Ayniwan machʼa jich ya sjojkʼoy te kʼalal ya skʼopon te relato-abi. Pero ay chaʼtul winik te Mefibóset sbiilik teme ya kiltik te bin-nix kʼot ta pasel-ae, ay bin ya yakʼ jnoptik.

Te ajwalil Saúl ta Israel ayin waktul skerem sok chaʼtul yantsil nichʼan. Te sbabiale jaʼ te Jonatán. Te yan yinam te Rizpá ayin skerem sok, te Mefibóset sbiil. Te Jonatán ayin skerem te Mefibóset sbiil-euk. Jaʼ yuʼun te Jonatán sok te Saúl ayin snichʼnabik te Mefibóset sbiilik.

¿Bin yuʼun te David la yakʼ ta milel bayal winiketik? Te ajwalil Saúl jajch skontrain te gabaonetik te nopol ayik ta kuxinel sok kʼan slajinlan. Jich yilel te aynix machʼatik la smile. Pero ma lek te bin la spase, melel te Josué la schap skʼop sok te gabaonetik te maba ya yichʼik utsʼinele (Jos. 9:3-27).

Ta skʼajkʼalel te Saúl matoba lajem skʼoplal-a te chapbilkʼop-abi, pero maba la yichʼ ta wenta la smiltiklan te gabaonetik. Jaʼ yuʼun te Saúl sok te machʼatik ayik ta sna la smulinik smalel chʼichʼ (2 Sam. 21:1). Kʼalal och ta ajwalil te David, te gabaonetik te kuxulik jilel la scholbeyik yaʼiy te David te bin kʼot ta pasele. Jich yuʼun jojkʼoybotik bin-utʼil ya xjuʼ ya smajtantesotik ta swenta te bin la spas te Saúl yuʼun jich ya schaʼyakʼbey bendición te Jehová te lum Israel. Maba la skʼanik takʼin, te bin la yalike jaʼuk te ya yichʼ miltiklanel te waktul snichʼnab te Saúl (Núm. 35:30, 31). Te David la spas te bin la skʼanike (2 Sam. 21:2-6).

Ta yorail-abi te Saúl sok te Jonatán maba kuxulukix-a. Pero te snichʼan te Jonatán te Mefibóset kuxulto stukel-a. Pero maba ya xjuʼ sbeel ta lek ta skaj te la sta swokol kʼalal chʼinto-ae, jaʼ yuʼun maba la skoltay te Saúl kʼalal la smiltiklan te gabaonetik. Te David la schap skʼop sok te Jonatán, jaʼnix jich tey ochem skʼoplal-euk-a te Mefibóset (1 Sam. 18:1; 20:42). Te relato jich ya yal ta stojol te David: «Te ajwalil la scʼuxultay te Mefi-boset snichʼan Jonatán, snichʼan Saúl, scaj te ay bin yalojic ta jamal ta stojol Jehová te David soc te Jonatán» (2 Sam. 21:7).

Te David la spas te bin la yal te gabaonetik. La yakʼ ta kʼabal te chaʼtul snichʼnab te Saúl, tey ochem skʼoplal-euk te Mefibóset sok joʼtul smam o snieto te Saúl (2 Sam. 21:8, 9). Jich yuʼun te David la slajin te bin boloben skʼoplal ta lum Israel ta skaj te la smulin smalel chʼichʼ te Saúl.

Ay bin ya yakʼ jnoptik te relato ini. Te Jehová maniwan la yakʼ jichuk kʼot ta pasel ta stojol te chaʼtul snichʼan sok te joʼtul snieto te Saúl, melel te Ley jamal ya yal te maba ya yichʼ miltiklanel te alnichʼanetik ta skaj te bin ma lek ya spasik te meʼil tatiletike. Te ley jich ya yal: «Jujutuhl ya xlaj yuʼun te smule» (Deut. 24:16). Ta swenta-abi ya yakʼ kiltik te waktul stsʼumbal te Saúl lajik ta skaj te ayniwan bin la spasik yuʼun ya yichʼik milel te gabaonetik. Jaʼ yuʼun lajik ta skaj te bin ma lek te bin la spasike.

Jich yuʼun, ¿bin ya yakʼ jnoptik te relato ini? Te maʼyuk machʼa ya xjuʼ ya smak sba ta kʼop ta swenta te bin ma lek ya spase o ya yal te jaʼnax yak ta schʼuunel mantale. Te machʼa ay bin ya spas, jaʼ te bin ya xkʼot ta stojole. Melel te proverbio jich ya yal: «Tsahtaya te be te banti yacat ta behel bahel, soc tojuc me spisil te behetic awuʼune. Ma me xhowiyat ta waʼel o ta qʼuexam; ma xatʼun te bin chopole» (Prov. 4:24-27; Efes. 5:15).