САНААРКАШТАР уур јӱктий болуп, кижиниҥ јӱрегин оорудат (Укаа 12:25). Слер јӱрӱмеерде санааркаштардаҥ улам шыралаганаар ба? Эйе болзо, слер јаҥыскан эмезигер. Бистиҥ кӧп сабагыс оору тӧрӧӧнин кичеейт, је кем де јуук кижизин јылыйткан. А та кем де ар-бӱткенниҥ тӱбегинеҥ шыралап јат. Бу мындый уур-кӱчтер кижиниҥ эт-канына, физический ле эмоциональный јанына јаман салтарын јетирет. Мындый санааркаштарды ӧдӱп чыгарга биске не болужар? a

Бу јанынаҥ бис Давид кааннаҥ кӧп немеге ӱренер аргалу. Оныҥ учун дезе Давидтиҥ јӱрӱми кыйын-шырала, санааркаштарла толо болгон. Кезикте оныҥ јӱрӱми јеткерлӱ айалгада болотон (1 Сам. 17:34, 35; 18:10, 11). Давидке санааркаштарла тартыжарга не болушкан? Оныҥ теминеҥ бис неге ӱренер аргалу?

Давид бир ле уунда кӧп тӱбектерге табарткан. Темдектезе, оны ӧлтӱрерге истежип турган Саул кааннаҥ јажынып турарда не болгонын сананып ийектер. Ол бойыныҥ улузыла јуулажып келерде, амаликитяндар олордыҥ айылын ӧртӧп, јӧӧжӧзин тоноп, ӱйлерин ле балдарын олјого апаргылаган. Давид ле оныҥ јуучылдары «тыҥ ыйлажа бергендер, ыйлаар кӱчи чыкканча ыйлашкандар». Је бу тӱбектиҥ ӱстине Давидтиҥ чындык јуучылдары, оны ташла шыбалап, ӧлтӱрерге сананган (1 Сам. 30:1—6). Айдарда, Давид бир ле уунда ӱч тӱбекке табартып јат. Билези јеткерлӱ айалгада болуп калган, најылары ӧлтӱрерге сананган, анайда ок Саул каан ӧлтӱрерге истежип јат. Мындый айалгада Давидке кандый кӱч болгонын сананып ийзеер де!

«Давидке коркышту кӱч болгон. Је Иегова Кудай ого ийде-кӱч берген». Мындый айалгада Давид нени эткен? Ол Кудайга мӱргӱп, болуш сураган. Анайда ок Кудай ого ӧткӧн ӧйлӧрдӧ канай болушканын јаантайын сананып јӱретен (1 Сам. 17:37; Сар. 18:2, 6). Оноҥ ол Кудайдаҥ башкарту керек деп, оҥдогон. Оныҥ учун ол Иегованаҥ нени эдер керек деп башкарту сураган. Кудайдаҥ башкарту алып, Давид оны тургуза ла тузаланган. Мынаҥ улам олор билелерин јайымдап, јӧӧжӧзин кайра алгандар (1 Сам. 30:7—9, 18, 19). Ајардаар ба, Давид кандый ӱч алтам эткен? Ол Иеговага мӱргӱп, болуш сураган, Кудай ӧткӧн ӧйлӧрдӧ канайып ого болушканын сананган, оноҥ Кудайдыҥ башкартуларын тузаланган. Биске бу эп-аргаларды база тузаланар керек. Је эмди олордыҥ кажызын ла шӱӱжип ийектер.

