WEN wi feel schres owt, da laik wi ga wahn hevi load pahn wi haat. (Prov. 12:25) Yu eva sofa bikaaz yu feel soh schres owt? Yu eva feel laik yu kyaahn goh nohmoh? If dat da how yu feel, yu noh deh bai yuself. Wahn lata wi feel taiyad, schres owt, ahn dipres fi difrent reezn. Maybi da bikaaz wi di tek kayr a sohnbadi weh sik, maybi sohnbadi weh wi lov ded, er maybi wi di sofa bikaaz wi gaahn chroo wahn nachral dizaasta. Bot how wi ku bayr op wen wi deh anda schres? *

Wi ku laan wahn lat fahn King Dayvid egzampl bowt how wi ku bayr op anda schres. Hihn gaahn chroo wahn lata haad taimz eena ih laif. Ahn sohntaim ih laif mi deh eena daynja. (1 Sam. 17:34, 35; 18:10, 11) Weh mi help Dayvid fi noh giv op? Ahn how wee ku fala fi hihn egzampl?

Dayvid mi-di deel wid wahn lata prablemz sayhn taim. Fi egzampl, tink bowt weh Dayvid mi gaahn chroo wen hihn mi-di ron weh fahn King Saal, hoo mi waahn kil ahn. Wen Dayvid an ih soalja dehn mi reech hoam da Ziklag, dehn mi shak fi fain owt dat dehn enimi mi teef dehn tingz, bon dong dehn hows, ahn kyapcha dehn famili. Weh Dayvid mi du? Dayvid an ih soalja dehn mi staat “baal ahn baal til dehn neva ga di schrent fi baal nohmoh.” Ahn pahn tap a evriting els, di man dehn weh Dayvid mi chros mi waahn stoan ahn tu det. (1 Sam. 30:1-6) Now Dayvid mi ga chree big prablemz fi deel wid sayhn taim: Ih famili mi deh eena daynja, hihn mi frayd dat ih soalja dehn kil ahn, an King Saal stil mi-di chays afta ahn. Jos imajin how schres owt Dayvid mi feel!

Soh weh Dayvid mi du? Rait away Dayvid mi geh “schrent fahn Jehoava ih Gaad.” How hihn mi du dat? Wi noa dat Dayvid mi aalwayz pray tu Jehoava fi help, an ih mi aalwayz tink bak pahn how Jehoava help ahn eena di paas. (1 Sam. 17:37; Ps. 18:2, 6) Dayvid mi noa dat ih mi need fi aks Jehoava fi help, soh hihn mi aks Jehoava weh fi du. Afta Jehoava tel Dayvid weh fi du, rait away hihn gaahn du it. Bikaaz a dat, Jehoava mi bles Dayvid an ih soalja dehn ahn dehn kuda mi reskyu dehn famili ahn geh bak dehn bilanginz. (1 Sam. 30:7-9, 18, 19) Yoo mi noatis chree tingz weh Dayvid mi du? Hihn mi pray tu Jehoava fi help, ih mi tink bak pahn how Jehoava mi help ahn eena di paas, an ih mi obay Jehoava dairekshan. How wee ku fala Dayvid egzampl? Kansida dehnya chree wayz.

1. Pray. Weneva wi staat tu feel schres owt, wi ku pray tu Jehoava fi help ahn wizdom. Wi ku feel beta wen wi tel ahn bowt evriting weh di wori wi. Er wi ku seh wahn shaat ahn sailent pryaa if dat da aal weh wi ku du. Evri taim wi aks Jehoava fi help, wi di shoa dat wi chros ahn sayhn way how Dayvid mi chros ahn. Dayvid mi seh: “Jehoava da mai rak ahn wahn plays wehpaat Ah geh protekshan. Hihn da di Wan weh reskyu mi. Mai Gaad da mai rak, Ah goh tu Hihn fi protekshan.” (Ps. 18:2) Wen yu pray, yu tink dat ku reeli ku help yu? Wahn painyaa sista  weh naym Kahlia seh: “Afta Ah pray, Ah feel kaam. Ih help mi fi tink moa laik how Jehoava tink an ih help mi fi chros ahn eevn moa.” Yes, pryaa da wahn powaful gif fahn Jehoava weh ku help wi bayr op wen wi deh anda schres.

2. Tink bak. Wen yu luk bak eena yu laif, yu ku tink bowt di prablemz weh yu gaahn chroo ahn how onli bikaaz a Jehoava help yu get chroo dehn? Wen wi tink bak pahn how Jehoava help wi laik how ih mi help ih servant dehn eena di paas, wi geh moa pees ahn wi chros eena Jehoava eevn moa. (Ps. 18:17-19) Wahn elda weh naym Joshua seh: “Ai ga wahn lis a pryaa weh Jehoava mi ansa. Dat help mi fi memba how Jehoava mi gi mi jos weh Ah need wen Ah mi aks ahn far it.” Wen wi kantinyu fi tink bak pahn weh Jehoava don du fi wi aredi, wi geh di schrent weh wi need fi bayr op anda schres.

3. Obay. Bifoa wi mek op wi main bowt weh fi du, wi ku saach eena Gaad Werd fi dairekshan. (Ps. 19:7, 11) Wahn lata peepl fain owt dat wen dehn du risaach pahn wahn sertn skripcha, dehn geh wahn beta andastandin pahn how dehn ku yooz da skripcha eena dehn laif. Wahn elda weh naym Jarrod seh: “Wen Ah du risaach, ih help mi fi laan moa bowt di skripcha an andastan weh Jehoava di chrai tel mi. Dis help mi fi reeli bileev weh Ah reed an fi obay Jehoava dairekshan.” Wen wi goh tu di Skripchaz fi geh Jehoava help ahn wen wi obay fi hihn dairekshan, wi wahn ga weh wi need soh dat wi ku bayr op anda schres.

Dayvid mi noa dat di bes way fi bayr op anda schres da-mi fi pen pahn Jehoava help. Hihn mi apreeshiayt Jehoava help wahn lat, ahn dat mi inkorij hihn fi seh: “Wid [Gaad] powa Ai ku klaim wahn waal. Di chroo Gaad da di wan weh gi mi schrent.” (Ps. 18:29, 32) Wi mait feel laik wi prablemz da laik wahn big waal weh wi kyaahn klaim. Bot wid Jehoava help, wi ku deel wid eni prablem! Yes, wen wi pray tu Jehoava fi help, tink bak pahn aal weh Jehoava don du fi wi, an obay fi hihn dairekshan, wi ku bee kanfident dat hihn wahn gi wi di schrent ahn wizdom weh wi need soh dat wi ku bayr op anda schres!