LER nou enkyet, sa i kapab fer nou dekouraze. (Prov. 12:25) Eski ou’n deza vreman enkyet? Eski sa in fer ou santi ki ou nepli kapab andire? Si wi, ou pa tousel. Bokou parmi nou in bezwen pran swen avek en dimoun ki malad, nou’n perdi en dimoun ki nou kontan dan lanmor, nou’n fer fas avek en dezas natirel oubyen lezot sityasyon. Tousala in fer nou fatige fizikman, mantalman oubyen emosyonnelman. Me kwa ki kapab ed nou ler nou enkyet? a

Nou kapab aprann avek legzanp Lerwa David lo ki pour fer ler nou enkyet. I ti fer fas avek bann sityasyon difisil dan son lavi, menm lanmor. (1 Sam. 17:34, 35; 18:10, 11) Ki mannyer David ti fer ler i ti enkyet? Ki mannyer nou kapab swiv son legzanp?

David ti fer fas avek plizyer problenm an menm tan. Par egzanp, annou vwar sa ki ti arive ler Lerwa Sail ti pe esey touy David. Ler David ek son bann zonm ti’n sorti lager, zot ti soke pour vwar ki zot bann lennmi ti’n pran tou zot keksoz, zot fanmir ti’n ganny pran konman prizonnyen e zot lakaz ti’n ganny brile. Ki mannyer David ti reazir? “David ek bann zonm ki ti avek li ti konmans plere asodlarm ziska zot ti nepli annan lafors pour plere.” Sa ki ti pli fatig David, i ki son bann zonm ti “pe dir ki zot anvi saboul li avek ros.” (1 Sam. 30:1-6) David ti pe fer fas avek trwa problenm an menm tan: Son fanmir ti an danze, i ti per ki son bann zonm ti pou touy li e Lerwa Sail osi ti anvi touy li. Zis mazinen ki mannyer David ti enkyet.

Ki David ti fer apre sa? Deswit, i ti “repran kouraz gras a Zeova son Bondye.” Ki mannyer David ti fer sa? Nou konnen ki David ti abitye priy Zeova pour ganny son led e i ti reflesir lo lafason ki Zeova ti’n ed li dan lepase. (1 Sam. 17:37; Ps. 18:2, 6) Alor, David ti rod gidans Zeova e i ti demann Zeova sa ki i bezwen fer. Apre ki David ti’n ganny gidans Zeova, i ti azir deswit. Sa ti fer ki Zeova ti beni David ek son bann zonm e zot ti reganny zot fanmir ek zot bann keksoz. (1 Sam. 30:7-9, 18, 19) Eski ou’n remark sa trwa keksoz ki David ti fer? I ti priy Zeova pour ganny son led, i ti reflesir lo lafason ki Zeova ti’n ed li dan lepase e i ti azir dapre gidans Zeova. Ki mannyer nou kapab swiv legzanp David? Annou vwar trwa fason.

1. Priye. Nenport ler ki nou santi nou enkyet, nou kapab priy Zeova pour ganny led ek lasazes. Ler nou dir Zeova konsernan bann keksoz ki pe fer nou enkyet, sa i kapab fer nou santi nou pli byen. Si sirkonstans pa permet, nou kapab fer en pti lapriyer dan nou lespri. Sak fwa nou demann Zeova led, nou pou annan menm konfyans ki David, ler i ti dir: “Zeova i mon ros, mon landrwa proteksyon e sa Enn ki delivre mwan. Mon Bondye i mon ros, mon pran refiz dan li.” (Ps. 18:2) Eski lapriyer i vreman ede? En ser pionye ki apel Kahlia ti dir: “Apre ki mon fini fer lapriyer, mon santi mwan anpe. Lapriyer i ed mwan pour annan menm fason panse avek Zeova e pour annan plis konfyans dan  li.” Lapriyer i en kado sorti kot Zeova ki vreman ede ler nou enkyet.

2. Reflesir. Ler ou mazin sa ki’n arive dan ou lavi, eski ou rapel bann problenm ki ou’n kapab andire zis akoz Zeova in ed ou? Ler nou reflesir lo lafason ki Zeova in ed nou e lafason ki Zeova in ed son bann serviter dan lepase, nou vin pli for e nou annan plis konfyans dan li. (Ps. 18:17-19) En ansyen ki apel Joshua i dir: “Mon annan en lalis bann lapriyer ki Zeova in reponn. Sa i ed mwan pour rapel bann moman kot Zeova in reponn mon bann lapriyer spesifik e i’n donn mwan egzakteman sa ki mon ti bezwen.” Ler nou reflesir lo lafason ki Zeova in azir anver nou, sa i kapab ed nou ler nou enkyet.

3. Azir. Avan ki nou deside ki pour fer dan en sityasyon, nou kapab rod sa pli bon konsey dan Parol Bondye. (Ps. 19:7, 11) Bokou dimoun i vwar ki ler zot fer resers lo en verse, zot pli byen konpran ki mannyer sa verse i aplik pour zot. En ansyen ki apel Jarrod i eksplike: “Ler mon fer resers, sa i ed mwan pour vwar diferan nide dan sa verse e ki Zeova pe dir mwan. Sa i tous mon leker e ed mwan pour azir dapre gidans Bondye.” Ler nou rod gidans Zeova dan Labib e swiv son konsey, i pou pli fasil pour nou andire ler nou enkyet.

David ti konpran ki i ti bezwen led Zeova ler i ti enkyet. I ti telman kontan ki Zeova ti’n ed li, ki i ti dir: “Gras a pwisans Bondye, mon kapab grenp en miray. Sa vre Bondye i sa Enn ki donn mwan lafors.” (Ps. 18:29, 32) Nou kapab santi ki bann problenm i parey en gran miray. Me avek led Zeova nou kapab sirmont okenn problenm ki parey en miray. Alor, ler nou priy Zeova pour ganny son led, reflesir lo tou sa ki i’n fer pour nou e azir dapre son gidans, nou kapab asire ki i pou donn nou lafors ek lasazes ki nou bezwen pour andire ler nou enkyet.