KUSAKALALA muchihasa kupwa ngwe unambate yimwe yilemu mu mbunge. (Yishi. 12:25) Shina hiunapinji kama ku mwono we mumu lia kusakalala? Kutala hiunamono kama ngwe hikwaha ufuku wanjila mu swaha? Nyi chenacho, kuushi ukawe. Anji a kuli yetu twakuhonga, kusakalala ni kunenganyana mumu lia yuma yinji. Chakutalilaho, amwe a kuli yetu tunafungu asoko waze anayiza, twafwisa atu waze twazanga chinji, nawa tunamono lamba mumu lia luyinda wa chisemewa. Mba yika muyihasa kutukwasa kukumba kusakalala? a

Mutuhasa kulilongesa yuma yinji hakutwala ku chize mutukumba kusakalala ha chilweza cha Mwanangana Ndawichi. Iye kapalikile mu yuma yikalu chinji ku mwono wenyi nawa kambile kumushiha ha yisuho yinji. (1 Samue. 17:34, 35; 18:10, 11) Mba yika yakwashile Ndawichi kukumba kusakalala? Kuchi mutuhasa kumwimbulula?

Ndawichi kapwile ni yipikalo yinji ha chisuho chimuwika. Chakutalilaho, achinyonga yize yalingiwile kuli iye muze te anachina Mwanangana Saulu yoze te unafupu kumushiha. Muze Ndawichi ni tujita twenyi ahilukile ku zuwo hanyima lia kwasa jita, kevwile yikola yinji ku mbunge ha kuwana akwa-kole jo haeya yuma, haocha mazuwo ni kutwala mapwo ni ana jo mu ufunge. Mba yika Ndawichi alingile? “Ndawichi ni atu aze endele nenyi yakololoka ni kulila ndo kapwile nawa ni tachi ja kulila.” Mba aweze yinyengo yenyi ha yikwo, atu waze te akujikijila yafupa “kumwasa mawe.” (1 Samue. 30:1-6) Haliapwila Ndawichi kanapalika mu yipikalo yitatu ha shimbu limuwika: Asoko jenyi kali mu ponde, atu jenyi kanafupu kumushiha nawa Saulu machimwendeleza hanga amushihe. Kota Ndawichi kasakalalile chinji!

Yika Ndawichi alingile hanyima? Hazehene ‘yalitakamisa muli Yehova Zambi yenyi.’ Yika alingile mba awane utakamiso wacho? Tunanyingika ngwetu, Ndawichi kapwile ni chako cha kulemba kuli Yehova hanga ete ukwaso ni kupukuna ha chize Iye amukwashile kunyima. (1 Samue. 17:37; Samu 18:2, 6) Ndawichi kamwene ngwenyi kanafupiwa usongwelo wa Yehova, chocho yahula Yehova yize te malinga. Hanyima lia kutambula usongwelo wa Yehova, Ndawichi yaukaula ni kawashi. Hachino, Yehova yamuwahisa hamwe ni atu jenyi, chocho yahasa kutambula mapwo ni ana jo ni kuzukako nawa yikumba yinji. (1 Samue. 30:7-9, 18, 19) Shina wamona yuma yitatu yize Ndawichi alingile? Iye kalembele kuli Yehova ni kwita ukwaso, yapukuna ha chize Yehova amukwashile kunyima ni kukaula usongwelo wenyi. Kuchi mutuhasa kwimbulula Ndawichi? Tutalenu majila atatu.

1. Kulemba. Ha mashimbu eswawo mutusakalala, mutuhasa kulemba kuli Yehova hanga tumwite ukwaso ni mana. Mutuhasa kulivwa kanawa nyi mutumulweza yuma yeswe yize tunalipikala nayo. Hanji mutuhasa kulemba ni kawashi mu mbunge nyi muchifupiwa kulita ni haze tuli. Hita shimbu mutwita ukwaso wa Yehova, mutusolola ngwetu twakufuliela muli iye ngwe Ndawichi yoze wambile ngwenyi: “Yehova iye liwe liami, ni mbonge yami, ni mukwa kungupulula; Zambi yami ni liwe liami lia tachi, muli iye munguswama.” (Samu 18:2) Shina kulemba chakukwasa lume? Pangi Kahlia, umwe pionelu yamba ngwenyi: “Hanyima lia kulemba, nakulihumikiza. Kulemba chakungukwasa  kupwa ni manyonga ngwe a Yehova ni kujikijila chinji muli iye.” Kwamba pundu, kulemba chili chawana cha Yehova chize chakutukwasa tunyongonone muze tunasakalala.

2. Kupukuna. Muze munyonga ha yuma yize yalingiwile ku mwono we kunyima, pukuna ha chize wahashile kunyongonona mu yipikalo yacho ni ukwaso wa Yehova. Muze twakupukuna ha chize Yehova atukwashile ni chize akwashile tuvumbi twenyi kunyima, twakulihumikiza ni kujikijila chinji muli iye. (Samu 18:17-19) Joshua, umwe mukulwana wa mu chikungulwila yamba ngwenyi: “Nguli ni kalifwo haze nakusoneka makumbululo a yilemba yami. Chino chapwile ni kungukwasa ngwiwuluke yisuho yize Yehova anguhele yize te ngunafupiwa muze napwile ni kuyita mu yilemba.” Kwamba pundu, nyi mutupukuna ha yize Yehova hanatulingila, mutupwa ni tachi jize tunafupiwa hanga tukumbe manyonga jetu a kusakalala.

3. Kukaula usongwelo. Shimbu kanda tuchikwata chiyulo ha chimwe chikuma, mutuhasa kufupa usongwelo mu Liji lia Zambi uze mutujikijila. (Samu 19:7, 11) Atu anji hananyingika ngwo, muze akuhengwola yimwe yisoneko, kakuhasa kumona chize versu jimwe jinakwate ha mwono wo. Jarrod, umwe mukulwana wa mu chikungulwila yamba ngwenyi: “Kuhengwola chakungukwasa kunyingika ulumbunwiso weswe wa versu yimwe ni kwivwa kanawa yize Yehova anangulweze. Chino chakungukwasa kufuliela ha yize natanga ni kungukwasa kukaula usongwelo wenyi.” Nyi twafupa usongwelo wa Yehova kupalikila mu yisoneko ni kuukaula, muchipwa chashi kulihumikiza muze mutusakalala.

Ndawichi kanyingikine ngwenyi, mba ahase kukumba kanawa kusakalala chenyi te kanafupiwa ukwaso wa Yehova. Iye te kakulemesa chinji ukwaso wa Yehova kashika ambile ngwenyi: “Ku tachi ja Zambi yami nakutumbuka chipanga. Zambi yoze wakungujichika muya wa tachi.” (Samu 18:29, 32) Mutuhasa kumona yipikalo yize tuli nayo ngwe chipanga chize kutuchi kuhasa kutumbuka. Alioze ni ukwaso wa Yehova, mutuhasa kutumbuka yipikalo yeswe yize yili ngwe chipanga! Kwamba pundu, nyi mutulemba kuli Yehova ni kwita ukwaso wenyi, mutupukuna ha yuma yeswe yize hanatulingila ni kukaula usongwelo wenyi, mutuhasa kupwa ni shindakenyo ngwetu, matwaha tachi ni mana waze tunafupiwa hanga tukumbe kanawa kusakalala chetu!