ÍTARA liña idiheri kei aban ihürügu tun anigi (Ari. 12:25). Sandí humaali san ihürügu le lidan hibagari? Anihein san dan hasandirun siñá lan hun? Anhein ítara liña lubéi, mámarügüñadün huguya asandiragua hungua ítara. Saragu wádangiñe wóunigiruña somu waduhe, féridi haadiwa somu waduhe lidan óunweni, súfurihadiwa ladüga liñawan dan o ladüga ámuñegueinarügü turobuli sanditiwa lubucha uagu, lanarime idiheri luma lanarime íruni. Kaba íderaguawa lun wawandun dan le wagagibudagun luma lanarime idiheri le? a

Líderagubadiwa lani urúei Dawidi hénpulu lun wawanduni lanarime idiheri. Sügüti Dawidi lídangiñe saragu lénrengunga, íbini libagari lídanñein meha denchaü (1 Sam. 17:34, 35; 18:10, 11). Ida liña lawanduni Dawidi lanarime idiheri? Ka gayaraabei wadügüni lun wáyeihani lani hénpulu?

Gagibuguati Dawidi luma saragu turobuli lidan aban. Kei hénpulu, ariha waméi le asuseredubei dan le lanurahaña lubéi luéi urúei Saulu, ladüga busén lan Saulu láfaruni hilagubei. Dan le lagiribudunbei Dawidi hama lisudaranigu lídangiñe aban awuribuhani, aba híchugun fe íweruha hamá lan haganigu hamegegun, gudá hamoun giñe haban ani barügua hamaaña giñe haduheñu. Ka ladügübei Dawidi? “Dawidi hama luwügüriñan […] aba hagúarahan ayahua darí herederun méreuga”. Lanwoun lira, busentiña yebe lisudaranigu “hachamuragun dübü luagun”, sun katei le, adügati lun laganwoundun lidiheri Dawidi (1 Sam. 30:1-6). Ligíati aba meha lagagibudagun Dawidi luma ǘrüwa turobuli wéiriti lidan aban: lídanñanu meha denchaü liduheñu, hasiadiruñein meha lisudaranigu háfarubei lan hilagubei ani léibaahañein meha urúei Saulu. Ma funa lanarime idiheri le lasandirubei Dawidi!

Kati ladügübei? Lau lóufudagun “aba líchuguni Dawidi lemenigin luagu Wabureme”. Ani ida liña ladügüni? Héchuti meha Dawidi afurieida lun Heowá lun lamuriahan ídemuei luma ani ráramaguati asaminara luagu le meha adüga laalibei Heowá luagu lidan dan le sügühalibei (1 Sam. 17:37; Sal. 18:2, 6). Ruti giñe Dawidi fe luagu megei lani ladundehan Heowá. Ligíati, aba lamuriahan Dawidi luma Heowá ka lan lunbei ladügüni. Ítara kei lóunabuni Heowá, lau lóufudagun aba ladügüni Dawidi le lariñagubei Heowá lun. Ladüga lira, biní lumuti Heowá Dawidi hau sun lisudaranigu, ani sefu hamutiña haduheñu luma hamegegun (1 Sam. 30:7-9, 18, 19). Ariha humuti san ǘrüwa katei le ladügübei Dawidi? Furíeiti lun Heowá lun lamuriahan ídemuei luma, ráramaguati asaminara luagu ida liña lan meha líderaguni Bungiu ani adüga lumuti le lariñagubei Heowá lun. Ida luba wáyeihani Dawidi? Ariha wamá ǘrüwa katei le gayaraabei wadügüni.

