FILL raquiduamcüleliyiñ fanenagafui taiñ piuque mu (Prov. 12:25). Eimi quiñeque rupa mu, ¿femngechi fill raquiduam rupaqueimi? Fente tami fill raquiduamcülen, ¿yafüngehuequelaimi? Femngechi rupalmi, eimi müten no tati. Fentrenque che femngechi dungu meu rupaquei. Quiñeque che layeluuquei, cangelu cuidaquei quiñe cutranche tañi ruca meu, caquelu rupaquei fütraque nüyün mu, cürüftucu mahun mu cam caquelu femngechi dungu. Femngechi dungu mu rupayüm che, fill raquiduamquei. ¿Chem quelluafeiñmu taiñ fill raquiduamcülen mu? a

Fill raquiduamcüleliyiñ, rume quelluaiñmu David ñi rupan. Quisu fentren huesaque dungu meu rupai. Quiñeque rupa contueyu lan dungu tañi mongen meu (1 Sam. 17:34, 35; 18:10, 11). Feichi fill raquiduamcülelu David, ¿chem quellueyu? ¿Chumngechi inayentuafuiñ?

David quiñe lelen mu rupai fentren huesaque dungu meu. Raquiduamnge feichi Saúl inayahuleyu tañi langümaeteu. David ca tañi pu huentru deu hueichamelu, huiñotuingün. Fei aculu tañi mapu meu, lüpümüñmangei tañi ruca, hueñeñmangei tañi familia, tañi chemcün, culliñ, niehuelai chem no rume. Rume huesa duamelpelaeyu engün. Fei, ¿chumi ta David? “David ca tañi pu huentru fütra ngümacahuingün. Nehuen-ngehuelai ñi fente ngümacahun engün”. David fente tañi cutranpiuquelen, fei allcüi tañi pu compañ ñi huiño langümaeteu, doi cutrantupiuquei (1 Sam. 30:1-6). Quiñe lelen mu David contueyu cüla huesaque dungu: yeñmangerquei tañi familia, tañi pu huentru cüpa langümeyu ca tati rey Saúl inayahuleyu tañi langümaeteu. Feimu David fill huesa raquiduamcülepelafui.

Fei David, ¿chem chumi? Pürümquechi fülcontufi ta Jehová tañi nehuentucuaeteu. ¿Chumngechi femi? David huimtulefui femngechi ngillatuquefiel ta Jehová tañi quelluaeteu ca acordafi chumngechi cuifi tañi quellueteu ta Jehová (1 Sam. 17:37; Sal. 18:2, 6). David quimniefui hune ramtuafiel ta Jehová tañi chem chumal, fei eluhui ñi femal. Deu allcütulu, David pürümquechi femi ñi feipieteu Jehová, feimu cümelcaeyu Jehová. Femngechi Jehová ñi quellun mu, huiño petui tañi pu familia ca tañi chemcün (1 Sam. 30:7-9, 18, 19). ¿Chem cüla dungu femi David? Hune ngillatufi Jehová tañi quelluaeteu, raquiduami chumngechi cuifi tañi quelluqueteu Jehová ca pürümquechi femi Jehová ñi feipieteu. ¿Chumngechi inaquintuafuiñ ta David? Peaiñ cüla dungu.

1. Ngillatuafiyiñ Jehová. Fill raquiduamcüleliyiñ, ngillatuafuiñ Jehová taiñ quelluaeteu chem chumal. Ngillatun mu, alüñma feipiafuiñ ta Jehová com taiñ fill raquiduamcüleeteu, fei doi cüme duameltuaiñmu. Huelu pepi femnoliyiñ, pichi ngillatuafuiñ ca ñochi dungun mu. “Quelluen” pifiliyiñ ta Jehová, pengelaiñ taiñ maneluucülen Jehová mu, chumngechi ñi femün ta David. Quisu feipi: “Jehová tañi fütra cura, tañi ellcaupeyüm, ñi montulchefe. Cura reque felei tañi Dios cheu tañi ellcauquen, tañi escudo”  (Sal. 18:2). ¿Feingepei mai taiñ ngillatuquen? Quiñe lamngen hunelequelu amuldungun mu, Kahlia pingei, feipi: “Deu ngillatun mu, tüngcülehuetuquen. Tati ngillatun quelluqueneu ñi raquiduamal Jehová reque, ca quelluqueneu ñi doi cüme maneluucüleal quisu meu”. Rüfcünu, Jehová elueiñmu taiñ ngillatun, fei taiñ quelluaeteu taiñ fill raquiduamcülenoal.

2. Raquiduamaiñ chumngechi quellueteu Jehová taiñ rupan mu. ¿Eimi cai? Nehuen-ngehuenolmi, ¿pequeimi Jehová ñi quellu? Raquiduamfiel mu chumngechi Jehová quelluqueiñmu iñchiñ ca tañi pu che cuifi mu, doi cüme maneluucüleaiñ Jehová mu ca doi tüngduamcüleaiñ (Sal. 18:17-19). Quiñe loncolelu, Joshua pingei, feipi: “Fentren ngillatun huirintucungen chumngechi huiñoldungueteu Jehová, femngechi lelicünufiñ com cüme tripaquei tañi ngillatun”. Felei llemai, fill raquiduamcüleliyiñ raquiduamaiñ chumngechi Jehová taiñ quellueteu cuifi mu, femngechi nehuencontuaiñ.

3. Pürüm femaiñ Jehová ñi ayüqueel. Petu taiñ dullinon chem chumal, quintuaiñ Jehová tañi quellun Biblia meu (Sal. 19:7, 11). Fentren pu peñi pu lamngen ngüneduamlu chem pi quiñeque texto, doi quelluqueyu inayal tañi mongen mu. Quiñe loncolelu, Jarrod pingelu, feipi: “Ngüneduamfilu iñche quiñe texto Biblia mu, doi cüme adümurpuquen com ñi feipin Jehová. Ñi feipieteu Jehová puuquei tañi piuque meu, fei eluucülen ñi femal quisu ñi ayüqueel”. Ngüneduamliyiñ Chau Dios ñi dungu Biblia meu ca inaniefiliyiñ tañi feipin, quelluaiñmu taiñ tüngduamcüleal ca ayüucüleal, femngechi taiñ fill raquiduamcülenoal.

David cüme quimniefui Jehová ñi quellun mu femngechi ñi fill raquiduamcülenoal. David fente ñi mañumcülen Jehová ñi quellun mu, feipi: “Tami nehuen mu püraquen quiñe fütra cura malal. Tati rüfngechi Ngünechen llemai eluqueneu nehuen” (Sal. 18:29, 32). Taiñ huesaque rupan rume cüdaungelu troquiafuiñ, quiñe fütra cura malal reque quechilelu. Huelu Jehová ñi quellun mu, com cüme entuafuiñ. Fei llemai, fill raquiduamcüleliyiñ, ngillatuafiyiñ Jehová taiñ quelluaeteu, raquiduamaiñ taiñ chumngechi quellueteu Jehová cuifi mu ca inañmayafiyiñ Jehová taiñ feipieteu. Femngechi femliyiñ, Jehová eluaiñmu nehuen ca quimün, femngechi taiñ huesa raquiduamcülenoal.