Öraga chaynochi pipis tapucunman cay textucunata shumaj mana tantiarcur leiptenga. Pero Bibliaga wilacun ishcay runacuna Mefibóset jutiyoj cashgantami. Y paycunata ima pasashganta tantiarcurga, juc shumaj yachachicuyta yachacunchimi.

Rey Saulpaga ganchis olgu wamrancuna cargan y ishcay warmi wamrancunapis. Guechpa cajga Jonatanmi cargan. Rizpá concubinanchopis juc wamrata tarergan, Mefibóset jutiyoj. Y Jonatanpa wamranpis Mefibóset jutiyoj cargan. Chauraga Saulpa juc wamran y juc wilcanpis Mefibóset jutiyojmi cargan.

¿Imanirtaj Davidga waquin runacunata entregaycurgan gabaonitacuna wanuchinanpaj? Israelitacuna gabaonitacunawan tiyashganta ricar, rey Saulga paycunata chiquir ushacächiyta munargan. Waquincunata wanuchirganchi, ichanga chayga mana alimi caycargan. Josué cawashgan wichan israelitacunaga gabaonitacunawan juc pactuta rurashga cargan jaucala cawapäcunanpaj (Jos. 9:3-27).

Pero Saulga chay pactuta cäsucurganchu, chaymi pay y familianpis gabaonitacunata wanuchishganpita juchayoj caycargan (2 Sam. 21:1). Chaura David rey caycaptin gabaonitacuna wilapargan castancunata ima pasashganta. Davidnami tapurgan castancunata wanuchishganpita imanotaj pagananpaj, chaynopa Jehová bendicinanpaj. Gabaonitacunaga nipäcurgan Saulpita mirajta ganchista entregananpaj (Núm. 35:30, 31). Chaura Davidga paycuna mañacushgantami rurargan (2 Sam. 21:2-6).

Chay wichanpäga Saulwan Jonatanga wanushgana caycargan. Pero Jonatanpa wamran Mefibosetga cawaycarganrämi. Ichanga wamralaraj caycar ishquishganpita wegru ricacurgan. Chaura payga manami yanapacurganchu gabaonitacunata wanuchinanpaj. Y Davidga amigun Jonatanwanmi juc pactuta rurashga cargan paypa miraynincunata yanapänanpaj (1 Sam. 18:1; 20:42). Bibliaga cayno wilacun Davidpita: “TAYTA DIOSPA jutincho auninacur Jonatanwan parlacushanta cumlirmi Gabaón runacuna wañuchinanpaj Mefi-boset-ta David entregayta mana munaranchu. Mefi-bosetga caran Saulpa willcanmi” (2 Sam. 21:7).

Chayno captinpis, Davidga gabaonitacuna mañacushgantami goycurgan. Chaymi Saulpa ishcay wamrancunata, jucnin caj Mefibóset jutiyoj, y pichga wilcancunatapis entregaycurgan (2 Sam. 21:8, 9). Chaynopa Davidga Saúl rurashganta alchargan y israelcho muchuy cargannachu.

¿Imataj caypita yachacunchi? Saulpa ishcay wamrancuna y pichga wilcancuna gabaonitacunata wanuchishganpita juchayoj mana captenga, Jehová manami aprobanmanchu cargan David paycunata entregaycunanpaj. Diospa leyninchoga niycargan taytancunapa culpanraycur wamrancunaga mana wanunmanchu. Jina leypis nergan: “Pipis juchata ruraj cajmi juchanpita wañuchisha canga” (Deut. 24:16). Chaura paycunata David entregaycuptenga, tantiachimanchi Saulpa ganchis miraynincunaga imanolapapis yanapacurganchi gabaonitacunata wanuchinanpaj, chaymi paycuna wanuchishga cargan.

¿Ima mastataj caypita yachacunchi? Lapanchimi rurayninchicunapita cuentata goshun. Pipis mana alita ruraptenga ninmanchu: “Nogaga pay nimashgantami rurashcä” nir. Chaypa trucanga cay shumaj consejutami cäsucunanchi, Bibliaga nin: “Mayman japaycashayquitapis sumaj ricay. Alliman japarga manami tuninquipächu. Alli caminupa puriycashayquipitaga janaman ni uramanpis ama yaycunquichu. Mana allicunataga ama ruraychu” (Prov. 4:24-27; Efes. 5:15).