KOTUE ni omaaniọm ooḅaghamhiạn aloor dool dị ketue ni enịn ekpom mọ ayira orool. (Prov. 12:25) Nạ masoman ghan ni oḅonyonhu ozuan phọ ooḅaghamhiạn aloor rakọm ghan bọ ḍughụm? Nạ raloghoma ghan ni mọ nạ ka/tue mun akparạm? Eḍighi idiphọ, pọ ko/gina anạ. Ibadị ayira ropogh ghan oye dị u/moon, buniin oye kụ amhughanhaan, abunhọn osoman ekperenhom iiḅaghamhị, obobọ inhọn iiḅaghamhị dị mekpạ inyaạm r’iitughiạn abidị, ḅilhẹ ekọm beeph olhoghi. Kuolọ eeghe kụ ketue ilhoghonhaạn iyira ḍighaạgh okaran ooḅaghamhiạn aloor? *

Yira kotue ni otuughạ iyaạr ilọ okaran ooḅaghamhiạn aloor esi ooḅeghiọn eḍeenhaan Uw-emhạ phọ Devid. Odị asoman ni sidọl ipaanhaạn kirokirọ, aḅilhẹ amuzaan ḍuugh ibadị amem. (1 Sam. 17:34, 35; 18:10, 11) Ika kụ idị aDevid akpạr bọ apu ooḅaghamhiạn aloor? Yira kotuughaạny ika eḍeenhaan phọ odị?

ADevid asoman ibadị iiḅaghamhị eniin phọ amem mọ. Esi omaạm, ooḅeghiọn idị emite mem mọ odị aghiil bọ raḍuạ esi Uw-emhạ phọ Sọl awạ bọ oghiigh odị. Mem dị aDevid r’awe phọ odị oḅula ee eghạm, iḍighi ni unmam esi abidị omhiịn dị abumulhọgh ḍien momhiighi raraạr emhoọgh abidị, osuughị rutu, oḅilhẹ osiphi rughunotu abidị oḍuanhạm. ADevid aḍighi ika? “ADevid r’awe phọ odị umhiigh emoghi kụ omhoghi yogh tutụ asiloor abidị edugh.” Edị ekạr elhegheri bọ eeph, okạr awe phọ aDevid “unyạ oroḅol odị ikpo.” (1 Sam. 30:1-6) Siẹn phọ aDevid asoman iraạr igbogh iiḅaghamhị eniin phọ amem mọ: Abumulhọgh ḍien mosiphi eghunotu odị, odị rakiilhaan mọ awe phọ odị kotoḅol nyodị ikpo okiigh, kụ Uw-emhạ phọ Sọl ko/wilhẹ ophorogh odị. Gbiom olhoghi ooḅaghamhiạn aloor phọ aDevid amhoọgh bọ!

ADevid aḍighi eeghe? Odị akem ni “akparamhị loor odị esi aZihova Enhaạn phọ odị.” ADevid aḍighi ika iphẹn phọ? Odị aaḅereghị ghan alhọm aZihova olhoghonhaạn aḍighaạgh kụ aḅilhẹ aatughiạn ghan ilọ ipẹ aZihova malhoghonhaạn ghan bọ nyodị ḍighaạgh igbaany. (1 Sam. 17:37; Ps. 18:2, 6) ADevid amhiịn ni mọ emoghi dị odị kawạ iiḅakiọm aZihova. Kụ odị apuru aZihova ilọ oḍighi. ADevid asighẹ ni aḍighinhom egina amem iiḅakiọm mọ aZihova angọ bọ nyodị. Loor esi iduọn phọ, aZihova asẹph ni nyodị r’awe phọ odị, bịn bidị otagharạn rughunotu phọ r’araraạr emhoọgh phọ abidị. (1 Sam. 30:7-9, 18, 19) Nạ alọgh ni elhegh iraạr phọ aradạ phọ aDevid agbariọn bọ? Odị aaḅereghị alhọm aZihova olhoghonhaạn aḍighaạgh, aatughiạn ipẹ aZihova maḍighinhaan ghan bọ nyodị igbaany, kụ aḅilhẹ asighẹ aḍighinhom iiḅakiọm mọ aZihova. Ika kụ idị yira kotue otuughaạny Devid? Ooḅeghiọn iraạr areten.

