Ŵandu ŵagambile kuŵalanga mwachitema nganiji akusaliwusya chiwusyo chelechi. Nambo yisyesyene yakwe yili yakuti ndimesi sikusasala ya ŵandu ŵaŵili ŵaŵakwete mena gakulandana. Soni patukulola chenene nganiji, mpaka tulijiganye kane kakwe.

Mwenye Saulo jwakwete ŵanache ŵachalume 7 ni ŵachakongwe ŵaŵili. Yonatani ni juŵaliji mwanache jwandanda jwa Saulo. Kaneko Saulo jwakwetesoni mwanache jwine lina lyakwe Mefiboseti juŵapagwile mwa ŵakongwe ŵane lina lyawo Lisipa. Chakutesya chidwi chaliji chakuti nombe najo Yonatani jwakwete mwanache jwamlume juŵampele lina lyakuti Mefiboseti. Myoyo Mwenye Saulo jwakwete mwanache lina lyakwe Mefiboseti, jwakwetesoni chisukulu lina lyakwe Mefiboseti.

Pandaŵi jine Mwenye Saulo jwatandite kwaŵenga Agibiyoni ŵaŵatamaga sikati ja Aisalaeli. Jwalakwe jwasakaga kwawulaga wosopewo, mwamti ŵajinji mwa jemanjajo ŵawulajidwe. Nganisyo syelesitu syaliji syakulemwecheka. Tukuŵecheta yeleyi ligongo lyakuti mundaŵi ja Yoswa ŵakulongolela ŵa Aisalaeli ŵatesile chilanga chakuti chachitama mwamtendele ni Agibiyoni.—Yos. 9:3-27.

Chilangachitu chaliji chili mkukamulape masengo mpaka mundaŵi ja Mwenye Saulo. Atamose kuti yaliji myoyo, Mwenye Saulo jwalinganyisye ya kwawulaga Agibiyoni wosope ŵaŵatamaga pasikati pawo. Yeleyi yatendekasisye kuti, ‘Saulo ni liŵasa lyakwe akole magambo ga kwawulaga Agibiyoni.’ (2 Sam. 21:1) Kaneko, Daudi ali aŵele mwenye, Agibiyoni ŵaŵakulupwiche ŵamsalile yakwamba kuwulajidwa kwa achalongo achimjawo. Daudi ŵawusisye Agibiyoniwo kuti asale yakusaka kuti ŵatendele pa yakusakala yaŵatendele Saulo kuti Yehofa atandilesoni kuchipa upile chilambocho. Mmalo mwakusala kuti ŵape mbiya, Agibiyoni ŵala ŵasasile kuti ŵape ŵanache 7 ŵa mundu ‘juŵalinganyisye yakuti ŵamale’ kuti nombe nawo akawulajidwe. (Num. 35:30, 31) Daudi jwajitichisye yaŵaŵendileyo.—2 Sam. 21:2-6.

Payatendekwaga yeleyi, Saulo ni Yonatani ŵaliji ali awile ku ngondo. Nambo Mefiboseti mwanache jwa Yonatani jwaliji chijumi. Jwalakwe nganajawula kukuputa nawo ngondo jakulimbana ni Agibiyoni ligongo jwaliji jwamlemale. Jwalakwe jwawulele ali mwanache. Daudi jwatesile chilanga ni Yonatani. Chilangachi chaliji chakuti chichakamuchisya ŵanache ŵa Yonatani, mwamti Mefiboseti jwaliji jumo mwa ŵanacheŵa. (1 Sam. 18:1; 20:42) Nganiji jikusati, “Mwenye ŵamsunjile Mefiboseti, mwanache jwa Yonatani, mwanache jwa Saulo, ligongo lya chilanga chiŵatesile Mwenye Daudi ni Yonatani mwanache jwa Saulo, pameso pa AMBUJE.”—2 Sam. 21:7.

Daudi jwatesile mwakamulana ni yaŵaŵendile Agibiyoniwo. Jwalakwe jwapeleche ŵanache ŵaŵili ŵachalume ŵa Saulo nambosoni yisukulu yakwe msano. Pa ŵanache ŵaŵili ŵachalume ŵa Sauloŵa papalisoni Mefiboseti. (2 Sam. 21:8, 9) Yaŵatesile Daudiyi yatendekasisye kuti Yehofa atandilesoni kuchipa upile chilambocho.

Nganiji jikusatujiganya yejinji. Chilamusi cha Mlungu chasalaga kuti, “Ŵanache akawulajidwa ligongo lya kulemwa kwa achinangolo ŵawo.” (Det. 24:16) Yikaŵe kuti ŵanache ŵaŵili ŵachalume ŵa Saulo soni yisukulu yakwe msano nganajigala nawo mbali pa kuwulajidwa kwa Agibiyoni, nikuti Yehofa ngamkanakunda kuti jemanjajo awulajidwe. Chilamusi chila chasasilesoni kuti, “Mundu jwalijose akwenela kuwulajidwa ligongo lya yakulemwa yakwe msyene.” Yikuwoneka kuti ŵanache ŵaŵili ŵachalume ŵa Saulo soni yisukulu yakwe msano yila ŵajigele nawo mbali pa kuwulajidwa kwa Agibiyoni. Apatu ŵandu 7 ŵeleŵa ŵawulajidwe ligongo lya yakulemwa yawo.

Nganiji jikulosya kuti mundu jwatesile chakulemwa nganaŵa alikululuchile kuti nganalemwa nambo agambileje kukuya malangisope basi. Msyungu wine wa m’Baibulo ukusati, “Mganichisyeje chenene kusamalila mwasikupita sajo syenu, pelepo matala genu gosope gachiŵa gangakayikasya.”—Mis. 4:24-27; Aef. 5:15.