ÉYOÑE nlem ô tyele bia yôp, a ne ane bi be’e adite mbe’e. (Min. 12:25) Ye jam éziñ e boya na nlem ô tyebe wo yôp? Ye ô wô’ôtaneya môs éziñe na ô nji beta bi ngule ya jibi jam éziñ? Nge é ne nalé, yeme’e na ô se ke étam. Éko éziñ na abui ya be bia e tebeya été éte, amu ba nyoñe ngap a ébu’a ya nda bôte jaba ja kon, nge ke amu môte ba nye’e a nga wu, a ne fe bo amu ébubua éziñ é nga kui vôme be too. Nde ñhe, jé é ne volô bia na bi bôône minleme si a ba’ale ava’a dangan? *

Nkañete Njô bôte David ô ne volô bia na bi yeme dañ mam ma tyelé bia minleme yôp, nge ke na bi jibi me. David a nga tôban angôndô ya abui minju’u ényiñe jé, e nga kui fe na a fam awu biyoñe biziñ. (1 Sa. 17:34, 35; 18:10, 11) Jé é nga volô David na a dañe nju’ ôte? Aval avé bi ne tôñ éve’ela jé?

David a nga tôban abui minju’u fifiti. Tame yene mam me nga kui nye nté a mbe a tubu’u Njô bôte Saül a mbe a kômbô’ô wôé nye. Éyoñe David ba be bôte bé be nga so bita, be nga koone na besiñe bap be maneya zu sa akume dap, a menda map, a kee menda me bôte map minkôm. Nde David a nga bo aya? Kalate Zambe a jô na: “David ba be bôt be nga to nsamba wé be nga bete metyiñe yôp a yôn, akekui be nga to te fe ngule ya beta yôn.” Fo’o ve ane abim ete e nji yian, bôte David a mbe a too be ndi be nga taté na ba “kobô ajô ya lume nye mekok.” (1 Sa. 30:1-6) David a nga tôbane minju’u milal éyoñe jia: Nda bôte jé é mbe é tele mbia été, a mbe a koo woñe na bôte bé be wôé nye, Njô bôte Saül a mbe a jeñe’e na a wôé nye. Tame ve’ele simesan aval avé mam mete mese me mbe ve tyelé David nleme yôp!

Nde jé David a nga bo? Été été, “a nga ve nlem ngu be Yéhôva Zambe wé.” Aval avé a nga bo de? Bia yeme na David a mbe a bili fulu ya ye’elane Yéhôva, a bindi mbamba be mam bese Yéhôva a jaéya zu a bo asu dé. (1 Sa. 17:37; Bs. 18:2, 6) David a nga yene na a yiane jeñe mvolane Yéhôva, ajô te a nga sili Yéhôva jam a mbe a yiane bo. Éyoñe Yéhôva a nga mane ve David melep, a nga tôñe me été été. Nalé a nga bo na Yéhôva a botane nye a bôte bé, ane be nga kôté menda me bôte map, a beta nyoñ akume dap. (1 Sa. 30:7-9, 18, 19) Ye wo te yene mam melale David a nga bo? A nga ye’elane Yéhôva na a volô nye, a nga simesan mam Yéhôva a nga bo asu dé melu mvus, a a nga tôñe melebe me Yéhôva. Aval avé bi ne vu David? Bi tame zu yene mam melal bi ne bo.