1. Ḅeeḅereghị. Torobọ amem dị yira omhiigh olhoghoma ooḅaghamhiạn aloor, ooḅereghị olhọm aZihova olhoghonhaạn aḍighaạgh ḅilhẹ r’osụ olhoghi. Yira kotue ni ookpọ ooḅaghamhiạn aloor phọ ayira esi ookuanhaan ekpom mọ ayira aZihova esi iiḅereghị. Yira kotue ni kẹn ooḅereghiọm olhoghi eḍighi maạr dị asidọl phọ emhoghi mọ oḍighi iduọn phọ. Torobọ amem dị yira opuru olhoghonhaạn aḍighaạgh aZihova, pọ yira omeeraam aani ni ipẹ aDevid aḅẹm bọ mọ: “AZihova kụ aḍighiigh amhị r’esi oghoph amhị r’Opeliạ amhị. Enhaạn amhị r’aḍighiigh amhị dị ruuko ghan imhị.” (Ps. 18:2) Iiḅereghị ekạr ri relọgh ghan ḍighaạgh ḍughụm? Umaranhi dị rakọy ghan eten dị oghol mọ Kahlia aḅẹm mọ: “Mem dị mị aaḅereghị, mị raloghoma ghan eephọ. Iiḅereghị rilhoghonhaạn ghan imhị ḍighaạgh oḍighi idị iitughiạn phọ amhị keḅọph r’iitughiạn phọ aZihova, kụ rebughẹ ghan kẹn oḍuomolhoghi phọ mị amhoọgh bọ aghị esi aZihova.”  Agey ni, iiḅereghị eḍighi igbogh inmo aZihova, dị rilhoghonhaạn ghan iyira ḍighaạgh okaran oboom ooḅaghamhiạn aloor.

2. Tuutughiạn. Nạ aaghiraan aphogh omhạn, nạ amiịn ni iiḅaghamhị dị nạ arue akparạm loor olhoghonhaạn aḍighaạgh phọ aZihova ḍughụm? Mem dị yira ootughiạn ipẹ aZihova mulhoghonhaạn ghan bọ iyira r’arebenhẹ phọ odị ḍighaạgh igbaany, yira romoọgh ghan ni inyaạm r’oḍuomolhoghi dị abụgh koghị esi odị. (Ps. 18:17-19) Oniin okumor oye ookpomhoghan dị oghol mọ Joshua aḅẹm mọ, “mị ageeghị alọgh esi iiḅereghị amhị dị mophagharanhaạn. Iphẹn phọ milhoghonhaạn imhị ḍighaạgh ootughiạn ghan asimem dị mị alhọm aZihova iyaạr kụ atuụgh bịn ungọ imhị.” Ii, mem dị yira ootughiạn ghan ipẹ aZihova mulhoghonhaạn ghan bọ iyira ḍighaạgh igbaany, yira romoọgh ghan ni imhoom inyaạm osighẹ okaran oboom ooḅaghamhiạn aloor.

3. Sighẹ aḍighinhom. Kụ yira ogbi osopha ilọ oḍighi esi adọl dị yira osoman, yira kotue ni okị siphẹ Ekpo Onhụ phọ Enhaạn oteẹny igey iiḅakiọm. (Ps. 19:7, 11) Ibadị omiịn mọ mem dị bidị aạl esi aBaibul phọ kụ owaaghị raraạr, reloghonhaạn ghan bidị ḍighaạgh omhiịn idị esi aBaibul phọ egbolhomaam bidị r’aloor. Okumor oye ookpomhoghan dị oghol mọ Jarrod aḅẹm mọ: “Owaaghị araraạr rilhoghonhaạn ghan imhị ḍighaạgh otuughạ obughẹ ilọ esi aBaibul phọ ḅilhẹ r’onhaghanhạn iyaạr phọ aZihova ruḅenhị bọ imhị. Iphẹn phọ rilhoghonhaạn ghan imhị ḍighaạgh okạr omheeraam ipẹ mị aạl bọ pidị mị atue asighẹ aḍighinhom iiḅakiọm mọ odị.” Mem dị yira owạ iiḅakiọm aZihova siphẹ Aḍinyạ Iigbia phọ kụ yira osighẹ oḍighinhom, rinyaamhị ghan ni iyira orue okaran ooḅaghamhiạn aloor.

ADevid alhegheri ni m’onọ amoghi olhoghon haạn aḍighaạgh aZihova orue okaran ooḅagh amhiạn aloor. Odị akạr kụ asereghiạn olhoghonhaạn aḍighaạgh phọ aZihova dị tutụ enyu nyodị oḅẹm mọ: “Esi iikpọ phọ Enhaạn mị katue ni akpogha iikpe. Egey Enhaạn phọ kụ oye phọ esighẹ bọ inyaạm ighoroghiọm imhị.” (Ps. 18:29, 32) Yira otue ni ologhoma mọ iiḅaghamhị phọ ayira eḍighi iikpe dị yira ko/tue okpogha. Kuolọ r’olhoghonhaạn aḍighaạgh aZihova, yira kotue ni okpogha iiḅaghamhị dị eghịgh iikpe! Ii, mem dị yira ooḅereghị olhọm aZihova olhoghonhaạn aḍighaạgh, ootughiạn ipẹ odị mulhoghonhaạn ghan bọ iyira ḍighaạgh igbaany, oḅilhẹ osighẹ oḍighinhom iiḅakiọm mọ odị, pọ yira kokuphom ni owol mọ odị kungọ ni iyira inyaạm r’osụ olhoghi phọ ewạ bọ osighẹ okaran ooḅaghamhiạn aloor phọ ayira!