Bamwi ibacibala cakufwambaana cibalo eeci bakalibuzya kale mubuzyo ooyu. Pele makani aaya ajatikizya baalumi bobilo ibakaulikidwe zina eeli lyakuti Mefiboseti, alimwi tulabona ncotukonzya kwiiya kwiinda mukulanga-langa icakacitika.

Mwami Saulo wa Israyeli wakajisi bana basankwa bali ciloba abana basimbi bobilo. Mwanaakwe wakusaanguna wakali Jonatani. Mpoonya kumbele, mwami Saulo wakazikuba amwana musankwa wazina lya Mefiboseti, ngwaakazyala kuli mwanakasuwa wakwe Rizipa. Pele awalo mwanaakwe Jonatani wakazikuba amwana musankwa ngwaakaulika kuti Mefiboseti. Aboobo, Mwami Saulo wakajisi mwana wazina lya Mefiboseti alimwi amuzyukulu ulaazina ndemunya eeli.

Aciindi cimwi, Mwami Saulo wakatalika kubasulaika bana Gibeoni alimwi akukanza kuti abajaye boonse. Amana buya, banji bakajaigwa. Eeci tiicakaluzi. Nkaambo nzi? Nkaambo mumazuba aa Joshua, basilutwe bana Israyeli bakapangide cizuminano caluumuno abana Gibeoni.—Jos. 9:3-27.

Cizuminano eeco cakacili kubeleka amumazuba aa Mwami Saulo. Mukwiimpana acizuminano eeco, mwami wakakanza kubajaya bana Gibeoni. Eeci ncaakacita, cakamupa kuba ‘amulandu wabulowa Saulo alimwi abamuŋanda yakwe.’ (2Sam. 21:1) Kumane Davida wakazooba mwami. Bana Gibeoni ibakacili kupona bakamwaambila Davida kujatikizya cibi cipati ncaakacita Saulo. Davida wakabalomba bana Gibeoni kuti bamwaambile mbwaakeelede kubbadela ikumana mulandu ngwaakacitide Saulo kutegwa Jehova acilongezye cisi ca Israyeli. Muciindi cakulomba kuti bapegwe mali, bakalomba kuti bapegwa bana ba Saulo bali ciloba, walo ‘iwakakanzide kubalobya’ boonse kutegwa abalo bajaigwe. (My. 35:30, 31) Davida wakakuzumina kulomba kwabo.—2Sam. 21:2-6.

Aciindi eeco, Saulo alimwi a Jonatani bakalifwide kale munkondo, pele mwana wa Jonatani Mefiboseti wakacili kupona. Wakalilemene akaambo kantenda yakamucitikila kubwana alimwi kunyina naakajisi mulandu akaambo kacibi ncobakacita basyaanyinakulu icakujaya bana Gibeoni. Davida wakapanga cizuminano cabulongwe a Jonatani, calo icakali kuyoogwasya balunyungu lwa Jonatani kubikkilizya amwanaakwe Mefiboseti. (1Sam. 18:1; 20:42) Cibalo caamba kuti: ‘Mwami Davida wakeetezyegwa kujatikizya Mefiboseti mwana wa Jonatani imwana wa Saulo akaambo kacikonke eeco Davida a Jonatani mwana wa Saulo ncobakakonkezyanya muzina lya Jehova.’—2Sam. 21:7.

Nokuba boobo, Davida wakakulemeka kulomba kwabana Gibeoni. Wakabapa bana basankwa ba Saulo bobilo, umwi kali Mefiboseti alimwi abazyukulu ba Saulo basankwa bosanwe. (2Sam. 21:8, 9) Eeci ncaakacita Davida cakapa kuti mulandu wabulowa umane.

Eeci icakacitika taali buyo makani aakaindi pe. Mulawo wa Leza wakalisalede. Wakali kwaamba kuti: “Bana tabeelede kujaigwa akaambo kazibi zyabamausyi.” (Dt. 24:16) Jehova naatakacizumizya kuti aaba bana ba Saulo bobilo alimwi abazyukulu bakwe bosanwe baabwe akujaigwa ikuti nobakanyina mulandu. Nkaambo mulawo uyungizya kuti: “Muntu weelede kujaigwa akaambo kacibi cakwe mwini.” Kulibonya kuti aaba ibalunyungu lwa Saulo ibali ciloba bakafwa akaambo kakuti bakalijatikizyidwe mukujaya bana Gibeoni. Akaambo kaceeci, aaba ibali ciloba bakafwa akaambo kacibi cabo.

Eeci cibalo cituyiisya kuti muntu tayeelede kunoocita cibi, mpoonya kayeeya naa kwaamba kuti ulacita oobo akaambo kakutobela malailile. Kasimpi kabusongo kaamba kuti: “Kobotya nzila imwiinda maulu aako, aboobo nzila zyako zyoonse zinooli kabotu.”—Tus. 4:24-27; Ef. 5:15.