AMASAKAMIKA yalenga umutima wa muntu ukufinininwa. (Amapi. 12:25) Bushe mwalikwatapo amafya ayalenga mwasakamana sana? Bushe mumfwa kwati te kuti mutwalilile ukushipikisha aya mafya? Nga e fyo mumfwa, te imwe mweka mumfwa ifyo. Inshita shimo tulomfwa sana ukunaka, tulasakamikwa sana kabili tulaba no bulanda pa milandu iyalekanalekana. Ku ca kumwenako, bamo balasakamana balupwa lwabo abalwala, bambi balifwilwa e lyo bambi nabo baliponenwa na masanso ayakalamba. Nomba kuti twacita shani nga ca kuti natusakamikwa? *

Kuti twasambilila ifya kucita nga natusakamikwa ku fyo Imfumu Davidi yacitile. Yalikwete amafya ayengi kabili inshita shimo balefwaya fye no kuipaya. (1 Sam. 17:34, 35; 18:10, 11) Finshi Davidi acitile ilyo asakamikwe kabili kuti twamupashanya shani?

Davidi alikwete amafya ayengi pa muku umo. Ku ca kumwenako, natulande pa fyacitike ilyo Davidi alefulumuka imfumu Shauli iyalefwaya ukumwipaya. Ilyo Davidi na baume bakwe babwelele ku bulwi, basangile ukuti abalwani babo nabeba fyonse ifyo bakwete, naboca amayanda yabo, kabili nabasenda ne ndupwa shabo muli bunkole. Bushe Davidi acitile shani? “Davidi na bantu abali nankwe basanswile amashiwi yabo, balalila, mpaka amaka ya kulila yapwa.” Davidi aishileba sana no bulanda ilyo abantu abo acetekele “basosele ukuti bali no kumupoola amabwe.” (1 Sam. 30:1-6) Davidi alikwete amafya yatatu ayakalamba pa nshita imo ine: Ulupwa lwakwe balilusendele muli bunkole, abaume bakwe nabo balefwaya ukumwipaya kabili Imfumu Shauli nayo yalefwaya ukumwipaya. Davidi afwile alisakamikwe sana!

Bushe Davidi acitilepo shani? Ilyo line fye “alombele amaka ukufuma kuli Yehova Lesa.” Bushe nalimo alombele shani amaka ukufuma kuli Yehova? Davidi lyonse alepepa kuli Yehova no kutontonkanya sana pa fyo amwafwilepo ku numa. (1 Sam. 17:37; Amalu. 18:2, 6) Alishibe ukuti alekabila ukwipusha Yehova pa kuti amwebe ifya kucita. E ico aile kuli shimapepo Abiatari no kumweba ‘ukupalamika efode kuli ena’ pa kuti epushe Yehova ifyo alingile ukucita. Ilyo Yehova amwebele ifya kucita, apo pene fye Davidi alicitile ifyo bamwebele. Ne cacitike ca kuti Yehova alimupaalile pamo na baume bakwe kabili bapokolwele indupwa shabo na fyonse ifyo basendele. (1 Sam. 30:7-9, 18, 19) Bushe namumona ifintu fitatu ifyo Davidi acitile? Alipepele ukuti Yehova amwafwe, alitontonkenye pa fyo Yehova amwafwile ku numa, kabili alicitile ne fyo Yehova amwebele. Kuti twapashanya shani Davidi? Natulande pa fintu fitatu ifyo twingasambililako.

1. Mulepepa. Lyonse ilyo tuli na masakamika tulepepa kuli Yehova ukuti aletwafwa no kutupeela amano. Nga twaeba Yehova fyonse ifiletusakamika kuti twaumfwako bwino. Kabili pa mulandu ne fyo ifintu fili ukulingana no ko tuli, kuti twapepa ipepo ilipi ilya mu mutima. Nga ca kuti tulelomba Yehova ukuti aletwafwa tukalanga ukuti twalimucetekela nga filya fine Davidi amucetekele ilyo atile:  “Yehova e cilibwe candi kabili e uncingilila kabili e wa kumpokolola. Lesa wandi e cilibwe candi. E mo nakulauba.” (Amalu. 18:2) Bushe ipepo kuti lyatwafwa? Bankashi Kahlia bapainiya batile: “Nga ndi no bwafya e lyo napepa umutima ulekala. Ipepo lilalenga ndetontonkanya nge fyo Yehova atontonkanya kabili lilalenga ndemucetekela sana.” Ipepo bupe ubo Yehova atupeela ubulenga tuleshipikisha ilyo tuli na masakamika.

2. Muletontonkanya pa fyo Yehova amwafwapo. Nga mwatontonkanya pa fyamucitikila, bushe kuti mwaibukisha ifyo Yehova amwafwilepo ukushipikisha ilyo mwali no bwafya? Nga twatontonkanya pa fyo Yehova atwafwapo nelyo ifyo aafwile ababomfi bakwe aba ku kale, cilalenga twaleka ukusakamana sana kabili tulamucetekela sana. (Amalu. 18:17-19) Ba Joshua baeluda batile: “Nalikwata apo nemba nga Yehova aasuka ipepo lyandi. Ici cilalenga ndeibukisha inshita nalombelepo fimo kuli Yehova kabili ampeele fye ifyo fine namulombele.” Nga twatontonkanya pa fyo Yehova atucitilapo, cilalenga twaba na maka kabili twaleka ukusakamana.

3. Mulecita ifyo Yehova amweba ukucita. Ilyo tushilapingulapo ifya kucita, tulingile intanshi ukufwailisha mu Cebo ca kwa Lesa pa kuti twishibe ifya kucita. (Amalu. 19:7, 11) Abengi basanga ukuti nga bafwailisha pe lembo limo, e lyo beshibilako ifya kulibomfya. Ba Jarrod batile: “Nga nafwailisha ifyebo pe lembo limo cilalenga ndeishiba ifyo Yehova alefwaya ncite. Ici cilalenga ndecetekela sana ifyo ndebelenga no kucita ifyo ndesambilila.” Nga tulefwailisha mu Malembo ifyo Yehova alefwaya ukuti tucite e lyo no kucita ifyo fine, cikalenga tukateeke umutima kabili tukabe ne nsansa nangu natusakamikwa.

Davidi alishibe ukuti pa kuti aleke ukusakamikwa alekabila Yehova ukumwafwa. Aletasha sana pa fyo Yehova alemwafwa, e calengele alande ukuti: “Ku maka ya kwa Lesa wandi kuti naciluka icibumba. Lesa wa cine e unkaka amaka mu musana.” (Amalu. 18:29, 32) Limo kuti twalaumfwa kwati amafya twakwata yakalamba nge cibumba. Lelo Yehova nga atwafwa kuti twacimfya amafya ayali yonse ayaba nge cibumba! Kanshi nga tulepepa kuli Yehova ukuti aletwafwa, tuletontonkanya pa fyo atwafwapo e lyo no kukonka ifyo aletweba ukucita, kuti twacetekela ukuti akatupeela amaka na mano ayakalenga tukeshibe ifya kucita nga natusakamikwa.