O CARIRAW malecaday to karetengay ˈinorong mipaekelay to falocoˈ ita. (Taneng 12:25) Na pakayniay kiso i cariraw micada to taˈangayay a saroero han? Na cato pakahadidi ko niyah sanay kiso miharateng han? Ano mahaenay i, cowa ka matoˈol kiso. Pakayni i cowa ka lecad a lalangian, malotayay ko tireng ato falocoˈ sanay ko ˈalomanay tamdaw, tinakoen misaaliay cangra midimokos to adadaay a paro no lomaˈ, malahdaway ko salawina anca tahalifaay to pades. O manan ko papadama kitaanan malaˈosi a miremo to cariraw hani? a

Nengnengen ita ko nalifetan no Hongti no Israil ci Tafiti, wa mananam to samaan miremo to cariraw. O kaˈorip ningra misiˈayaway to adihayay a pasangaray, nolatekay misiˈayaway to sakapatay a katalawan. (1 Samuil 17:34, 35; 18:10, 11) Samaanay cingra malaˈosi miremo to cariraw hani? Sasamaan kita pasayra cingranan a minanam hani?

Malecaday a tatokian misiˈayaway ci Tafiti to pinapina a pasangaray. Haratengen milaliway cingra to sapipatayaw no Hongti ci Sawlo. Minokay ci Tafiti ato sikawdan ningra a milood i, mahapinangay to mitakaway ko ˈada a miˈodis to niyaroˈ nangra, mitakaway to polong a dafong, milepelayho to paro no lomaˈ nangra, mitodohayho to niyaroˈ. Samaanay ko harateng ni Tafiti hani? Ci Tafiti ato sikawdan ‘ongong sanay tomangic, tangasa i kaawaan no ˈicel a tomangic.’ Tada cariraway ci Tafiti, o sikawdan ningra sanayho a somowal ‘tano fakelohen a mipatay’ cingra. (1 Samuil 30:1-6) Mihaenay malecaday a tatokian toloay ko taˈangayay a pasangaray misiˈayawan ni Tafiti: O paro no lomaˈ tahalifa to katalawan, o sikawdan sapipatayaw cingranan, padotocay milepel ci Sawlo cingranan. Hakowaay ko kataˈangay no saroeor ni Tafiti!

Samaanay ko demak ni Tafiti hani? Tangsolay cingra ‘mitadiˈec to Kawas ci Yihofaan patanektek cingranan.’ Samaanay cingra a miremo hani? Iraay ko ngaˈayay a nanaman ni Tafiti, tocerid pasayraay cingra ci Yihofaan micangacang to sapadama, hanaca mitikol miharateng to samaanay ci Yihofa padama cingranan i salakat. (1 Samuil 17:37; ˈOlic 18:2, 6) Malecaday toniya tatokian, mahapinangay ni Tafiti misaaliay ko niyah to sapicangacangaw to sakayat ni Yihofa, tangsolay a milicay ci Yihofaan. Milifok ci Tafiti to sakayat i, tangsolay a midemak. Telocto, itini i sapadama ni Yihofa, malaˈosiay cingra ato sikawdan paˈorip to paro no lomaˈ. O maˈafasay a dafong panokayan to maemin. (1 Samuil 30:7-9, 18, 19) Masinanotay iso o maanan tolo a demak ko midemakan ni Tafiti han? Micangacangay a mitolon cingra ci Yihofaan, mitikol miharateng to samaanay ci Yihofa padama cingranan i salakat, hanaca mitoor to sakayat ni Yihofa a midemak. Sasamaan kita pasayra ci Tafitian a minanam hani? Nengnengen ko ilaenoay tolo a pakayraan.

