ANG’ABACWINY copo bedo ve ter moko ma pek m’unuro adundewa. (Rie. 12:25) Nyo saa moko idaru nyego kud ang’abacwiny moko ma pek i kwo peri de? Nyo iwinjiri nia dong’ iromo cire ngo? Ka eyo, itie kendi ngo. Dupa m’i kindwa ginwang’u nia givoc, cwinygi ung’abere, man cwinygi tur pi thelembe dupa ma tung’ tung’. Ku lapor, jumoko ubed ugwoko wedi migi m’uberemo, jumange ke wedi migi ma gimaru utho, man jukurucel ke ginwang’iri ku can mi peko ma wok rek. Dong’ ang’o ma romo konyowa ninyego cuu kud ang’abacwiny mwa? *

Wacopo nwang’u ponji lee iwi kite mi nyego kud ang’abacwiny niai kud i lapor p’ubimo Daudi. Enwang’ere ku lembe dupa i kwo pare, man kadok i wang’ tho bende. (1 Sam. 17:34, 35; 18:10, 11) Daudi unyego cuu kud ang’abacwiny pare nenedi? Dong’ wan ke wacopo lubo lapor pare nenedi?

Daudi unwang’ere ku lembe dupa dupa i saa ma rom. Kepar pi lembe m’uwok i kume kinde m’ebino ringo ubimo Saul m’umito nege. Nindo moko kinde ma Daudi ku dhanu pare gidwogo i Ziklag, giwok ginwang’u jukwojgi uyaku piny migi, giwang’u pacu migi, man gicoko juruot migi gidok ko. Daudi utimo ang’o? ‘Daudi ku dhanu ma ni karacelo kude giting’o dwandgi malu man giywak, ma ram tegogi doko mbe . . . ma giywak ko.’ E ang’abacwiny pa Daudi umedere ameda, kum dhanu ‘ubino yero pi canye ku kidi.’ (1 Sam. 30:1-6) Kawoni Daudi ubenwang’ere i wang’ lembe adek ma dongo i saa ma rom: Juruot pare ubino i ariti, ebino ku lworo nia dhanu pare ubemito nege, man ubimo Saul de ubino saye asu. Kepar ang’abacwiny ma Daudi copo nwang’ere ko saa maeno!

Daudi utimo ang’o i ng’eye? Ndhundhu ‘edwokere gire tek ni kum Yehova Mungu pare.’ Daudi utimo lembuno nenedi? Wang’eyo nia Daudi ubedo ku ng’iyo mi rwo i bang’ Yehova pi nikwayu kony man mi paru pi kite ma Yehova ukonye ko i wang’e. (1 Sam. 17:37; Zab. 18:2, 6) Daudi ung’eyo nia etie ku yeny mi sayu telowic pa Yehova, uketho ekwayu Yehova kara eng’ey gin m’eromo timo. I ng’ey m’enwang’u telowic pa Yehova, etiyo kude wang’ acel. E Yehova umiyo mugisa ire ku dhanu pare; man giwok gimayu juruot migi ku piny migi ceke gidwogo ko. (1 Sam. 30:7-9, 18, 19) Nyo ineno lembe adek ma Daudi utimo? Erwo i bang’ Yehova pi nikwayu kony, eparu pi gin ma Yehova ugam utimo ire i wang’e, man etimo nimakere ku telowic pa Yehova. Wan ke wacopo lubo lapor pare nenedi? Wakenen yo adek.

1. Rwo i bang’ Yehova. Saa ceke ma ka wabenwang’u nia cwinywa ukwong’o beng’abere, wacopo kwayu kony man rieko i bang’ Yehova. Wacopo nwang’u jukocwiny kinde ma wabekoro lembe ceke mir adundewa ni Yehova i rwo. Kunoke waromo yero lembe moko ma nyar adundo i rwo mwa ma nyaling’ ling’, tek lembe ma wabekadhu kud i iye ubekwayu watim kumeno. Saa ceke ma ka wabekwayu Yehova ukonywa, wanyutho nia wagene calu ma Daudi utimo. Ewacu kumae: “Yehova en e cana para, man ot ma tek para, man jabodhna; Munguna, cana para, m’abipondo i bang’e.” (Zab. 18:2) Nyo rwo konyo andha? Nyamego Kahlia ma tie jayab yo uyero kumae: “Kan arwo, cwinya kwiyo. Rwo bekonya niparu lembe i kite ma Yehova paru ko, man ekonya niketho  genogen para lee iwi Yehova.” Eyo, rwo tie giramiya m’utie ku tego lee m’uai i bang’ Yehova ma konyowa ninyego kud ang’abacwiny.

2. Par kite ma Yehova ukonyi ko. Kinde m’ibeparu pi lembe m’ikadhu kud i iye, nyo icopo poy pi peko m’igam iciro ndhu nikum kony pa Yehova? Ka wabeparu pi kite ma Yehova ukonyo kowa calu m’ekonyo ko jurutic pare ma con, wanwang’u kwiyocwiny ma lee i adundewa man wamedara nigene. (Zab. 18:17-19) Jadit cokiri moko ma nyinge Joshua uwacu kumae: “Arieyo list mi wang’ rwo para m’ubed udwogo. Eno ukonya nibepoy i kum saa m’akwayu iye Yehova ku piny moko m’abino ku yenyne, man etimo de tap kumeca.” Eyo, ka waparu pi gin ma Yehova udaru timo iwa, wanwang’u tego ma nyen mi nyego i dhug ang’abacwiny mwa.

3. Tim calku telowic pa Yehova. I wang’ nimaku yub pi gin ma wacopo timo i lembe moko, ukwayu wasay telowic mi Lembe pa Mungu, kum etie telowic ma jugeno. (Zab. 19:7, 11) Judupa ginwang’u nia kinde ma gibetimo sayusac iwi giragora moko, ginwang’u kaka ma cuu mi nyang’ i kite ma giragorane umulo ko kumgi. Jadit cokiri moko ma nyinge Jarrod ukoro kumae: “Timo sayusac bekonya ninwang’u ponji lee iwi giragora, man ninyang’ i gin ma Yehova ubeyero ira nikadhu kud i giragorane. Eno konya niyiyo gin m’asomo, man eketho dong’ atiyo cuu ku telowic pa Yehova.” Ka wabeyenyo telowic pa Yehova nikadhu kud i Lembagora man wabetiyo ku telowicne, ebibedo iwa yot ninwang’u akwiyacwiny man anyong’a i saa ma cwinywa ung’abere.

Daudi ugam unyang’ nia etie ku yeny mi kony pa Yehova pi ninyego cuu i dhug ang’abacwiny pare. Egam efoyo kony pa Yehova lee uketho eyero kumae: “Apor ku wi gang’kidi ni kum Mungu para. Mungu m’utwia ku tego.” (Zab. 18:29, 32) Wacopo neno nia peko mwa ubedo ve gang’kidi ma piey kud i wiye utie tek. Ento ku kony pa Yehova, wacopo voyo peko moko ci m’urodere i wang’wa ve gang’kidi! Andha, ka waberwo pi nikwayu kony i bang’ Yehova, wabeparu pi lembe ceke m’egam etimo iwa i wang’e, man wabetimo nimakere ku telowic pare, cwinywa romo bedo tek nia ebimiyo iwa tego man rieko ma watie ku yenyne pi ninyego cuu kud ang’abacwiny mwa!