E maata te aronga tei ui i teia uianga te tatau anga ratou i teia tua. Inara e rua ïa tangata i konei ko Mephiboseta te ingoa, e ka kite tatou i te reira me akara tatou eaa tei tupu.

Te Ariki ko Saula, e itu ana tamariki tamaroa e rua tamaine. Ko Ionatana te tama mua. Muri ake, kua anau mai te tavini vaine a Saula ko Rizepa i te tamaiti a te ariki ko Mephiboseta. Pera katoa kua tapaia te ingoa o te tamaiti a Ionatana e ko Mephiboseta. No reira, kua aiteite te ingoa o te tamaiti a te Ariki ko Saula e te ingoa o tana utaro.

I tetai atianga, kua makitakita te Ariki ko Saula i te iti tangata Gibeona e noo ra i Iseraela e kua tauta aia i te takore takiri ia ratou. E maata tei tamateia. E tarevake tikai teia. Eaa te tumu? No te mea i to Iosua tuatau, kua papau te au ui mataiapo o Iseraela i tetai koreromotu ’au ki to Gibeona.—Iosu. 9:3-27.

Te mana ra rai teia koreromotu i te tuatau o te Ariki ko Saula. Noatu te reira, kua tauta rai te ariki i te takore i te iti tangata Gibeona. No ta “Saula, e tona ngutuare ta tangata” i rave, kua tupu te kino i Iseraela. (2 Samu. 21:1) Te riro anga a Davida ei ariki, kua tuatua te toenga o te iti tangata Gibeona kiaia no teia tarevake kino. Kua ui a Davida eaa tana ka rave kia rauka te tapokiangaara no ta Saula i rave, e kia akameitaki akaou a Iehova i te enua. Kare ratou i pati ana i tetai moni, mari ra kia tukuia e na ratou e tamate i te au tamariki tamaroa e itu a te tangata “tei kimi ia [ratou] kia pou rava.” (Nume. 35:30, 31) Kua akatika a Davida i ta ratou patianga.—2 Samu. 21:2-6.

I teia atianga, kua mate a Saula e Ionatana i roto i te tamaki, inara te ora ra rai te tamaiti a Ionatana ko Mephiboseta. Kua pirikokiia tona vaevae mei tona tamariki anga e kare aia i piri ana ki te tamate anga i to Gibeona. Kua papau a Davida e Ionatana i tetai koreromotu pirianga oa te ka puapingaia ta raua uanga, kapiti mai te tamaiti a Ionatana ko Mephiboseta. (1 Samu. 18:1; 20:42) Karanga te Pipiria: “Kareka ko Mephiboseta, te tamaiti a Ionatana, te tamaiti a Saula ra, i vaooia ïa e te ariki; no te taputou a Davida ia Ionatana te tamaiti a Saula ia Iehova ra.”—2 Samu. 21:7.

Noatu ra, kua akatika a Davida ki te patianga a to Gibeona. Kua tuku atu aia kia ratou te nga tamariki tamaroa a Saula, ko Mephiboseta te ingoa o tetai, e te tamariki tamaroa toko rima a te tamaine a Saula. (2 Samu. 21:8, 9) Riro ta Davida i rave i te takore i te kino tei tupu i Iseraela.

E apiianga tetai mei teia tupuanga. Taka ua te ture a te Atua. Karanga ra: “Auraka katoa te tamariki kia mate ei tutaki i [ta] te ai metua” i rave. (Deu. 24:16) Kare a Iehova e mareka i te ka raveia ki te nga tamariki e rua e te utaro tamaroa e rima a Saula me kare ratou i rave ana i te kino. Akakite katoa te ture: “Ka mate ra te tangata ravarai i tana uaorai ara.” Te akaraanga, kua piri atu teia au tamariki e itu na Saula ki te tamate anga i te iti tangata Gibeona. No reira, kua tutaki ratou i ta ratou uaorai ara.

Te akaari maira teia tua e kare e rauka i tetai tangata kia manako, me kore kia karanga e kua rave aia i te kino no te mea te aru ra aia i te au akaueanga. Akakite te maseli: “E akamaara meitaki i te arataa o to vaevae, e e akatinamouia toou katoa ra au aerenga.”—Mase. 4:24-27; Ephe. 5:15.