1. Mitolon. Ano hacowato a tatokian macariraw kita i, ngaˈayay micangacang ci Yihofaan pafeli kitanan to sapadama ato taneng. Ngaˈayay koˈedawen ko toki ita mitolon, pasowal Cingranan to kacalemceman no falocoˈ ita. Ano cowa pihayi ko pakayraan, ngaˈayay saamotoˈen ita ko pitolon. Kahacecay ita a mitolon ci Yihofaan micangacang to sapadama, paihkalay to iraay ko malecaday ni Tafiti a pakasoˈlinay falocoˈ no niyah, sanay cingra: ‘O midipotay takowanan a ˈongcoy ato pisitaraan ci Yihofa, o paˈoripay takowanan a Kawas, o Kawas ako o ˈongcoy ako, micangacang kako to sadipot Ningra.’ (ˈOlic 18:2) O satolon soˈlinay milowan to caciraw han? O cecay misakafahay a fafahiyan salikaka ci Kaliya sanay ko sowal: “Ikor no mitolon kako rihadayayto ko falocoˈ. Mitolon ngaˈayay padama kitaanan tano pinengneng ni Yihofa a minengneng to demak, patongalayho to pitadiˈec ako Cingranan.” O mitolonay soˈlinay o mikitiniay ci Yihofaan a sapakaolah, ngaˈay padama kitanan miremo to cariraw.

2. Tikolen a miharateng. Haratengen ko nalifetan iso i salakat, iraay ko manan a sapalifet to pakayniay kiso i pitadiˈec to sapadama ni Yihofa ngaˈ malaˈosiay a miremo hokira? Tikolen a miharateng to samaanay ci Yihofa padama kitaanan ato roma madimadiay sikawdan Ningra, o mamilifokto kita to ˈicel, matongal ko pakasoˈlin Cingranan. (ˈOlic 18:17-19) O malohemay malitengay ci Ciyawsoya, saan ko sowal ningra: “Iraay ko cecay rayray ako, mitilidan ko pacaˈofan ni Yihofa a satolon ako, padamaay konini takowanan miharateng to na micangacangan ako ci Yihofaan a demak, ato samaanay Cingra mitoor to saali ako pacaˈof takowanan.” Songilaˈen ita a miharateng samaanay ci Yihofa isaˈayaw midama kitaanan, o tatalifakto, o ngangaˈayto padadotoc miremo to cariraw.

3. Midemak. ˈAyaw no misaysay kita to cecay a demak i, salakatenho minengneng to Fangcalay Cudad iraay ko manan ciepocay a sakayat. Mahapinangay no ˈalomanay tamdaw, ano micalep cangra mikingkiw to tatodong no cecay sinael, wa ihkalto mafanaˈ to sasamaan a misaka dademak to safalod no sinael. (ˈOlic 19:7, 11) O malohemay malitengay ci Ciyalote, sanay cingra: “Micalep a mikingkiw ngaˈay padama takowanan cipinang to sinael, matongal ko kacipinang to makalimay ci Yihofa samaan ko pidemak ako, paˈicelay to pasoˈlinay falocoˈ no mako, ngaˈayto kako mitoor to sakayat ni Yihofa a midemak.” Sinanoten ita ko sakayat ni Yihofa i Fangcalay Cudad, hanaca tooren a midemak, wa matongal ko ˈicel miremo to cariraw.

Mafanaˈay ci Tafiti, sakalaˈosiaw miremo to cariraw, misaaliay to sapadama ni Yihofa. Tada miakoˈiday cingra to sapadama ni Yihofa cingranan, mansa mikifalocoˈ a somowal: ‘Mitiˈer to ˈicel no Kawas, maedeng kako a mipelpel to pisitalaan nangra a ˈadipel. Patomesan no Kawas kako to ˈicel.’ (ˈOlic 18:29, 32) Nolatekay sanay kita a miharateng, o sapalifet no niyah malecaday o mihawangay to ˈakawangay ˈadipel. Kawra ano o mananto ko malifaay a sapalifet, edengan mitiˈer kita to sapadama ni Yihofa, wa ngaˈay a miremo. Ano mitolon a micangacang kita ci Yihofaan, tikolen a miharateng ko nano demak Ningra kitanan, hanaca mitoor to sakayat Ningra a midemak, ngangaˈayto pakasoˈlin kita to papafeli Cingra to ˈicel ato taneng kitaanan, malaˈosi ko piremo ita to cariraw.