TE ỌMWA nọ si osi yevbe ọmwa nọ mu ihẹ nọkhua yan uhunmwu. (Itan 12:25) Osi he ka ya iro han ruẹ ẹdẹ ra, sẹrriọ wẹẹ, u na ghi do gha roro ẹre wẹẹ, ui khian miẹn uhunmwu vbọ? Ọ ghaa yerriọ, ẹi re uwẹ ọkpa ẹre ọ he sunu daa. Emwi bun nọ wa ya ima nibun si osi, sẹrriọ wẹẹ, te iro ghi kue han ima. Vbe igiemwi, eso vbe uwu ima ẹre ọ ghi gbaroghe emwa ima vbe uwu ẹgbẹe ni khuọnmwi, nọ ne ima eso, emwa ima ne ima hoẹmwẹ ọnrẹn wu, vbene eso vbe uwu ima na rri oya rhunmwuda odekun ẹrhia nọ sunu. Sokpan de emwi nọ gha ru iyobọ ne ima, ne ima ghẹ gha si osi gbe? *

Ma gha wa miẹn emwi nibun ruẹ vbe okha ọghe Devid, nọ gha ru iyobọ ne ima, ne ima ghẹ gha si osi gbe. E Devid miẹn emwi vbe agbọn, uhiẹn ẹghẹ eso ghaa rrọọ na khian na te gbe ẹre rua. (1 Sam 17:​34, 35; 18:​10, 11) Vbọ ru iyobọ nẹẹn, nọ ma na gha si osi gberra egbe? Vbe ima khian ya ya egbe taa ẹre hẹ?

Ọlọghọmwa nibun ẹre Devid wa miẹn vbe uhukpa. Muẹn roro, emwi nọ sunu vbe ẹghẹ ne Devid na gha lẹẹ khian, rhunmwuda ne Ọba ighẹ Sọl khian na te gbe ẹre rua. E Devid vbe ivbiyokuo ẹre ghi ke okuo rre, ọ keghi kpa iran odin vbe iran ghi do miẹn wẹẹ, a do emwi iran hia viọ, a giẹn owa iran sẹ otọ, a na vbe viọ ẹgbẹe iran kpa. De emwi ne Devid ghi ru? “E Devid kevbe emwa rẹn ke gbe eve rua, iran keghi viẹ viẹ viẹ, a te do miẹn wẹẹ orhiọn i ghi rre iran iwu hiehie.” Vbe uwu ena hia, ivbiyokuo ẹre ni lele ẹre khian, na te gha hoo ne iran “filo okuta gbe ẹre.” (1 Sam 30:​1-6) Ọlọghọmwa eha ẹre Devid wa miẹn vbe uhukpa: Ọ ma rẹn emwi nọ khian sunu daa ẹgbẹe ọre, ohan vbe gha muẹn ne ivbiyokuo ẹre ghẹ ya gbe ẹre rua, na kha na, Ọba ighẹ Sọl ye khu ẹre khian. Ẹi mwẹ ena hia ma gha ya e Devid si osi!

De emwi ne Devid ghi ru? E Devid keghi kue ne “Jehova rhie igiọdu ne irẹn vbobọvbobọ.” De vbene Devid ya ru ọna hẹ? Te Devid wa gha na erhunmwu vbe ẹghẹ hia ne Jehova ru iyobọ ne irẹn, ọ na vbe gha muẹn roro emwi hia ne Jehova he ru nẹẹn. (1 Sam 17:37; Psm 18:​2, 6) E Devid rẹnrẹn wẹẹ, e Jehova ẹre ọ khẹke nọ tama irẹn emwi ne irẹn gha ru. Ọni ẹre ọ si ẹre nọ na nọ e Jehova, emwi nọ khẹke ne irẹn ru. E Jehova ghi tama e Devid emwi nọ khẹke nọ ru, ọ na wa zẹ owẹ lele ẹre vbobọvbobọ. E Jehova ma he iran yọ hiehie, ọ keghi ru iyobọ ne iran, ne iran ya sẹtin miẹn ẹgbẹe ọghe iran fan, iran na vbe sẹtin viọ emwi ewe ọghe iran vbe obọ eghian ọghe iran. (1 Sam 30:​7-9, 18, 19) De emwi eha ne Devid ru, nọ ru iyobọ nẹẹn? Ọ keghi na erhunmwu ne Jehova ru iyobọ ne irẹn, ọ na gha muẹn roro vbene Jehova he ya ru iyobọ ne irẹn hẹ, vbe ẹghẹ nọ gberra, ọ na vbe ru emwi ne Jehova wẹẹ nọ ru. Vbe ima khian ya sẹtin ya egbe taa e Devid hẹ? Gi ima ziro yan odẹ eha ne ima gha ya sẹtin ru vberriọ.

