Ŵanji awo ŵaŵazga mwakuchimbilira mavesi agha ŵakufumba fumbo ili. Kweni mavesi agha ghakuyowoya za ŵanalume ŵaŵiri ŵakupambana awo wose mazina ghawo ghakaŵa Mefibosheti. Ndipo tingasambirapo sambiro lakuzirwa para tingawonaso ivyo vikachitika.

Themba la Israyeli Sauli likaŵa na ŵana ŵanalume 7 na ŵana ŵanakazi ŵaŵiri. Mwana wakwamba wa Sauli wakaŵa Yonatani. Pamanyuma Themba likaŵa na mwana munyake zina lake Mefibosheti, uyo likababa ku mwanakazi munyake wachibwezi zina lake Rizipa. Yonatani nayo wakaŵa na mwana zina lake Mefibosheti. Ntheura Themba Sauli likaŵa na mwana kweniso muzukuru, awo wose mazina ghawo ghakaŵa Mefibosheti.

Nyengo yinyake Themba Sauli likawukira Ŵagibiyoni awo ŵakakhalanga pakati pa Ŵaisrayeli, ndipo likakhumbanga kuŵaparanyirathu wose. Nakuti vikuwoneka kuti ŵanandi ŵakakomeka. Ichi chikaŵa chinthu chiheni chomene. Chifukwa wuli? Chifukwa chakuti kumanyuma mu nyengo ya Joshuwa, ŵalara ŵa Israyeli ŵakachita phangano la mtende na Ŵagibiyoni.—Josh. 9:3-27.

Phangano ili likaŵa kuti lichali kugwira ntchito nanga ni mu nyengo ya Themba Sauli. Kweni themba likachita vinthu mwakupambana na phangano ili, ndipo likayezga kuti likomerethu Ŵagibiyoni wose. Ivi vikapangiska kuti paŵe “mulandu wa ndopa pa Sauli na pa nyumba yake.” (2 Sam. 21:1) Pamanyuma Davide wakaŵa themba. Ŵagibiyoni awo ŵakakhalako ŵakayowoya kwa Davide za uheni wura. Davide wakaŵafumba umo wangaŵaphepiskira pa viheni ivyo Sauli wakachita, kuti Yehova watumbike charu. Iwo ŵakapempha ndalama yayi, m’malo mwake ŵakapempha kuti ŵana 7 ŵa munthu uyo “wakanozga chiŵembu” pa iwo ŵapelekeke kwa iwo kuti ŵakomeke. (Maŵa. 35:30, 31) Ntheura Davide wakachita kuyana na pempho lawo.—2 Sam. 21:2-6.

Panyengo iyo, Sauli na Yonatani ŵakaŵa kuti ŵali kufwa pa nkhondo, kweni Mefibosheti mwana wa Yonatani wakaŵa kuti ngwamoyo. Iyo wakaŵa wakupendera chifukwa wakachita ngozi apo wakaŵa mwana, ndipo ntchakuwonekerathu kuti iyo wakachitako yayi chiŵembu icho asekuru ŵake ŵakachitira Ŵagibiyoni. Davide wakachita phangano la ubwezi na Yonatani, ilo ŵana ŵa Yonatani ŵakeneranga kusanga nalo chandulo, kusazgapo na Mefibosheti wuwo. (1 Sam. 18:1; 20:42) Nkhani iyi yikuti: “Themba [Davide] likachitira chitima Mefibosheti mwana wa Yonatani, mwana wa Sauli chifukwa cha chilapo icho Davide na Yonatani mwana wa Sauli ŵakachita pamaso pa Yehova.”—2 Sam. 21:7.

Ndipouli, Davide wakachita kuyana na pempho la Ŵagibiyoni. Wakapeleka ŵana ŵa Sauli ŵaŵiri, uyo yumoza wake zina lake wakaŵa Mefibosheti, ndiposo ŵazukuru 5 ŵa Sauli. (2 Sam. 21:8, 9) Ivyo Davide wakachita vikapangiska kuti mulandu wa ndopa umare mu charu.

Nkhani iyi ni mbiri waka yayi, kweni tingasambirapo. Dango la Chiuta likayowoya mwakupulikikwa makora kuti: ‘Ŵana ŵangakomekanga yayi chifukwa cha ivyo awiskewo ŵachita.’ (Doto. 24:16) Yehova mphanyi wakazomerezga yayi ivyo vikachitikira ŵana ŵaŵiri na ŵazukuru 5 ŵa Sauli viŵenge kuti ŵakaŵavya mulandu. Chifukwa dango ili likayowoyaso kuti: “Munthu waliyose wakomeke chifukwa cha kwananga kwake.” Vikuwoneka kuti ŵanthu 7 ŵamunyumba ya Sauli awo ŵakakomeka ŵakatorapo chigaŵa pa chiŵembu icho Sauli wakachitira Ŵagibiyoni. Ntheura ŵanthu 7 aŵa ŵakalangika chifukwa cha uheni wawo.

Nkhani iyi yikulongora kuti munthu wakwenera yayi kuchita chinthu chiheni na kugwenthera kuti iyo wakatumika waka. Ntharika ya vinjeru yikuti: “Skesketezga nthowa ya malundi ghako, ndipo mendero ghako ghose ghaŵenge ghawemi.”—Zinth. 4:24-27; Efe. 5:15.