NGOKƆƐ’N kwla yo kɛ e ti su trɔ nɔnninnɔnnin wie sa. (Nya. 12:25) ?Sa wie ti’n, a koko dan? ?A se ɔ wun kɛ a su kwlá jranman kekle? Sɛ ɔ ti sɔ’n, nán ɔ kunngba yɛ ɔ yo wɔ sɔ-ɔ. E kwlakwla ɔ ju wie’n, e koko. I wie yɛle kɛ e nun wie’m be nian tukpacifuɛ lika annzɛ be sran kun w’a wu, annzɛ sanvuɛsa wie ɲannin be annzɛ kusu sa uflɛ tɔli be su. ?Ngue yɛ ɔ kwla uka e naan y’a jran ngokɔɛ’n i ɲrun kekle-ɔ? *

Sran kun mɔ i su ndɛ’n kwla uka e naan y’a jran ngokɔɛ’n i ɲrun kekle’n yɛle Famiɛn Davidi. Sa sunman be tɔli i su yɛ blɛ wie nun bɔbɔ’n ɔ ka kan naan w’a wu. (1 Sam. 17:34, 35; 18:10, 11) ?Wafa sɛ yɛ Davidi jrannin ngokɔɛ’n i ɲrun kekle-ɔ? ?Wafa sɛ yɛ e kwla niɛn i ajalɛ’n su-ɔ?

Sa kpanngban tɔli Davidi su blɛ kunngba’n nun. Maan e kan sa kun m’ɔ tɔli i su i nun m’ɔ́ wánndi Famiɛn Saili i ɲrun’n i ndɛ. Cɛn kun’n, Davidi nin i sran’m be ɔli alɛ kunlɛ. Kɛ be sali be sin be nanmue nun’n, be wunnin i kɛ be kpɔfuɛ’m be wa wuali be ninnge mun, be wɔli be sua’m be nun kpɛkun be trali be yi nin be mma mun ɔli. ?Kɛ ɔ yoli sɔ’n, ngue yɛ Davidi yoli-ɔ? Biblu’n waan: “David nin i sran’m be tikeli be ti naan b’a sun lelele, siɛn’n be leman fanngan sunman kun.” I kpa bɔbɔ’n, i sran m’ɔ lafi be su’n be waan “bé kún i yɔbuɛ nun.” (1 Sam. 30:1-6) Ɔ maan siɛn’n sa kekle nsan yɛ be o Davidi su-ɔ. I klikli’n yɛle kɛ be kwla kun i awlobofuɛ mun. I nɲɔn su’n, i sran’m be kunndɛ kɛ bé kún i. Kpɛkun i nsan su’n, Famiɛn Saili te fuɛn i. E si kɛ blɛ sɔ’n nun’n, Davidi i wla boli i wun dan.

?I sin’n, ngue yɛ Davidi yoli-ɔ? Kɛ ng’ɔ fa yo i titi’n sa’n, ɔ fɛli i wla ‘guɛli i Zoova i Ɲanmiɛn’n su.’ Yɛle kɛ ɔ srɛli Zoova kɛ ɔ ukɛ i kpɛkun ɔ buli wafa ng’ɔ ukɛli i laa’n i akunndan. (1 Sam. 17:37; Jue. 18:3, 7) Asa’n, Davidi wunnin i wlɛ kɛ ɔ fata kɛ Zoova kle i atin. I sɔ’n ti’n, ɔ usɛli i like ng’ɔ fata kɛ ɔ yo’n. Kɛ Zoova kleli i like ng’ɔ fata kɛ ɔ yo’n, ndɛndɛ kpa ɔ yoli like sɔ’n. Ɔ maan Zoova yrɛli i bɔbɔ nin i sran’m be su. Yɛle kɛ ɔ ukali be maan be deli be nga be trali be’n nin ninnge kwlaa nga be fa ɔli’n. (1 Sam. 30:7-9, 18, 19) E sie i nzɔliɛ kɛ Davidi yoli like nsan. I klikli’n ɔ srɛli Zoova kɛ ɔ ukɛ i. I nɲɔn su’n, wafa nga Zoova ukɛli i laa’n ɔ buli i akunndan. I nsan su’n, ɔ yoli like nga Zoova seli i kɛ ɔ yo’n. ?Kɛ sa o e su’n, wafa sɛ yɛ e kwla nian Davidi i ajalɛ’n su-ɔ? É wá kán wafa nga e kwla yo sɔ’n be nun nsan be ndɛ.