1. Мӱргӱгер. Кажы ла катап санааркаштар амыр бербей турза, Иеговага мӱргӱп, ойгор сурагар. Јӱрегерде не барын ончозын ого айдыгар. Ол тушта санааркаштараар уур јӱктий тӱже берген деп, сезип ийереер. Иеговага узак, јазап мӱргӱӱр арга јок болзо, тоолу ла сӧслӧ мӱргӱӱрге јараар. Давид кожоҥдогон «Иегова — мениҥ кайам ла шибеем. Мениҥ јайымдаачым, Кудайым меге — кайа таш. Ого мен иженерим» (Сар. 18:2). Иеговага баштанып, оноҥ болуш сурап турзагар, слер ого бӱткӱлинче бӱдӱп турганаарды кӧргӱзедеер. Је мӱргӱӱл чыннаҥ ла та нени де солып ийер аргалу ба? Калия деп атту пионер эје куучындаган: «Иеговага мӱргӱген кийнинде, јӱрегиме токуналу боло  берет. Анайып, мен Иеговага анаҥ тыҥ иженедим. Мӱргӱӱл меге Иегова канайып сананып турган, анайып ла сананарга болужат». Айдарда, мӱргӱӱл оору-сысты токтодып турган эмге тӱҥей болот. Ол бистиҥ санааркаштарды токтодорго болужат. Бу эмди Иегова биске бойы бичип берген.

2. Сананып туругар. Бойоордыҥ јӱрӱмеерди сананып ийзеер де. Иегованыҥ болужыла ӧткӧн уур-кӱчтер санаагарга кирет пе? Иегова биске канайып болушканын, анайда ок ӧткӧн ӧйдӧ ол бойыныҥ ишчилерине канайып болушканы керегинде шӱӱп сананганыс биске ийде-кӱч берет ле ого оноҥ тыҥ бӱдерге болужат (Сар. 18:17—19). «Иегова мӱргӱӱлдеримге каруу берген учуралдарды ӱзе бичип аладым, — деп, Джошуа аксагал айдат. — Анайып меге Иегованаҥ нени сурагам, оны алганымды ундыбаска јеҥил болот». Иегова биске болушкан учуралдарды ундыбай сананып турганыс санааркаштарла тартыжарга јаҥы ийде-кӱч берер.

3. Тузаланыгар. Санааркап турган ӧйдӧ та нени де эдердеҥ озо, Кудайдыҥ Сӧзине баштаныгар. Јӱк ле оноҥ бис чыннаҥ ла ижемјилӱ башкарту табарыс (Сар. 19:7, 11). Кӧп ака-эјелердиҥ айтканыла, Агару Бичиктиҥ кандый бир ӱлгерин јӱрӱмисте канайып тузаланарын јакшы оҥдоорго оны јазап шиҥдеер керек. Джаррод деп аксагал айдат: «Кандый бир ӱлгерди шиҥдеп тура, мен оныҥ башка-башка учурлу болгонын, кӧрӱп баштайдым. Анайып, Иегова меге нени айдарга турганын јарт оҥдойдым. Нени билип алганым, јӱрегиме тереҥ тазылданып калат, оныҥ учун Кудайдыҥ башкартузын тузаланарга јеҥил болот». Агару Бичиктеҥ бис Иегованаҥ башкарту бедиреп, ол аайынча јӱрзеес, санааркаштарла тартыжарга белен болорыс.

Давид Кудайдыҥ болужы јогынаҥ санааркаштарла тартыжып болбос деп оҥдогон. Иегованыҥ болужы учун быйанду болгонын кӧргӱзерге, ол мындый сӧстӧр айткан: «Кудайымныҥ кӱчиле стенеге чыгарым. Чындык Кудай меге ийде-кӱч берет» (Сар. 18:29, 32). Уур-кӱчтер бистиҥ алдыста бийик стенелердий деп, билдирердеҥ айабас. Је Иегова бисле кожо. Айдарда, кандый да кӱчтер биске буудак болбос. Оныҥ учун Иеговага мӱргӱп, болуш сураактар. Ол биске нени эткенин ундыбай сананып јӱректер. Оныҥ башкартуларын тузаланактар. Бу телекейдиҥ санааркаштарынаҥ качар арга јок то болзо, Иегованыҥ ийде-кӱчиле, ойгорынаҥ улам сӱӱнчилӱ ле токуналу артарыс!