«MEJÃCHA krĩcha zroma obʉba ẽbẽra so birachiseabʉ» (Prov. 12:25). ¿Bʉra ewari abaʉde pera sentibarika bʉta kʼãbãẽã krĩcha zroma obasi baera? ¿Sentibarika maʉ̃ bedʼea zromara awuanta ẽãta? Kĩrãbera bʉra abapaibʉ ẽãta, akʉza bʉtrʉ mawũã berabaribʉ ẽãta, ẽbẽrarã mejãchaʉta aukʼara sentipanʉ, sopʉapanʉ akʉza pera sentipanʉ. Bari jaraita, ʉ̃kʉrʉra kʼãbãẽã krĩcha zroma opanʉ yi mebẽrãta beisi baera, ãyita kayapanʉ baera, mawũã ẽ bʉrʉ naʉ̃ drʉade neida berabaribʉba zʉbʉria osi baera. Mawuẽrã, ¿kʼãrẽba kʼarebaseabʉ kʼãbãẽã krĩcha zroma obʉde pera senti ẽ baita? *

Nokʼo David yizaba biode kʼarebaseabʉ kʼãbãẽã krĩcha zroma obʉba pera senti ẽ baita. Iyira mejãcha bedʼea zromata erbasi, adewara bera beasida (1 Sam. 17:34, 35; 18:10, 11). ¿Kʼãrẽba kʼarebasi Davidʼra kʼãbãẽã krĩcha zroma obʉba pera senti ẽ baita? akʉza ¿Sãwũã Davidʼba oda kĩrãkʼa oseapanʉ?

Davidʼbara bedʼea zromara mejãchade ũdusi. Bari jaraita, krĩchadadrʉ Saúlʼba David beaita pẽwã jirbaside. Ewari aba Davidʼba ũdu zesi iyi nejʉrarabara iyi deta akʉza iyi kʼaidupanʉra nekʼãrẽra zrʉga edesidata ãyi dera babʉesidata, adewara ãyi mebẽrãra jida edesidata. Aramaʉ̃ta, ¿kʼãrẽta osi Davidʼbara? Iyita akʉza yumakẽrãra iyi kʼaidu panʉrarã mejãchade jẽgasida daʉba ne ẽãsidu, adewara iyi kʼaidupanʉrabara jarasida beadaita mawũã berabaribʉrʉ kʼarea (1 Sam. 30:1-6). Mawuẽrã Davidʼbara bedʼea zroma ũbea erbasi: Nããra, iyi nejʉrarabara yi mebẽrãta jida erbasi, yi ũmeta, iyi kʼaidupanʉrabara iyita beakĩrãpanasi, yi ũbeata Saúlbida iyita beakĩrãbasi. Maʉ̃ kʼarea Davidʼra kʼãbãẽã krĩcha zroma okʼãrãpe pera sentibasibaibara.

¿Kʼãrẽta osi Davidbara? Iyara jʉrʉsi Daizeze Jeowa kʼarebara, Jeowaʼa yiwidʼisi iyita kʼarebamarẽã akʉza kĩrãbesi Jeowaba nãã iyi sãwũã kʼarebadata (1 Sam. 17:37; Sal. 18:2, 6). Davidʼbara kʼawuakĩrãbasi kʼãrẽta jaraita Daizeze Jeowaba. Maʉ̃ kʼarea saserdote Abiatarʼa jarasi wemarẽã efodʼra, Jeowaʼa widita iya kʼãrẽta oibarata *. Davidʼba ũrĩ kʼãrãpe Jeowaba jaradata, aramaʉ̃ta maʉ̃ta osi. Maʉ̃ kʼarea Jeowabara kʼarebasi ãya nekʼãrẽ aduada jẽda ũduita akʉza ãyi mebẽrãsida jẽda erbaita (1 Sam. 30:7-9, 18, 19). ¿Davidʼbara kʼãrẽ nekʼãrẽ ũbeata osi? Jeowa yiwidʼisi iyita kʼarebamarẽã, jẽda kĩrãbesi Jeowaba iyi nãã sãwũã kʼarebadata akʉza aripe osi Jeowaba zokʼadata. Atia akʉdaya, ¿sãwũã dayirãba nekʼãrẽ ũbea oseabʉta Davidʼde kĩrãkʼa?

