BOI do gabe metmet roha molo holsoan manang khawatir hita. (Poda 12:25) Hea do hamu torus-torus merasa khawatir sappe hira na so sanggup be martahan? Dang holan hamu na songon i. Sude do hita pasti hea khawatir manang tertekan. Misalna ala mangarawat keluarga na marsahit, ala mate halak na tahaholongi, manang ala masa bencana alam. Jadi boha do carana asa unang torus hamu khawatir? a

Marsiajar ma hita sian Raja Daud. Godang do hasusaanna, bahkan hea do ibana naeng dipamate. Pasti khawatir do si Daud alani i. (1 Sam. 17:34, 35; 18:10, 11) Alai boha do dibahen si Daud mangatasi rasa khawatirna i? Jala aha do na boi taparsiajari sian i?

Hea do sahali ro godang masalah tu si Daud tikki pelarian dope ibana sian Raja Saul. Tikki i, mulak ma si Daud dohot akka tentarana sian parporangan. Tarsonggot ma nasida mangida jabu ni nasida nungnga tartutung, artana nungnga habis dirampok, jala diboan perampok i do keluarga ni nasida. Mangida i, “gabe mangangguki ma si Daud dohot akka tentarana i sappe suda ilu ni nasida”. Tamba do marsak ni si Daud di tikki i ala ‘naeng didangguri akka tentarana i ibana’. (1 Sam. 30:1-6) Boi do dibayakkon hamu songon dia perasaan ni si Daud? Sahali tolu ma ro masalah tu ibana. Keluargana ditawan, ibana pe naeng didangguri, jala sai torus dope dilelei Raja Saul ibana. Pasti khawatir hian do si Daud di tikki i.

Aha do na diulahon si Daud? Martangiang do si Daud, gabe “diurupi Jahowa Debatana i do ibana asa togu”. Boasa pittor martangiang ibana? Ala nungnga somal si Daud martangiang molo adong masalahna. Jala jotjot do ibana mangarimangi songon dia Jahowa mangurupi ibana di tikki naung salpu. (1 Sam. 17:37; Ps. 18:2, 6) Asing ni i, diboto si Daud do na porlu ibana mangido petunjuk sian Jahowa. Dung dilean Jahowa petunjuk, langsung bertindak do si Daud sesuai tu petunjuk i. Hasilna, gabe diurupi Jahowa ma nasida menyelamatton keluargana i. Jala boi dope dapot ni nasida arta naung dirampok i. (1 Sam. 30:7-9, 18, 19) Diparrohahon hamu do aha na diulahon si Daud? Martangiang do ibana asa diurupi Jahowa, dirimangi ibana do songon dia Jahowa mangurupi ibana di tikki naung salpu, jala langsung diulahon si Daud do petunjuk ni Jahowa. Songon dia ma hita boi maniru si Daud? Taida ma tolu carana.

1. Martangiang. Molo khawatir hita, martangiang ma hita tu Jahowa paboahon sude na di rohatta. Tapangido ma asa dilean tu hita bisuk. Boi do gabe tenang pakkilalaatta molo martangiang hita. Molo dang cocok situasina, boi do hita martangiang singkat di bagasan roha. Molo sai tapangido tu Jahowa asa diurupi hita, berarti na pos do rohatta tu Ibana, songon si Daud na mandok, “Jahowa do dolok batu di au, Ibana do benteng di au, jala Ibana do Sipalua di au. Debatakku do dolok batukku, tusi do au marlinggom, Ibana do na gabe perisai di au, Sipalua na gogo, inganan parlinggomakku  na aman.” (Ps. 18:2) Tutu do adong manfaatna martangiang? Donganta perintis na margoar si Kahlia mandok, “Dung martangiang au, gabe dame do huhilala. Gabe boi ma husesuaihon cara marpikkirhu tu cara marpikkir ni Jahowa. Jala lam tamba ma pos ni rohakku tu Ibana.” Hadiah sian Jahowa do tangiang i. Dilehon Ibana do i tu hita lao mangurupi hita mangatasi holso ni rohatta.

2. Mangarimangi. Hea do hamu mangadopi situasi na borat? Molo dirimangi hamu songon dia Jahowa mangurupi hamu saleleng on jala songon dia dibahen Ibana mangurupi akka naposona najolo, gabe tamba ma pos ni rohamuna tu Jahowa jala dame ma pakkilalaanmuna. (Ps. 18:17-19) Sahalak donganta sintua na margoar si Joshua mandok, “Husurat do di sada bukku akka na hutangiakkon jala songon dia Jahowa mangalusi i. Jadi gabe boi ma huingot songon dia Jahowa mangurupi au.” Molo sai tarimangi do songon dia Jahowa mangurupi hita saleleng on, gabe dang sai khawatir be hita alai gabe semangat muse.

3. Mangulahon. Denggan do jolo talului petunjuk ni Jahowa sian Bibel sebelum mambahen keputusan. (Ps. 19:7, 11) Godang do donganta na mangariset ayat ni Bibel lao mamboto songon dia carana mangulahon ayat i di ngoluna. Donganta sintua na margoar si Jarrod mandok, “Dung huriset sada ayat, gabe takkas ma huattusi songon dia menerappon ayat i, jala gabe huboto ma aha na dipangido Jahowa sian au. Ala hubahen songon i, lam pos ma rohakku mangihutton petunjuk ni Jahowa.” Molo takkas taattusi petunjuk ni Jahowa jala taulahon i, gabe moru ma holso ni rohatta.

Diboto si Daud do na porlu ibana diurupi Jahowa asa boi mangatasi kekhawatiranna. Jala diargai si Daud do bantuan ni Jahowa i. Tarida do i sian hatana na mandok, “Boi do hutibbung tembok ala dilehon Debata tu au gogo . . . Debata na sittong do na mangalehon gogo di au.” (Ps. 18:29, 32) Alani boratna, olo do ra tahilala hasusaatta i songon tembok na timbo na so boi ditibbung. Alai molo diurupi Jahowa do hita, boi do taadopi hasusaan manang aha pe. Carana, martangiang ma hita, tarimangi ma songon dia Jahowa mangurupi hita saleleng on, jala taulahon ma petunjuk ni Jahowa. Molo tabahen songon i, pos ma rohatta lehonon ni Jahowa do tu hita gogo dohot bisuk asa boi mangatasi kekhawatiranta.