1. Na erhunmwu. Ẹghẹ ke ẹghẹ ne ima ya si osi, ọ khẹke ne ima na erhunmwu ne Jehova ru iyobọ ne ima kevbe nọ rhie ẹwaẹn ne ima. Ma ghaa fannọ otọ ẹko ima ma e Jehova vbe erhunmwu, orhiọn ima ghi sẹ otọ. A gha wẹẹ ẹkpotọ ma kie ne ima ya na erhunmwu nọ taẹn, ma sẹtin na erhunmwu ne kuẹi ye uwu ekhọe. Ẹghẹ ke ẹghẹ ne ima ya tu tie Jehova nọ ru iyobọ ne ima, te ima rhie ẹre ma wẹẹ, ma mu ẹtin yan rẹn vbene Devid ghaa ye. E Devid khare wẹẹ: “E Jehova ọre nọ degue mwẹ, irẹn ọre owa ọkhẹ mwẹ  nọ wegbe. Osanobua mwẹ ọre nọ rhie mwẹ lẹre, I ghaa rre ehe nọ ye, ẹbe i ghi rrọọ mẹ.” (Psm 18:2) Erhunmwu gele mwẹ esa nọ ye ra? Ọtẹn nokhuo ọkpa nọ re arọndẹ, na tie ẹre Kahlia khare wẹẹ: “I gha wa na erhunmwu nẹ, orhiọn mwẹ ghi wa sẹ otọ. Erhunmwu keghi ru iyobọ mẹ, ne I ya gha ghee emwi vbene Jehova ghee ẹre, ọ vbe ru iyobọ mẹ ya mu ẹtin yan rẹn sayọ.” Vbene ẹmwata, erhunmwu keghi re ẹse ọhẹ nọ ke obọ e Jehova rre, nọ ru iyobọ ne ima, ne ima ghẹ gha si osi gbe.

2. Gha muẹn roro emwi ne Jehova he ru nuẹn. U ye yerre, vbene Jehova ya ru iyobọ nuẹn, vbe ẹghẹ ne u na gha rre uwu ọlọghọmwa ra? Ma ghaa muẹn roro, vbene Jehova he ya ru iyobọ ne ima kevbe eguọmwadia ẹre vbe ẹghẹ nọ gberra, ẹrhiọn ghi la ima iwu, ma ghi vbe do mu ẹtin yan e Jehova sayọ. (Psm 18:​17-19) Ọdiọn ọkpa na tie ẹre Joshua keghi kha wẹẹ: “Ẹghẹ ke ẹghẹ ne Jehova ya họn erhunmwu mwẹ, I wa gbẹn ọnrẹn yotọ. Ọna keghi ya mwẹ yerre vbene Jehova he ya họn erhunmwu mwẹ vbe ẹghẹ nọ gberra.” Vbene ẹmwata, ma ghaa muẹn roro emwi hia ne Jehova he ru ne ima, ẹrhiọn ghi la ima iwu, ẹghẹ nii ma i khian ghi gha si osi gbe.

3. Zẹ emwi ru. Emwi gha de rre, ọ khẹke ne ima ghee Ẹmwẹ Osanobua ne ima mieke na rẹn emwi nọ khẹke ya ru. (Psm 19:​7, 11) Emwa nibun do bẹghe ẹre wẹẹ, iran gha rhie ẹghẹ ya gualọ otọ ako ọghe evbagbẹn nọhuanrẹn, ẹre iran na rẹn vbene ako nii khian ya ru iyobọ ne iran hẹ. Ọdiọn ọkpa na tie ẹre Jarrod khare wẹẹ: “I wa miẹn emwi nibun ruẹ, vbe I ghaa gualọ otọ ako ọghe evbagbẹn nọhuanrẹn ne I tie. Ọ wa vbe ru iyobọ mẹ ya rẹn emwi ne Jehova tama mwẹ vbe ako nii. Ọna keghi ya mwẹ rẹn otọ ako ne I tie, I ghi vbe sẹtin zẹ owẹ lele ẹre.” Ma ghaa tie Baibol, ne ima mieke na rẹn emwi ne Jehova wẹẹ ne ima ru, orhiọn ima ghi sẹ otọ, ẹghẹ nii, ma i ghi si osi gbe.

E Devid rẹnrẹn wẹẹ, e Jehova ẹre ọ khian sẹtin ru iyobọ ne irẹn, ne irẹn ghẹ gha si osi gbe. E Devid wa kakabọ gbọyẹmwẹ ye iyobọ ne Jehova ru nẹẹn, ọna ẹre ọ si ẹre nọ na kha wẹẹ: “Vbe ẹtin Osanobua I gha sẹtin san egbekẹn. Osanobua ọghe ẹmwata ẹre ọ ya mwẹ wegbe.” (Psm 18:​29, 32) Ọlọghọmwa ne ima ye sẹtin yevbe egbekẹn ne ghete, ne ima i sẹtin san. Vbe ẹtin e Jehova, ai miẹn ọlọghọmwa ne ima i sẹtin la gberra, ọ gha khọnrẹn nọ yo ghete vbene a ghee egbekẹn! Vbene ẹmwata, ma ghaa na erhunmwu ne Jehova ru iyobọ ne ima, ma na gha muẹn roro vbene ọ ka ya ru iyobọ ne ima hẹ, ma na vbe gha ru emwi nọ wẹẹ ne ima ru, ma gha sẹtin gha mwẹ ilẹkẹtin wẹẹ, ọ gha rhie ẹtin kevbe ẹwaẹn ne ima, ne ima ghẹ mieke na gha si osi gbe!