SĀ ṘĒNGEN tö langanhutī ön ngam pinṙūtölōn. (Inch. 12:25) Hēṙu öm ṙung kirööngen kanihngen hēk ötkô öm la-al u? Pōyen nup yamihkanihngen hī lökten öi haṙivlōn. Lohten nö ōt tö vahavö nö i patī meh ngaich larāḵ lohten më-eṅ öm örheūheu ngëichken ò lohten inrē öm kapahlöng töp holre hēk tö yip aṅ patī meh inrē hēk yěn ōt inrē tö faltöre pinlaḵngen nö lākūö meh. Lökten in në ayī-ö mihôiṅ pōyen piṙūtkö. Intöönö pöri ngih sitih inlahen öm mihôiṅ la-al ngam pinṙūtölōn? *

Haköplu in min im inlahen Rācha Tāvit. Pōyen minë yamih kanihngen ò nö laklö ngam nômö re. (1 Sa. 17:34, 35; 18:10, 11) Sitih inlahen pöri ang Tāvit? Sitih inlahen inrē ayī-ö mihôiṅ la-al minë piṙūtköre?

Pōyen nup yamih kanihngen nö ikūö Rācha Tāvit. Ta-a töi ngëichkö ngam inlahen ò. Ik sā Tāvit nö falngöre tö Sôl nö laklö ngam nômö re. Hěngheuh ang Tāvit tö yik tarik alaha ò nö havan nö ṙā-ang im kinyūngö. Ngaich meuk nuk chehen re cha-a tö kē-ěyö tö yip la-al cha, ngaich föngtökūö nup patī cha hēk kē-ěyö inrē yip pihö cha tö yip kūön cha. “Ngaich Tāvit tö yik tarik ò inrē nö harāmöre nö pōitô, peuiny inrē hanöng saha cha nö öt ōtre kumlēḵ tökūö ṙô re nö peuny.” Sīöplöre ngaich ngam kanihngen Tāvit, pön yip töng tarik ò nö kunyahö elmat ngaich tö ò. “Vë-ekūö re cha-a nö hòṅ kulehan tö ihong.” (1 Sa. 30:1-6) Hěng tūmö yanīhi ngaich minë tö lūöi kanihngen Tāvit: Pön yip kūö ò tö ngam pīhö ò nö kihngen ngaich öp töng tarik alaha ò nö hòṅ fëlngen ò hēk ang Rācha Sôl inrē tö hòṅ fëlngen ò. Fē-a ayī-ö, nö sitih inlahen ang Tāvit ik hē-e! Sitih inlahen anga-aṅ nö la-al minë tö ngatī ṙôken kanihngen re?

Ilööṙen ang Tāvit “nö ngönlöre nö löktö in ngam inyööken re tö Yāvē.” Nö sitih inlahen? Yěn havīlöng ang Tāvit tö minë pinṙūtölōnre, ngaich vë-ekūötēv anga-aṅ nö havëkö inyööken re nö in Yāvē. Ngaich fēkö minë inlahen anga-aṅ inuk urěh ṙētak nö sitih inlahen ang Yāvē nö hayööken ò. (1 Sa. 17:37; Sal. 18:2, 6) Akahakūö ang Tāvit tö Yāvē nöng anga-aṅ tö mihôiṅ nö löngö ṙô nö hachōḵ kūö ò nö sitih inlahen in nup inlahen re. Lökten anga-aṅ nö tölṙô ök kūönṙô ang Apīātör nö ngö ṙô nö kētö ap sörplis ngaich kē inlēnö re anga-aṅ nö in Yāvē. Nup ṙô Yāvē nö in ò ngaich ilööṙen anga-aṅ nö kēken u. Ngaich sitih inlahen ngaich anga-aṅ? Löktö im inkòlô aṅ in Yāvē ang Tāvit tö yik tarik ò nö laklö nômö yip kūön re tö yip pīhöre ngaich ṙòkhöre nö havan minë chehen cha. (1 Sa. 30:7-9, 18, 19) Chumkūöṙen öi tö Tāvit nö asuh nup tö lūöi la-en ò nö la-al minë kanihngen? Havëkö inyööken re anga-aṅ nö in Yāvē nö vë-ekūötēv, hēk fēken nuk urěh inlahen Yāvē nö sitih inlahen nö hayööken ò, ngaich kētöre anga-aṅ nö asā nup inlēnöre tö Yāvē. Yē hī min ngatī piṙūtölōn, ngaich mihôiṅ öi asīnken Tāvit kēken në tö lūöi la-en.

