Lelaa di nla yémbél nduña?
NDUÑA i nla ba kiki soso mbegee. (Bingéngén 12:25) Baa u ma bana nduña mu niñ yoñ? Baa i nduña i i bi pam we héya bitamb? Wee u ta bé wetama. Ngandak ipôla yés i gwé nduña inyu manjom mahogi. Kiki hihéga, bahogi ba ntééda mut wap lihaa nu a nkon tole ba nkôs maéya, bape ki ba nok ndutu inyule kuu i nkwél bo. Ndi kii i nla hôla bés i yémbél nduña? *
Ndémbél i Kiñe David i nla hôla bés i yémbél nduña. A bi boma ngandak mandutu mu niñ yé, ngim mangéda ba yéñ yak manjel i nol nye. (1 Samuel 17:34, 35; 18:10, 11) Kii i bi hôla David i yémbél nduña? Lelaa di nla kôna ndémbél yé?
LELAA DAVID A BI YÉMBÉL NDUÑA
David a bi boma ngandak mandutu mu niñ yé nlélém ngéda. Kiki hihéga, bigda i mam ma bi tagbe ngéda Kiñe Saulô a bé noñ nye. Kel yada, ki ba yé huu i gwét, David ni bisônda gwé bi bi léba le baoo bap ba nip masañgô map, ba ligis mandap map, ba kena yak bôt bap ba lihaa minkôm. Kii David a bi boñ? “David ni bôt ba ba lôñni nye, ba bédés kiñ yap ngii, ba ee, ee ni ee letee kiñ i nañ bo.” U héya hala, bôt bé ba ba “pot le b’a ôm nye ngok.” (1 Samuel 30:1-6) David a bi boma mandutu maa ngélé yada: Bôt bé ba lihaa ba bi gwéla, bisônda gwé bi bé sômbôl nol nye, yak Kiñe Saulô a bé noñ nye. Kinje nduña ikeñi David a bi bana ha ngéda i!
Kii David a bi boñ? A bi pala “lédhene ñem wé yak Yéhôva, Nyambe wé.” Lelaa? Di nyi le David a bi soohe Yéhôva inyu bat nye mahôla, a hoñol ki mahôla Yéhôva a bi lona nye i ngéda kôba. (1 Samuel 17:37; Tjémbi 18:3, 7) David a bé yi le a nlama bat Yéhôva mahôla, jon a bi bat Yéhôva kii a nlama boñ. * I ngéda David a bi yi i jam a bé lama boñ, a pala boñ jo. Sôk i nsôk, ni mahôla ma Yéhôva, ba bi kobol mahaa map ba témbna ki masañgô map. (1 Samuel 30:7-9, 18, 19) Baa u nyimbe i mam maa David a bi boñ? A bi soohe inyu bat Yéhôva mahôla, a bigda mahôla Yéhôva a bi lona nye i ngéda kôba, mbus a bii bisélél i yom Yéhôva a bi kal nye. Lelaa di nla kôna David? Di wan le manjel maa.
KÔNA NDÉMBÉL I DAVID I NGÉDA U GWÉ NDUÑA
1. Soohe. To imbe ngéda di gwé nduña, di soohe Yéhôva le a ti bés ngui ni pék. Ibale di nkal nye i mam momasôna ma ntééñga bés, di ga suha mbegee yés. Tole di nla ki soohe nye inyu ndék ngéda ikété ñem ibale njel ipe i ta bé. Hiki ngéda nu di mbat Yéhôva mahôla, di yé kiñ yada ni David nu a bi kal le “Yéhôva a yé liaa jem, hikôya hiem ni nsôñ wem. Nyambe wem, liaa jem, i nyeni nyen m’a solbene.” (Tjémbi 18:3) Baa masoohe ma yé toi nseñ? Sita yada i i yé nsañal le Kahlia a nkal le: “I ngéda me mal soohe, me yé me ba nwee. Masoohe ma nhôla me i tehe mam kiki Yéhôva, ni i kônde bôdôl nye ñem.” Ntiik, masoohe ma yé loñge njel Yéhôva a ngwélél inyu hôla bés i yémbél nduña.
2. Bigda. I ngéda u mbéñge niñ yoñ, baa u mbigda mandutu u bi pam i yémbél ni mahôla ma Yéhôva? I ngéda di mbigda lelaa Yéhôva a bi nit bés, ni lelaa a bi nit bagwélél bé i ngéda kôba, hala a nlédés bés, di nkônde ki bôdôl Yéhôva ñem. (Tjémbi 18:18-20) Mañ wada u ba nsébél le Joshua a nkal le: “Me gwé kôñtô i masoohe mem Yéhôva a ma timbhe. Hala a nhôla me i bigda i mam me ma bat Yéhôva i masoohe, a ti ki me mo.” Ñ, i ngéda di nhoñol lelaa Yéhôva a ma hôla bés, di nkôhna ngui inyu yémbél to imbe nduña.
3. Bii bisélél. Ilole di mboñ ngim jam, di boñ nyiña ikété Bibel. (Tjémbi 19:8, 12) Ngandak bôt i bi léba le i ngéda ba ntibil tém ngim nlôñ Bibel, ha nyen ba ntibil nok lelaa ba nla ha wo i bisélél mu niñ yap. Mañ wada u ba nsébél le Jarrod a ntoñol le: “I boñ nyiña i nhôla me i wan nlôñ u Bibel i makas momasôna ni i nok kii Yéhôva a yé i kal me. Hala a nhôla toi me i bii i yom me ñañ i bisélél.” I ngéda di mboñ nyiña ikété Bibel, ndi di bii i yom di nigil bisélél, di ga ba nwee, di konok maséé to ibale di gwé nduña.
YÉHÔVA A GA HÔLA WE I YÉMBÉL NDUÑA
David a bi nok le inyu yémbél nduña, di gwé ngôñ ni mahôla ma Yéhôva. A bé maséé ngandak ni mahôla ma Yéhôva, jon a bi kal le: “Lôñni Nyambe wem ki me nlel libap. Nyambe nu a nlédés me ni ngui.” (Tjémbi 18:30, 33) I yé le i pôna wee nduña yés i yé kiki mabap ma di nla bé lel. Ndi ni mahôla ma Yéhôva, di nla yémbél to imbe nduña, to i yé kiki libap! Ñ, i ngéda di nsoohe Yéhôva, di bigda i mam malam a bi bôñôl bés i ngéda kôba, di bii ki i mam di nigil i bisélél, di yé nkwoog nkaa le Yéhôva a ga ti bés ngui ni pék inyu yémbél nduña!
