Nesave so sigate čitingje akava izveštaj šaj pučle pe akava pučiba. Ama ko akala stihija isi duj različna murša kolen so isi len o isto anav. Hem amen šaj te sikljova nešto džikote dikhaja akava izveštaj.

E Izraelsko care e Saule sine le efta murša hem duj čhaja. E Sauleskoro prvo čhavo sine o Jonatan. Palo nesavo vreme leskiri naložnica i Risfa bijangja čhavo kova so vikinela pe sine Mefivostej. Interesno tano kaj e Jonatane sine le čhavo kova so isto agjaar vikinela pe sine Mefivostej. Znači, e Saule sine le čhavo kova so vikinela pe sine Mefivostej hem unuko kova so phiravela sine o isto anav.

O cari o Saul počmingja te mrzinel e Gavaoncon kola so živinena sine maškar o Izraelcija, hem manglja te mudarel len. Verojatno bute dženen lendar mudargja. Adaja sine jekh bari greška. Soske? Ko e Isus Navineskoro vreme o Izraelska poglavarija kergje sojuz e Gavaonconcar kaj ka ačhoven lencar ko mir (Is. Nav. 9:3-27).

Keda o Saul sine cari adava sojuz panda važinela sine. Ama, namesto te ikerel pe ko adava sojuz, o cari manglja te mudarel sa e Gavaoncon. Adava kergja „o Saul hem leskoro kher te oven kriva bašo rat“ (2. Sam. 21:1). Pokasno o David ulo cari. O Gavaoncija kola so preživingje vakergje leske bašo adava so slučingja pe. O David pučlja len sar šaj te popravinel o lošnipe so kergja o Saul te šaj o Jehova te del bereketi e phuvjake. Namesto te roden pare, o Gavaoncija rodingje te predajnel lenge efta taro e Sauleskere čhave te šaj te mudaren len (4. Moj. 35:30, 31). O David kergja adava so rodingje lestar (2. Sam. 21:2-6).

Ko adava vreme, o Saul hem leskoro čhavo o Jonatan sine više mule. Ama e Jonataneskoro čhavo, o Mefivostej, sine dživdo. Adaleske so sine sakati panda taro tiknipe, ov na gelo pe papoja te napadinel e Gavaoncon. O David kergja sojuz bašo amalipe e Jonatanea, kova so sine korisno leskere potomstvoske maškar kolende so sine e Jonataneskoro čhavo, o Mefivostej (1. Sam. 18:1; 20:42). Ko izveštaj pišinela: „O cari žalingja e Mefivostee, e Jonataneskere čhave, e Sauleskere unuko, soske dengje sovli anglo Jehova“ (2. Sam. 21:7).

O David kergja adava so rodingje lestar o Gavaoncija. Dengja lenge duj taro e Sauleskere čhaven, kolendar so jekh vikinela pe sine Mefivostej, hem pandž taro e Sauleskere unukon (2. Sam. 21:8, 9). Adaleske so o David šungja lengiri molba, i phuv na sine više krivo bašo rat.

Akava izveštaj na sine samo delo tari istorija, nego šaj hem te sikljova nešto lestar. E Devleskoro zakoni sine jasno, athe pišinela: „O čhave ma te oven mudarde bašo adava so kergje lengere dada“ (5. Moj. 24:16). O Jehova na bi prifatinela sine te oven mudarde e Sauleskere duj čhave hem leskere pandž unukija ako ola na bi ovena sine kriva. Ko adava zakoni isto agjaar pišinela: „Sekova jekh valjani te ovel mudardo samo bašo ple grevija“. Najverojatno, leskere efta potomcija učestvujngje ko e Sauleskoro plani te oven mudarde o Gavaoncija. Hem adaleske adala efta džene sine kaznime bašo pumaro grevo.

Taro akava izveštaj sikljovaja kaj nikoj našti te opravdinel ple pogrešna postapke, agjaar so ka mislinel ili ka vakerel kaj ov samo šunela sine nekaskere upatstvija. Jekh mudro izreka vakerela: „Ispravin o drumo kote so phirea hem sa tle drumija ka oven sigurna“ (Izr. 4:24-27; Ef. 5:15).