1. Furíei wamá. Sagü wagumeserun asandira lanarime idiheri, gayaraati wafurieidun lun Heowá lun líderaguniwa asubudirei kaba lan wadüga. Ánhawa adüga aban furíei migifeti lun Heowá ani aba wabahüdahani lun ka lan adiheridagüdübaliwa, wasandiruba awalidaguni. O gayaraati giñe wadügün aban furíei chátiti ani maniñu, anhein ligíarügüñein lubéi gayara wadügüni lidan oura ligía. Sagü wamuriahan ídemuei luma Heowá, warufuduñein ligiaméme afiñeni le larufudubei Dawidi. Ariñagati: “Nubungiute, dübü le gayaraabei naramudagun lanagangiñe, nidaüdina lauti gürabu, ubafu le esefurubalina, liñun-agei naramudaguagüle”  (Sal. 18:2). Inarüni san hu lan furíei? Ariñagatu aban prekursora gíritu Kahlia: “Darangilati nasandiragun nungua lárigiñe nafurieidun. Íderagua lumutina furíei lun lúaradun nisaminan luma ligaburi lisaminan Heowá lúntima nafiñerun luagu”. Chóuruti aban lan lubuidun idewesei lúmagiñeti Heowá furíei le íderagubaliwa agagibudagua luma lanarime idiheri.

2. Ráramagua wamá asaminara. Dan le hasaminarun luagu ligaburi líderagunün Heowá, saminatün san gayaraabei lan hamuga hagagibudagun luma lénrengunga anhaün mibihin ídemuei lúmagiñe Heowá? Dan le wararamagun asaminara luagu ida liña lan meha líderaguniña Heowá lubúeingu lidan binadu dan luma ida liña lan giñe líderaguniwa, afiñetimatiwa luagu ani darangilutimati wasandiragun woungua (Sal. 18:17-19). Ariñagati aban wéiyaali lidan afiñeni gíriti Joshua: “Anuhoun aban lísüta numa lau sun furíei le óunaba láalibei Heowá nun. Íderagua lumutina le lun naritaguni ítaga katei le burí namuriahabei luma Heowá ani ru lumuti le namuriahabei luma nun”. Furanguti dan lan le wararamagun asaminara luagu saragu katei le adüga láalibei Heowá wawagu, ábaya wárügüdüni erei le wemegeirubei lun wasigirun agagibudagua luma lanarime idiheri.

3. Adüga waméi le lariñagubei Heowá. Lubaragiñe wanúadirun kaba lan wadüga lidan ítaga katei, lunti warihini ka lan tariñagubei Bíbülia, ladüga tuguya íchugubalin adundehani le buídutimabei (Sal. 19:7, 11). Gíbeeña íchugutiña fe dan lan le háluahan lanwoun ariñahani luagu somu bérusu tídangiñeti Bíbülia aba gunfurandatima hamani ida luba lan hawinwanduni. Ariñagati aban wéiyaali lidan afiñeni le gíribei Jarrod: “Dan le náluahan ariñahani luagu aban bérusu, gunfuranda numuti ka lan labusenrubei Heowá lariñagun nun. Chülüti le lariñagubei tidoun nanigi ani áfaaguatina nadügüni katei kei le aubei labusenra”. Dan le wáluahani ladundehan Heowá tidan Bíbülia ani gaganbadi wagía lun lugumadin aransetimatiwa lun wagagibudagun luma lanarime idiheri.

Subudi lumuti meha Dawidi megei lani lídehan Heowá lun lagagibudagun luma lanarime idiheri. Ani wéiriti meha leteingiruni lídehan Bungiu, ligía lariñagubei: “Lau bídehan, násügürüba luéigiñe lubarieirun luburugute”. Ariñagati giñe: “Bungiu íchugubei erei nun” (Sal. 18:29, 32). Gayaraati wasaminarun weiri lan waturobulin kei aban baríeiru le hénrengubei lawarirúniwa, lau sun lira, gayaraati wadügüni lau lídehan Heowá. Ánhawa afurieida lun Heowá amuriaha ídemuei luma, ráramagua wagíame asaminara luagu sun le adüga láalibei wawagu ani adüga wameime katei kei le aubei labusenra gayaraati wachoururuni líchugubei lan Heowá lichú au le wemegeirubei lun wawanduni lanarime idiheri.