WARI i save kam olsem wan hevi samting long hat blong yumi. (Prov. 12:25) ?Samtaem yu yu harem nogud from we yu wari tumas, mo yu harem se yu no save winim wari ya? Sipos yes, tingbaot se i no yu wan nomo. Plante long yumi oli harem se oli taed, oli wari, mo oli stres from plante defren risen. Eksampol, sam oli mas lukaot long famle blong olgeta we i sik, samfala famle blong olgeta i ded, mo sam narafala oli safa from wan disasta. ?Be wanem i save halpem yumi blong dil wetem wari? a

Yumi save lanem blong dil wetem wari taem yumi tingbaot eksampol blong King Deved. Hem i fesem plante trabol long laef blong hem, mo samtaem laef blong hem i stap long denja. (1 Saml. 17:34, 35; 18:10, 11) ?Deved i mekem wanem taem hem i wari? ?Olsem wanem yumi save folem eksampol blong hem?

Deved i fesem plante problem long semtaem. Eksampol, traem tingbaot samting we i hapen taem hem i stap ronwe long King Sol we i wantem kilim hem. Taem Deved mo ol ami blong hem oli kambak long kamp blong olgeta, oli faenemaot se ol enemi oli kam stilim olting blong olgeta, oli bonemdaon ol haos blong olgeta, mo oli tekemaot ol famle blong olgeta. ?Deved i harem olsem wanem? “Deved wetem ol man blong hem oli stat blong krae bigwan gogo kasem we oli no moa gat paoa blong krae.” Antap long hemia, Deved i wari bigwan from we ol man we hem i trastem olgeta oli “stap talem se bambae oli stonem hem.” (1 Saml. 30:1-6) Deved i fesem tri bigfala problem long sem taem: Famle blong hem i stap long denja, hem i fraet se ol man blong hem bambae oli kilim hem, mo King Sol i stap ronem hem yet. !Taswe i sua se Deved i wari bitim mak!

?Wanem nekiswan samting we Deved i mekem? Kwiktaem nomo hem i lukluk i go long “Jehova we i God blong hem, blong i mekem hem i kam strong bakegen.” ?Hem i mekem samting ya olsem wanem? Deved i gat fasin ya blong prea long Jehova blong i givhan long hem, mo i tingbaot olsem wanem Jehova i bin halpem hem bifo. (1 Saml. 17:37; Sam 18:2, 6) Deved i luksave se hem i nidim advaes blong Jehova, taswe hem i askem Jehova blong i talem samting we hem i mas mekem. Afta we Deved i kasem daereksen long Jehova, kwiktaem nomo hem i folem. From samting ya, Jehova i blesem Deved mo ol man blong hem, mo i mekem se oli kasembak olting blong olgeta mo ol famle blong olgeta. (1 Saml. 30:7-9, 18, 19) ?Yu makem trifala samting we Deved i mekem? Hem i prea blong Jehova i givhan long hem, hem i tingtingbak long ol samting we Jehova i bin mekem blong halpem hem, mo i folem daereksen blong Jehova. ?Olsem wanem yumi save folem eksampol blong Deved? Bambae yumi tokbaot tri rod.

1. Prea. Enitaem we yumi stat blong wari, yumi save prea long Jehova blong i halpem yumi mo i givim waes long yumi. Taem yumi talemaot olgeta wari blong yumi long Jehova, hemia bambae i mekem se yumi harem gud moa. Sipos yumi stap long wan situesen we yumi no gat plante taem blong prea, yumi save talem wan sot prea nomo long hat blong yumi. Evritaem we yumi askem Jehova blong i halpem yumi, yumi soemaot se yumi trastem hem olsem Deved, we i talem se: “Jehova hem i hol blong ston blong mi mo i strong ples  blong haed blong mi, mo Hem nao i sevem mi. God blong mi hem i bigfala ston blong mi, we mi stap go haed long hem.” (Sam 18:2) ?I tru se prea i rili save givhan? Wan paenia sista we nem blong hem Kahlia i talem se: “Afta we mi prea, mi harem se mi gat pis. Prea i halpem mi blong gat sem tingting olsem Jehova, mo blong mi trastem hem moa.” Yes, prea i wan nambawan presen we Jehova i givim, we i save halpem yumi blong dil wetem wari.

2. Tingtingbak. Taem yu tingtingbak long ol samting we i hapen long yu bifo, ?yu tingbaot wan trabol we yu naf blong winim from we Jehova i bin halpem yu? Taem yumi tingbaot olsem wanem Jehova i bin halpem yumi mo ol man blong hem bifo, hemia i mekem yumi gat paoa mo yumi trastem hem moa. (Sam 18:17-19) Wan Elda we nem blong hem Josua i talem se: “Mi gat wan lis blong ol prea we Jehova i bin ansarem. Hemia i halpem mi blong tingbaot ol taem we mi bin askem stret wan samting long Jehova mo hem i givim samting we mi nidim.” Yes, taem yumi tingbaot olsem wanem Jehova bin halpem yumi bifo, hemia i mekem se yumi gat paoa blong dil wetem wari.

3. Folem daereksen. Bifo we yumi mekem desisen long wan situesen, yumi save lukluk i go long Tok blong God we i save lidim gud yumi. (Sam 19:7, 11) Plante man oli luk se taem oli mekem risej long wan stret vas, hemia i mekem oli kasemsave olsem wanem vas ya i stret long laef blong olgeta. Wan Elda we nem blong hem Jarrod i talem se: “Taem mi mekem risej long wan vas, mi lanem plante moa samting mo mi kasemsave long samting we Jehova i stap talem long mi. Hemia i halpem mi blong bilivim fulwan ol samting we mi ridim, taswe mi save folem ol advaes we mi lanem.” Taem yumi lukaotem daereksen blong Jehova long Baebol mo yumi folemgud ol daereksen ya, bambae i moa isi blong yumi dil wetem wari.

Deved i kasemsave se blong dil wetem wari, hem i nidim help blong Jehova. Hem i glad tumas long help blong Jehova, taswe hem i talem se: “Paoa blong God nao i mekem se mi save klaem i go narasaed long wan stonwol. Tru God nao i givim paoa long mi, olsem klos we mi werem.” (Sam 18:29, 32) Maet yumi save harem se ol trabol blong yumi oli bigwan tumas olsem wan stonwol we yumi no save klaem ovarem. !Be wetem help blong Jehova yumi save stanap strong long eni bigfala trabol! Yes, taem yumi prea long Jehova blong i halpem yumi, yumi tingbaot ol samting we hem i bin mekem blong yumi, mo yumi folem ol daereksen blong hem, yumi sua se bambae hem i givim paoa mo waes we yumi nidim blong dil wetem ol wari blong yumi.