1. Ye’ela’an. Éyoñ ése jam éziñe da tyele wo nleme yôp, ô ne ye’elane Yéhôva asu na a volô wo, a na a ve wo fek. Éyoñe wo kate nye mam ma ndeñele wo, a ne bo na nlem ô bômbô wo si. Ve nge bi tele aval été ja ve ke bia fane ya kôme yoé Nye nleme wongan, bi ne bo bone bitune meye’elan nlem été. Éyoñ ése bia ke jeñe mvolane be Yéhôva a zene ya meye’elan, a ne ve ane bia fe bia jô mejô me David ma: “Yéhôva a ne ako’o dam, a ôleme viam, a nyii wom; Zambe wom, ako’o dam, nnye ate ma ye sobô be nye.” (Bs. 18:2) Nde ye meye’elan me ne fo’o kôme volô bia? Kahlia, sita éziñ a ne nkpwa’a mefan, a jô na: “Éyoñe me maneya ye’elan, ma kôme wô’ôtan ane nlem ô  bôô ma si ne mieññ. Meye’elane ma volô ma na me bi ôsimesane Yéhôva, a na me tu’a tabe Nye ndi.” Teke vaa nge beté, meye’elane me ne beta das a so bia be Yéhôva, a ma volô bia na bi dañe mam ma tyelé bia minleme yôp, nge ke na bi jibi me.

2. Nyoñe’ éyoñe ya simesan avale Yéhôva a zuya a su’u wo melu mvus. Éyoñe wo simesane minju’u mise mi kuiya wo ényiñe jôé, ye ô ngenan ô simesa’ane mi miziñ ô nga kui na ô jibi fo’o ve amu mvolane Yéhôva? Éyoñe bia simesan aval Yéhôva a zuya a su’u bia, a aval a nga volô bebo bisaé bé ya melu mvus, bia bi ngule nyul a bia tu’a tabe Nye mebun. (Bs. 18:17-19) Mvendé éziñ é ne jôé na Joshua ja jô na: “Éyoñ ése Yéhôva a yalan meye’elane mam, ma tili biyalan bite mone ntili. Nalé a nga volô ma na me simesane biyoñe bise Yéhôva a nga yalane meye’elane mam éyoñe me nga sili nye ngume jam éziñ, a aval a nga ve ma fo’o ve jam e mbe e yiane ma.” Ôwé, éyoñe bia nyoñ éyoñe ya bo bi simesa’an avale Yéhôva a zuya a volô bia melu mvus, nalé é bo na bi bi ngule ja yian asu na bi dañe mam ma tyelé bia minleme yôp.

3. Mimboon. Ôsusua na bia nyoñe ntyi’an a lat a jam éziñ, bi ne ke jeñe melebe Kalate Zambe. (Bs. 19:7, 11) Bôte béziñ be nga yene na, éyoñe ba jeñe na be tu’a wô’ô éfus éziñe ya Kalate Zambe, nalé a volô be na be yen aval avé be ne tôñe melebe ya éfus éte ényiñe jap. Mvendé éziñ é too jôé na Jarrod ja jô na: “Éyoñe ma vune bekalate bangan, nalé a volô ma na me yeme mam mese me tii a éfus éte, a na me tu’a yemelane jam Yéhôva a yi na me bo. Nalé a volô ma na me tu’a tabe ndi a jam ma lañ, ndemben mé bo ngule ya tôñe melebe Mé.” Éyoñe bia jeñe mvolane Yéhôva a zene ya Kalate Zambe, a éyoñe bia tôñ zen a liti bia, bii bo nkômesane ya wosane mam ma tyelé bia minleme yôp.

David a mbe a kôme’e yeme na asu na a dañe mam ma tyelé nye nleme yôp, a yiane jeñe mvolane Yéhôva. A nga wô’ô mvolane Yéhôva mvaé aval e ne na, a nga jô na: “Amu Zambe wom nde te ma yôô aka’a meko’o yôp. Zambe ate, nyô a jalé me ngul angeteñ.” (Bs. 18:29, 32) Bi ne wô’ôtane ve ane meve’ele bia tôbane me me ne ane aka’a meko’o bi vo’o dañ. Ve a mvolane Yéhôva, bi ne kui na bi dañ aka’a meko’o ete! Teke vaa nge beté, nge bia ye’elane Yéhôva na a volô bia, nge bia simesane mam mese a zuya a bo asu dangan, a nge bia tôñ zen a liti bia, bi ne tabe ndi na é ve bia ngul a fe’e ja sili asu na bi dañe mam ma tyelé bia minleme yôp!