɔ bɛ papa mɔ kɛyɛ la anwo.” (Dit. 24:16) Saa Sɔɔlo amra nwiɔ ne nee ye nlɔnra nnu ne anwo ɛnle edwɛkɛ ne anu a, anrɛɛ Gyihova ɛnrɛmaa bɛnrɛhu bɛ. Mɛla zɔhane vale zɔle zo kɛ: “Ɔwɔ kɛ bɛku awie wɔ ɔdaye mumua ne ye ɛtane ti.” Ɔbayɛ kɛ ɛnee Sɔɔlo abozoamra nsuu ne mɔɔ wule la boka Sɔɔlo anwo a bɛbɔle mɔdenle kɛ bɛbɔ Gebɛyɔnoma ne abo zo a. Ɛhye ati menli nsuu ne duale ɛtane mɔɔ bɛyɛle la anwo kakɛ.

Edwɛkɛ ɛhye maa yɛnwu kɛ saa awie yɛ ɛtane a, ɔnle kɛ ɔnyia adwenle kɛ anzɛɛ ɔka kɛ adehilelɛ mɔɔ bɛvale bɛmaanle ye la ala a ɔlɛdi zo a. Bɛbu ɛrɛlɛ bie kɛ: “Maa ɛ gyakɛ abo adenle ɛyɛ sɛsɛ, na wɔ ndenle kɔsɔɔti bawie boɛ.”​—Mrɛ. 4:24-27; Ɛfɛ. 5:15.