LUNGRETHEIHNAK nih lunglawm loin a kan umter khawh. (Ptb. 12:25) Lungretheihnak nih aan nenh tuk bal maw? Ka lungretheihnak hi ka ing kho ti lai lo tiah na ruat bal maw? Cutin na ruah ahcun nangmah lawng na si lo. Mi tampi cu a kong a phunphun ruangah kan lungre a thei, kan tha a dih i kan lung a dong. Tahchunhnak ah, cheukhat cu kan chungkhar a zawmi kha kan zohkhenh hna, cheukhat cu kan dawtmi nih an kan thihtak i cheukhat cu leiser ral ruangah sifah harnak kan tong. Asinain lungretheihnak tawnghtham awkah zeinihdah a kan bawmh khawh? a

Siangpahrang David kong kan ruahnak thawngin lungretheihnak tawnghtham ning tampi kan cawn khawh. David cu harnak tampi a tong i a caan ah a nunnak ca hmanhah ṭih a nungmi thil a rak tong. (1 Sam. 17:34, 35; 18:10, 11) David nih a lungretheihnak kha hlawhtling tein zeitindah a tawnghtham khawh? Zeitindah kan i zohchunh khawh?

David cu voikhatte ah harnak tampi a rak tong. Tahchunhnak ah, amah thah dingin aa timmi Siangpahrang Saul sinin a zam lioah zeidah a ton ti kha ruathmanh. David le a mi pawl cu raldohnak in an kir tikah an ral pawl nih an thilri an firmi, an inn an khanghmi le an chungkhar pawl an tlaihmi hna an hmuh tikah an lau tuk. David nih zeitindah a rak lehrulh? “David le a sinah a ummi hna kha fakpi in ṭahnak thazaang an ngeih ti lo tiangin an ṭap.” David cu a mi hna nih “lung i cheh awk an ceih lengmang” caah a lungre a thei chinchin. (1 Sam. 30:1-6) David cu caankhat te ah a nganmi buaibainak pathum a rak tong: A chungkhar nih an nunnak caah ṭih a nungmi thil an tong, a mi pawl nih thah an duh i Siangpahrang Saul nih thah dingin a dawi peng rih. Cucaah David cu zeitluk in dah a lungre a theih lai ti kha na mitthlam ah cuanter hmanh!

David nih zeidah a rak tuah? “BAWIPA a Pathian ah khan aa hrim ṭhan” colh. David nih zeitindah cutin a tuah khawh? David nih bawmhnak hmuh awkah Jehovah sinah thla a cam i a hlanah Pathian nih a rak bawmh ning kong a ruah ti kha kan hngalh. (1 Sam. 17:37; Salm 18:2, 6) David nih Jehovah lamhruainak kawl a hau ti kha a hngalh caah zeidah ka tuah awk a si tiah Jehovah sinah a rak hal. Jehovah sinin lamhruainak a hmuh tikah mah ningin a rak tuah colh. Cucaah an chungkhar kha an khamh khawh hna i an thilri pawl zong an hmuh ṭhannak thawngin Jehovah nih a mi pawl he thluachuah a pek hna. (1 Sam. 30:7-9, 18, 19) David nih a tuahmi thil pathum kha na hngal maw? Bawmhnak hmuh awkah Jehovah sinah thla a cam, hlanlio ah Pathian nih a rak bawmhmi kong kha a ruat i Jehovah lamhruainak ningin a zulh. David kha zeitindah kan i zohchunh khawh? Lam pathum in i ruah hna u sih.

1. Thlacam. Kan lungre a theih tik paohah bawmhnak le fimnak hmuh awkah Jehovah sinah thla kan cam khawh. Pathian sinah kan lungretheihnak vialte kha lungtak tein kan phuannak thawngin kan thilrit kha kan zaanter khawh. Asiloah chikkhat te lawng caan kan ngeih hmanhah a tawinak in le kan lungchung in thla kan cam khawh. Jehovah sin bawmhnak kan hal fatin hitin a chimmi David bantuk zumhnak kan ngeih kha kan langhter: “BAWIPA cu ka khamhtu a si,  amah cu a fekmi ka ralhruang a si. Ka Pathian cu a ka hupphengtu a si, amah sinah cun him tein ka um.” (Salm 18:2) Thlacamnak cu man a ngei taktak maw? Hmaikal unaunu Kahlia nih hitin a chim: “Thla ka cam tikah ka lung a dai. Thlacamnak nih Jehovah bantukin khua ruah deuh awk le amah i bochan deuh awkah a ka bawmh.” Thlacamnak cu lungretheihnak tawnghtham khawh awkah Jehovah nih a kan pekmi laksawng a si.

2. Ruat. Hlanlio kong na ruah ṭhan tikah Jehovah bawmhnak thawng lawngin na rak inkhawhmi harnak kong hna kha na ruat kho maw? Hlanlio a salle le kanmah a kan bawmh ning kong kan ruah tikah thazaang kan ngei i amah kan zumhnak zong a fek chin. (Salm 18:17-19) Khrihfa upa Joshua nih hitin a ti: “Pathian nih ka thlacamnak a ka lehmi kha cazin in kaa chiah. Mah nih thil pakhatkhat he aa tlaiin Jehovah sinah bawmhnak ka rak halmi le ka herhmi te a ka pekmi kha i cinken dingin a ka bawmh.” Jehovah nih kan caah a kan tuahpiakmi kong hna kan ruah tikah kan lungretheihnak tei khawh awkah a herhmi thazaang thar a kan ngeihter.

3. Zul. Thil sining pakhat he aa tlaiin biakhiahnak tuah hlanah bochan awk a tlak bikmi lamhruainak kha Baibal ah kan kawl khawh. (Salm 19:7, 11) Mi tampi nih Baibal caang pakhat he aa tlaiin hlathlainak an tuah tikah an nunnak ah mah Baibal caang hman khawh ning kha ṭha deuh in an hun hngalhthiam. Khrihfa upa Jarrod nih hitin a ti: “Hlathlainak nih Baibal caang pakhat nih a langhtermi a kong tampi kha hngalh awk le Jehovah nih a ka chimhmi kha hngalhthiam deuh awkah a ka bawmh. Mah nih ka relmi kong kha zumh awk le a lamhruainak ningin zulh khawh awkah a ka bawmh.” Baibal in Jehovah lamhruainak kan kawl i mah ningin kan zulh ahcun kan lungre a theih hmanhah lungdaihnak le nuamhnak hmuh kan i fawih deuh lai.

David nih lungretheihnak hlawhtling tein tawnghtham khawh awkah Jehovah bawmhnak ka herh ti kha a hngalh. Jehovah bawmhnak cungah aa lawm tuk i hitin a ti: “An ralhau baoh khawhnak ṭhawnnak a ka pek. Amah hi a kan ṭhawntertu Pathian cu a si.” (Salm 18:29, 32) Kan buaibainak cu tawnghtham awkah a har tuk tiah kan ruah men lai. Asinain Jehovah bawmhnak thawngin zei bantuk a nganmi buaibainak a si hmanhah kan inkhawh! Bawmhnak hmuh awkah Jehovah sin thla kan cam i a kan tuahpiakmi kong kha ruat in a lamhruainak kan zulh ahcun lungretheihnak hlawhtling tein tawnghtham awkah a herhmi ṭhawnnak le fimnak a kan pek lai ti kha kan zumh khawh.