Labanye nabafundza lendzaba bayatibuta lombuto. Kodvwa kulamavesi kukhulunywa ngaboMefiboshethi lababili labehlukene futsi singafundza lokutsite kuloko lokwenteka.

INkhosi Sawula yaka-Israyeli beyinemadvodzana langu-7 nemadvodzakati lamabili. Indvodzana yayo yekucala bekunguJonathani. Ngekuhamba kwesikhatsi, lenkhosi yaba nalenye indvodzana lokutsiwa nguMefiboshethi leyayitalelwa nguRispha umfati wayo lomncane. Ngetulu kwaloko, naJonathani waba nendvodzana lokutsiwa nguMefiboshethi. Ngako iNkhosi Sawula beyinendvodzana lokutsiwa nguMefiboshethi nemtukulu lokutsiwa nguMefiboshethi.

INkhosi Sawula yabese iyawajikela emaGibeyoni lebekahlala ka-Israyeli futsi yetama kuwacotfula onkhe. Kubonakala ngatsi manyenti labulawa. Leyo bekuyintfo lembi. Sisho ngani? Ngobe ngemalanga aJoshuwa, baholi besive sema-Israyeli benta sivumelwane sekuthula nemaGibeyoni.—Josh. 9:3-27.

Lesivumelwane besisasebenta ngemalanga eNkhosi Sawula. Ngesikhatsi inkhosi yetama kucotfula emaGibeyoni, yenta ngalokuphambene nalesivumelwane. Ngenca yaloko, ‘Sawula nendlu yakhe baba nelicala lengati.’ (2 Sam. 21:1) Ngekuhamba kwesikhatsi, Davide wabese uba yinkhosi. EmaGibeyoni lasala akhuluma naye ngalelicala belentiwe. Davide wawabuta kutsi yini langayenta kute akhe kuthula nawo ngenca yaloku bekwentiwe nguSawula futsi kuze Jehova alibusise lelive. Kunekutsi emaGibeyoni acele imali, acela kunikwa emadvodzana langu-7 alendvodza ‘lebeyihlele kuwacotfula’ kuze awabulale. (Num. 35:30, 31) Davide wenta njengobe bekacelile.—2 Sam. 21:2-6.

Ngaleso sikhatsi, boSawula naJonathani besebafile kodvwa indvodzana yaJonathani lenguMefiboshethi beyisaphila. Beyikhubatekile ngobe yatfola ingoti iseyincane futsi ayizange imsekele mkhulu wayo ngesikhatsi ahlasela emaGibeyoni. Davide bekente sivumelwane naJonathani lebesitawusita nentalelwane yakhe, lokufaka ekhatsi indvodzana yaJonathani lokutsiwa nguMefiboshethi. (1 Sam. 18:1; 20:42) Lendzaba itsi: “Inkhosi yaba neluvelo kuMefiboshethi, indvodzana yaJonathani loyindvodzana yaSawula, ngenca yesifungo lebesentiwe nguDavide naJonathani . . . embikwaJehova.”—2 Sam. 21:7.

Nobe kunjalo, Davide wenta njengobe emaGibeyoni bekacelile. Wawanika emadvodzana aSawula lamabili, yinye yawo bekutsiwa nguMefiboshethi kanye nebatukulu baSawula labasihlanu. (2 Sam. 21:8, 9) Loko Davide lakwenta kwacedza licala lengati lebelentiwe kulelive.

Lendzaba ayisiwo nje umlandvo longasho lutfo. Umtsetfo waNkulunkulu bewucacile. Bewutsi: “Bantfwana akukafaneli babulawelwe loko lokwentiwe bobabe babo.” (Dut. 24:16) Jehova bekangeke akuvumele kwenteke loko lokwenteka emadvodzaneni aSawula lamabili nakubatukulu bakhe labasihlanu kube bebete licala. Lomtsetfo bewuchubeka utsi: “Umuntfu kufanele afele sono sakhe kuphela.” Kubonakala ngatsi lamadvodzana aSawula nebatukulu bakhe bebasifakile sandla kulokubulawa kwemaGibeyoni. Ngenca yaloko, bafela tono tabo.

Lendzaba iyasikhombisa kutsi umuntfu ute sizatfu sekwenta lokubi ngobe nje atitjela kutsi bekamane alandzela sicondziso. Lesinye saga lesihlakaniphile sitsi: “Lungisa indlela lotawuhamba kuyo, futsi kute lokutakugila kuto tonkhe tindlela takho.”—Taga 4:24-27; Ef. 5:15.