1. Vë-ekūötēv. Yēḵ meh öm piṙūtkuvö ngaich mihôiṅ öm vë-ekūö tēv öm havëkö kūö Yāvē tö mikah re hēk inyööken re inrē. Mihôiṅ öm maṙô-òti ṙô öm vë-ekūö ò öm keuheūttnyö ṙô elkuilōn re ngaich höhlö min ngam elkuilōn meh. Yēḵ meh pöri kihngen öm maṙò-òtiṙô vë-ekūö ò ngaich mihôiṅ öm löknyö ellōnre ṙô öm rahëichtaṙô vë-ekūötēv. Yē hī örheūheu havëkö hinôlṙen re in Yāvē, ngaich hameuktöre ayī-ö asīnken Tāvit öi kirööngen ṙinatö-ellōn in ò. Ngö ṙô tī Tāvit nö kūich: “Ihong chu an ngam Mā Tēv, chūök chu kinyung, ṙamānyen chu inrē; Tēv chu töngë ihong chu: in ò chin min hayönglenre.” (Sal. 18:2) Kô-en hòng öi teūngen tö inyööken re yěi vë-ekūötēv? Hěngtak  öp ihih painīör sistör tö Kòhliā minë-eny: “Yëich vë-ekūötēv ngaich lāmta ngam elkuilōn chu. Sā mufē Yāvē inrē chu-ö ngaich sīöplöre inrē ngam ṙinatö-ellōn chu tö ò nö hol chu.” Kô-en in hòṅ ha-öiny tī Yāvē nö kētö ṙētak hī öi vë-ekūö ò. Ngiach kô-en ayī-ö teūngen tö inyööken re öi la-al minë pinṙūtölōn re.

2. Haköpngölōn re. Kapölōn öm tö nuk urěh kanihngen meh, ngaich sitih inlahen ang Yāvē nö chumkūöken meh ik hē e? Yēḵ meh öm fēkö inlahen u ngaich sitih inlahen ing töngamuh ang Yāvē nö hayööken meh hēk sitih inlahen inrē anga-aṅ nö chumkūöken yik tarik re misī, ngaich in e ayī-ö teūngen tö nganönö re hēk sīöplöre inrē ngam ṙinatö-ellōn hī in Yāvē. (Sal. 18:17-19) Hěngtak öp ihih minṙöinylen Chosuā minë-eny ngö ṙô anga-aṅ: “Maṙòtông ön ngih list in chu inlahen Yāvē nö sitih inlahen nö kētö sanapṙô minë ṙô chu öich vë-ekūötēv. In e chu-ö öich köplōn tö ò nö asā nup ṙô chu öich vë-ekūötēv ngaich ngatī inlahen anga-aṅ.” Yē hī asīnken Chosuā öi haköplōn re tö Yāvē nö sitih inlahen nö hayööken hī, ngaich teunglen min ayī-ö tö kumlēḵre öi la-al minë piṙūtköre.

3. Kētöre man. Yēḵ meh kihngen atöllö nup inlahen re ngaich hòṅ urěh më-eṅ ngëichkö ṙô ngam Paipöl nö sitih inlahen ṙô nö halēnö hī. (Sal. 19:7, 11) Pōyen më prötör sistör tö kôtī kūö nö löktö in minë miröökö yěn cha nö chöhö u ngaich akahakūö cha-a nö sitih inlahen nö hang minë inlēnö nö löktö in minë miröökö. Hěngtak öp ihih minṙöinylen Chëröt minë-eny ngö ṙô anga-aṅ: “Yēḵ chu haköp minë miröökö hēk chöhö u inrē ngaich akahakūö chu-ö tö ṙô u nö asuh öp ṙô Yāvē nö vë-ekūö chu. Lökten öich lökngöre tö ṙô minë miröökö hēk asā nup lōn Yāvē inrē chū-ö öich ngatī inlahen.” Yē hī vë-ekūö ngam Paipöl öi kē inlēnö re in Yāvē hěnghöre hangö u inrē, ngaich heuveū-en min ayī-ö la-al minë yamih kanihngen re.

Akahakūö ang Tāvīt töre nö löktö in Yāvē inyööken nö la-al minë yamih piṙūtköre. Ngaich kô-en Yāvē nö hayööken ò. Lökten anga-aṅ nö ngö ṙô: ‘Löktö im kumlēḵ ngam Tēv chin mihôiṅ kumööingö kui kinlōngö. Ngam tö kô-en Tēv an kamëtö kumlēḵ chu.’ (Sal. 18:29, 32) Pi-a nup kanihngen hī nö sā ṙò-òl kaha nup patī. Pòrô minë kanihngen hī nö kirööngen ngaich örhō anga-aṅ nö öt hayööken hī öi la-al u. Lökten ayī-ö hòṅ vë-ekūö öi havëkö inyööken re, ngaich köplōn inrē tö nuk inlahen ò urěh nö sitih inlahen nö hayööken hī ngaich nup töng ṙô ò nö in hī ngaich ngatī ayī-ö kēken u. Lökten ayī-ö mihôiṅ ṙatö-ellōnre tö Yāvē nö kētö mikah hī hēk kumlēḵ inrē ngaich mihôiṅ min ayī-ö heuveū-en la-al minë yamih piṙūtköre!