ODHUGUDHEYA onkala ninga muttorho wolemela mmurimani mwehu. (Gano 12:25) Wahiromaga odhugudheya na makattamiho bufiyedha ovyona dhawene? Sabwa ya ejuwene wahifiyedhaga wubuwela wi kugawodhile ovilela mwa mudhidhi mwinjene? Akala pumwenemo, weyo kuli weka. Enji wa iyo ninotabuwa na odhugudheya sabwa ya dhilobo dhinjene. Motagiha, ena anakoya anamudhi ali aredda, oku ena ahimuyelela mmudhawa wamukwelani, enagu anotabuwa na makattamiho atoteyile na dhifoyo dha mwilaboni. Txini enanikamihedhe ovilela nigadhugudheya? *

Ninele osunza venjene sabwa ya owanana odhugudheya na ejile epadduwile mwigumini mwa Mwene Davidi. Iyene wahipattiwa makattamiho ottiyana-ttiyana mwigumini mwaye, dila dhina amuttiyile nena n’okwa. (1 Sam. 17:34, 35; 18:10, 11) Davidi owodhile dhavi okwaranya odhugudheya? Ninawodhe dhavi osanza yotagiha yaye?

Davidi wahigumanana makattamiho manddimuwa ofwarelana. Motagiha, karoma otanalela makattamiho eteyile mudhidhi wamuttawiye Mwene Sawul odduwene wafuna ompa. Davidi na alobwana aye eyelaga okoddoni afwanyile muttette wawa buddumeyiwe, beyeliwe dhilobo dhawa vina ayana na anawa bamalile otxedhiwa na amwiddani awa. Txini ekosiliye? “Davidi na athu aye ahunla ofiyedha olala vammelo.” Edhile ottabwiha okubanya wa Davidi, jowi alobwana akuluveliye “anfuna omvokela malugu.” (1 Sam. 30:1-6) Ovano Davidi wahipattiwa makattamiho mararu manddimuwa ofwarelana: Amudhaye ali vang’ovini, alobwana ali na iyene anfuna onvokela malugu oku Mwene Sawul ela omutamela wi ampe. Karoma otanalela odhugudheya wapattiwe Davidi!

Txini ekosile Davidi vasogorhova? Iyene momaguva-mwene “odha ofwanya guru mwa Nabuya Mulugu waye.” Iyene owodhile dhavi ejuwene? Davidi wahimulobelela Yehova amukumbirhaga nikamihedho vina wahitanalela mukalelo wamukamihedhilege Yehova nsaka na mundduni. (1 Sam. 17:37; Masal. 18:2, 6) Vina Davidi wahona wi wanfwanyela ofwara malago a Yehova, venevo wahinvuza Yehova yafwanyeliye okosa. Mmaleli Davidi wakela malago a Yehova wahivirihamo momaguva-mwene. Edhile opadduwa, iyene na alobwana aye ahirurihiwa na Yehova, vina ahiwodha wawobola amudhawa na dhilobo dhotene. (1 Sam. 30:7-9, 18, 19) Ohiwodha ozinddiyela dhilobo ttaru dhikosile Davidi? Iyene wahimuloba nikamihedho Yehova, wahubuwela nikamihedho nanvahile Yehova nsaka na mundduni, vina wahivirihamo malago anvahile Yehova. Ninawodhe dhavi omutagiha Davidi? Ninele osekeserha dhilobo ttaru.

1. Olobela. Nigona wi nihidhugudheya, nimukumbirhe Yehova nikamihedho vina eziwelo. Nikose nlobelo se marulu wi nimwaddele Yehova dhetene dhinnikattamiha, okosa ejo enele onikamihedha venjene. Mbwenye nigona wi ejo kinikamihedhile, nikose nlobelo momaguva na mmurimani. Nimukumbirhege Yehova mudhidhi wotene nikamihedho dhahene ninga mwakosela Davidi ologile: ‘Yehova ddi mwango waga, vottawela waga, moboleli waga; Mulugu waga ddi mwameleli onimukuluvelimi, ebarelo enddimuwa, guru enddakiha mmadani mwa amwiddanaga.ʼ (Masal. 18:3) [Masal. 18:2, Tradução do Novo Mundo]. Koddi nlobelo txibarene ninolaba? Pionera dhahi  onkuweliwa Kahlia ohiloga: “Nlobelo ninoddikamihedha okana murenddele, wubuwela pama dhahene ninga enubuwela Yehova vina ninolibiha omukuluvela waga.” Nlobelo, nvaho wa guru onnikamihedhana Yehova wi niwodhe owanana odhugudheya.

2. Wubuwela. Onowubuwela elobo yupadduweli ewodhilewe ovilela na nikamihedho na Yehova? Nigobuwela nikamihedho ninnivaha Yehova dhahene ninga yakamihedhiliye emeleli aye a masaka a wale, ninoliba vina eji enowenjedhedha omukuluvela wehu. (Masal. 18:17-19) Munddimuwa dhahi wawunuwelavo onkuweliwa Joshua ohiloga. “Miyo ddinolebela malobelo otene anakula Yehova, eji enoddikamihedha wubuwela mudhidhi omulobile miyo elobo Yehova nanda addivaha ejuwene yavedimi.” Pumwenemo, iyo nigobuwela dila dhotene dhinnikamihedha Yehova ninele olibiha omukuluvela wehu, vina ninele owodha owanana odhugudheya.

3. Ovirihamo. Nigakala mmakattamihoni, nihinatti okosa yogana nirome otamela malago mu Nzuni na Mulugu. (Masal. 19:7, 11) Attu enjene anofwanyaga ejile entamelani agaroma opepesa malebo, venevo anowodha ononelamo pama ejile yengesilani vina anowodha ovirihamo. Munddimuwa dhahi onkuweliwa Jarrod ohiloga: “Opepesa onoddikamihedha wona dhilobo dhotene dhiniwanana na versuya, ddinononelamo pama ejile enddaddela Yehova vina eji enoddikamihedha okuluvela nlebona nengesilimi.” Iyo nigatamela nikamihedho na Yehova modhela opepesa Malebo vina nifwaraga malagoya ninele okala omala-nawale wi niwanena odhugudheya.

Davidi wannonelamo wi agahiwodha okwaranya odhugudheya na nikamihedho na Yehova. Iyene wantamalela venjene nikamihedho nanvaha Yehova nona aloga dhahi: “Na Mulugu waga ddinolupa ngome. Mulugu ddinddivaha guru ddimmyaliha dila yaga.” (Masal. 18:30, 33) [Masal. 18:29, 32, Tradução do Novo Mundo]. Dila dhina ninogumanagana makattamiho orutxa anladdanihiwa na ngome ehinweleya. Mbwenye na nikamihedho na Yehova ninele owodha okwaranya makattamiho abo! Ndde, nigamuloba Yehova nikamihedho, nanda nubuwela nikamihedho ninivahiliye vina nifwara malago annivahiye ninele oliba vina ninele okana eziwelo enfunihu wi niwodhe okwaranya odhugudheya!