1. Maan e srɛ Zoova. Blɛ kwlaa nga e wla bo e wun’n, maan e srɛ Zoova kɛ ɔ uka e yɛ ɔ man e ngwlɛlɛ. Maan e srɛ i tankaan kpa naan e fa e su sa’n kwlaa e wlɛ i sa nun. Sɛ e o lika kun mɔ e kwlá manman e nɛn’n su e srɛman Ɲanmiɛn’n, e kwla srɛ i e klun lɔ. Blɛ kwlaa nga e srɛ Zoova kɛ ɔ uka e’n, e kle kɛ e lafi i su kɛ Davidi sa. Ɔ seli kɛ: “Anannganman, a ti kɛ yɛbuɛ sa, wɔ yɛ n talo wɔ-ɔ. A ti min fiawlɛ kpa sakpa, wɔ yɛ a de min-ɔn! Min Nyanmiɛn, a ti kɛ yɛbuɛ sa, wɔ nun yɛ n nyan fiawlɛ-ɔ!” (Jue. 18:3) ?Sanngɛ Ɲanmiɛn srɛlɛ’n kwla uka e sakpa? Be flɛ aniaan bla kun m’ɔ ti atin bofuɛ’n kɛ Kalia. Ɔ seli  kɛ: “Kɛ n ko srɛ Ɲanmiɛn’n, min wla gua ase. Ɲanmiɛn srɛlɛ’n uka min maan n bu akunndan kunngba nga Zoova bu’n wie. Kpɛkun n lafi i su kpa n tra laa’n.” Ɲanmiɛn srɛlɛ’n ti like cinnjin kpa kun. Ɔ kwla uka e naan y’a jran ngokɔɛ’n i ɲrun kekle.

2. Maan e bu akunndan. Sɛ e bu sa nga be tɔli e su laa’n be akunndan’n, é wún i kɛ sɛ ɔ ti kɛ Zoova w’a ukaman e’n nn y’a kwlá jranman be ɲrun kekle. Kɛ e bu wafa nga Zoova ukali e bɔbɔ nin i sufuɛ laa mun’n i akunndan’n, e ɲan wunmiɛn kpɛkun e lafi i su kpa tra laa’n. (Jue. 18:18-20) Be flɛ aniaan bian kun kɛ Zosua. Ɔ ti asɔnun kpɛnngbɛn. Ɔ seli kɛ: “Min srɛlɛ nga Ɲanmiɛn tɛli be su’n, n klɛli sieli. I sɔ’n ukali min maan min wla w’a fiman blɛ nga n srɛli Zoova i like trele wie m’ɔ fa mannin min’n be su.” Sakpa, kɛ e bu ninnge nga Zoova yo mannin e’n be akunndan’n, i sɔ’n man e wunmiɛn naan y’a jran ngokɔɛ’n i ɲrun kekle.

3. Maan e fa ajalɛ. Sɛ sa o e su’n, kwlaa naan y’a yo like kun’n, maan e dun mmua e nian Ɲanmiɛn Ndɛ’n nun naan ɔ kle e atin. (Jue. 19:8, 12) Aniaan sunman be waan kɛ be suan ndɛ mma wie’m be su like kpa’n, be wun wafa nga be kwla nanti su’n i wlɛ kpa. Be flɛ aniaan bian kun m’ɔ ti asɔnun kpɛnngbɛn’n kɛ Zarɔdi. Ɔ seli kɛ: “Kɛ n suan ndɛ mma kun i su like’n, n wun i wlɛ kpa ekun. Kpɛkun n wun like trele nga Zoova kunndɛ kɛ n yo’n i wlɛ wie. I sɔ’n yo maan n lafi ndɛ nga n kanngannin nun’n i su. Ɔ maan n kwla yo i nuan su sa.” Ɔ maan kɛ sa o e su’n, maan e nian Ɲanmiɛn Ndɛ’n nun. Kpɛkun e nanti atin nga Zoova kle e’n su. Sɛ e yo sɔ’n, é jrán ngokɔɛ’n i ɲrun kekle.

Davidi wunnin i wlɛ kɛ sɛ ɔ kunndɛ kɛ ɔ́ jrán ngokoɛ’n i ɲrun kekle’n, ɔ fata kɛ Zoova ukɛ i. Kɛ Zoova ukɛli i’n ɔ yoli i fɛ dan ti’n, ɔ seli kɛ: “Ɔ fanngan nun e nin klɔ wie sufuɛ mun e kwla kun. I yɛ ɔ man min fanngan-an.” (Jue. 18:30, 33) Kɛ sa’m be tɔ e su’n, ɔ ju wie’n ɔ yo e kɛ e su kwlá jranman be ɲrun kekle sa. Sanngɛ Zoova fanngan nun’n, e kwla jran kekle. Ɔ maan kɛ sa o e su’n, maan e srɛ Zoova kɛ ɔ uka e. Kpɛkun wafa ng’ɔ ukali e laa’n, maan e bu i akunndan. Asa’n, maan e nanti atin ng’ɔ kle e’n su. Sɛ e yo sɔ’n, ɔ́ mán e wunmiɛn nin ngwlɛlɛ naan y’a jran ngokɔɛ’n i ɲrun kekle.