1. Yiwidʼira. Dayirã krĩcha zroma obʉba pera sentibʉrʉza, Jeowaʼa yiwidʼira iya kʼarebamarẽã akʉza buru bia diamarẽã. Jõma Jeowaʼa jarabʉba bʉ kʼãrẽa krĩcha zroma obʉta akʉza bʉyi sãwũã sentibʉta, naʉ̃ba kʼarebaseabʉ bʉ aduʼa bia sentita, maʉ̃ta obe ẽ bʉrʉ bʉra wiña yiwidʼiseabʉ akʉza chupea, bʉyi sãwũã berabarinʉmʉne. Dayirã Jeowaʼa yiwidʼibʉdade ũdubiyi iyide ĩjãbʉta Davidʼba oda kĩrãkʼa. Iya jarasi: «Jeowara mʉ̃ mĩrʉ̃bari, mʉ̃ zarea, mʉ̃ ẽdrʉbibari. Mʉ̃ Zeze mʉ̃ mĩrʉ̃bari, iyima mĩrʉ̃bʉ, iyira mʉ̃ jõʉ̃drʉbari, mʉ̃ ẽdrʉbibari zroma, nene ẽã babibʉ iyima mĩrʉ̃bʉrʉde» (Sal. 18:2). ¿Yiwidʼibʉbara wãrĩnu kʼarebaseabʉka?  Yi nãã edebari 70 ora diabariba, yi trʉ̃ Kahliaʼba naʉ̃ta jarasi: «Yiwidʼi berabarida tẽã mʉ̃ra aduʼa bia sentibʉ akʉza kʼarebabʉ mʉ̃a bia krĩchaita, adewara kʼarebabʉ mʉ̃ krĩchaita Jeowa kĩrãkʼa akʉza naʉ̃ba audre ĩjãita Jeowata». Dayi yiwidʼibaira Jeowaba dayirã diabʉ kʼãrẽ, iya kʼarebaita dayirã kʼãbãẽã krĩcha zroma obʉde pera senti ẽ baita.

2. Jẽda kĩrãbera Jeowaba bʉta nãã sãwũã kʼarebadata. Bʉa mawũã obʉbʉrʉ jẽda kĩrãbeyi bʉa bedʼea zroma awuantadata, Jeowabʉrʉ kʼarebasi baera. Dayirãba kĩrãbepanʉbʉrʉ Jeowaba sãwũã kʼareba zebʉrʉta akʉza nããbema mebẽrãra sãwũã kʼarebasita, naʉ̃ba kʼarebayi audre ĩjãita Jeowata akʉza zowaĩnĩgʉa diayi dayirãʼa (Sal. 18:17-19). Joshua zõrãrã kongregasionebemaba, iya naʉ̃ta jarabʉ: «Mʉ̃a Jeowaʼa yiwidʼibʉde widibʉra, iya panʉbʉrʉdera mʉ̃a kartade jõma bu wã. Mʉ̃ra naʉ̃ba kʼarebabʉ kĩrãbeita Jeowaba sãwũã panʉnata mʉ̃a wididara». Mawũã, dayirãbara jẽda kĩrãbepanʉbʉrʉ Jeowaba nãã sãwũã kʼarebadata, naʉ̃ba kʼarebabʉ dayirã kʼãbãẽã krĩcha zroma obʉba pera senti ẽ baita.

3. Aripe ora Jeowaba jaradata. Dayirãba kʼawua krĩcha kʼãrãpe jidai naweda jʉrʉibara Daizeze Bedʼeade, kʼawuaita Jeowaba kʼãrẽta krĩchabʉta (Sal. 19:7, 11). Ʉ̃kʉrʉbara biʼia jʉrʉbʉ bia kʼawuaita kʼãrẽta jarakĩrãbʉta testo abaʉba, mawũã kʼawuaita kʼãrẽta oibarata. Zõrãrã kongregasionebema yi trʉ̃ Jarrodʼba, naʉ̃ta jarabʉ: «Daizeze Bedʼeade testo abaʉta bia jʉrʉbʉbara kʼarebabʉ mʉ̃a audre kʼawuaita akʉza mʉ̃a bia ũrĩta kʼãrẽta krĩchabʉta Daizeze Jeowaba. Mawũã testo abaʉta mʉ̃ soidu jʉ̃ẽseabʉ akʉza oseabʉ Jeowaba zokʼabʉta». Dayirãba jʉrʉpanʉne Jeowa kʼarebata akʉza iya zokʼabʉta opanʉnera, mejãchade sobiapanañi adewara aduʼapanañi. Naʉ̃ba kʼarebayi dayirã kʼãbãẽã krĩcha zroma obʉba pera sentibʉde.

Davidʼbara kʼawuabasi, kʼãbãẽã krĩcha zroma obʉba pera senti ẽ baita Jeowabʉrʉ kʼarebaibarabasita. Jeowaba iyita kʼarebasi baera akʉza iya biga diakĩrãbasi baera Jeowaʼa, naʉ̃ta jarasi: «Daizeze zareadeba tʉdʉka wãseabʉ murora». Akʉza jarasi: «Daizeze wãrĩnuarabara mʉ̃a zarea diabʉ» (Sal. 18:29, 32). Dayirãba krĩchaseabʉ bedʼea zromabʉra awuantabeda ẽãta, mamina Jeowa kʼarebadeba awuantaseabʉ bedʼea zroma daya krĩchabadata awuantabe ẽãta. Mawũã dayirãta Jeowa yiwidʼipanʉbʉrʉ iya kʼarebamarẽã, jẽda kĩrãbepanʉbʉrʉ Jeowaba sãwũã kʼareba zebʉrʉta akʉza opanʉbʉrʉ Jeowaba zokʼabʉta, naʉ̃ba kʼarebayi audre ĩjãita Jeowaba dayirã zarea diaita akʉza buru bia diaita, kʼãbãẽã krĩcha zroma obʉba pera sentibʉde awuantaita.