ZUƲ̈DHIƲ̈TƐ ˗nu ˗wo ꞊dhɛ ꞊kwɛɛ˗ ˈgbinŋ˗ ˈdhö kwa ˗ta. (Prov. 12:25) Zuʋ̈dhiʋ̈tɛ ꞊gbɔɔnsü ˗ya kë ka ˗bha do ˗ee? ˗Yö ˗kë ka ˈgü ꞊dhɛ ˈkaa ꞊mɔɔn˗ ˗bha ˈka˗ bun ˗ee? ˈKa kë ˈwɔn suu ˈö ˈˈdhʋ̈ ˗a ˈgü, ˗kaa ˈwɔn dɔ ꞊dhɛ ˈkaa do ˗a ˈgü. Mɛn ꞊vadhɛ ˈwo kwa kpö ˈgü, zuʋ̈dhiʋ̈tɛ ˗yö ˗an ˗bha, ˈö ˈpë ˈwo dho ˗a kë ˈwaa˗ dɔ. Mɛn ˈbha ˗nu ˗wo wo ˗zokë wo ˗bha ˈkɔdhigümɛn ˈö ˈyaa ö ˈflëëgü ˗a ˈˈpiʋ̈. Mɛn ˈbha ˗nu ˗bha mɛn ˗wɔngbɩɩsü ˗ya ga. Mɛn ˈbha ˗nu ˗de ˈpö ˈˈsɛ ˗ya zii ɛɛnˈˈ ˈˈtee ˈˈgbɩɩ˗ ˗ya ʒiö ˗an ˗gɔ ˈˈsɛ ˈgü. ˈMën ˗dho kwa ˗takun kö ˈkwa bɔ kwa ˗bha zuʋ̈dhiʋ̈tɛ ˗nu ˈgü? a

˗Gblüdë Davi ˗bha ˈwɔnzuan ꞊mɔɔn˗ ˗bha ˈö kwa ˗takun ˈö ˈkwa kwa ˗bha zuʋ̈dhiʋ̈tɛ ˗nu kun kwa ˗bha. ˗Yö ˗bɔ ˈwɔn ˈˈgbɩɩ˗ ꞊va ˈgü ö ˗bha ˗tosɛta ˈgü, ˈö ˈˈtʋ̈ŋ ˈbha ˗nu ˈka ˈö dɔ ga ˗yɛ ˈˈdhiʋ̈. (1 Sam. 17:34, 35; 18:10, 11) ˈMën Davi ˗takun ˈö to ˗a ˈˈgbɩɩ˗ ˈka ö ˗bha zuʋ̈dhiʋ̈tɛ ˗nu ˗ta? Kwa ˗dho ˈto ˗a ˗bha ˈwɔnzuan ˈˈpiʋ̈ ˗kɔ ˗kë ꞊dhɛ?

ˈWɔn ꞊va ˗nu Davi ˗ta ˈˈtʋ̈ŋ dosɛnŋ ˈgü. ˈDhɛ kun ꞊duëë ˗ni ˈgü Saidhö ˗gɔ kö ˈya ˗dho ö zë bhë, ˈwɔn ˈbha ˈö ˗kë ˗a ˈka ˗kwaa ˗ga. Yi do ˈka kö Davi waa ö ˗bha ˈˈsɔdha ˗nu ˗wa ˈgo ˗gblü ˈˈpiʋ̈, ˗wa ˗yö ꞊dhɛ ˗an ˈyɔɔ˗ ˗nu ˗wa bɔ ˗an ꞊zlöö ꞊waa˗ ˗an ˗bha pë ꞊gban ˈˈpɛpɛ ꞊kwaan, ꞊waa˗ ˗an ˗bha ˈkɔ ˗nu ˈˈgʋ̈, ˗wa ˈdho ˗an ˗bha ˈkɔdhigümɛn ˗nu ˈka. ˗Yö ˗mën ˗an ˈka ꞊dedewo. ˈDhɛ ˗kë ˈˈdhʋ̈ ˈmën Davi ˗ya ˗kë? «Davi waa ö ˗bha mɛn ˗nu ˗wo ˈˈgbʋ ˗bɔ, ˈö yö mü kö ꞊faan gbɛ˗ ˈyaa ˗an ˈgü ˈzüdho.» ˗Ya ˈgo mü ˈzü, Davi ˗de ˗bha ˈˈsɔdha ˗nu ˗kun ˗a ˈˈpiʋ̈ kö ˈwo˗ «˗zuö ˗gwö ˈka ˈwo˗ zë.» (1 Sam. 30:1-6) ˈWɔn ˈˈgbɩɩgbɩɩ˗ ˗yaaga ˈnën ˈwo kun Davi ˗bha ˈˈtʋ̈ŋ do ˈö bhë ˗a ˈka: ˗A ˗bha ˈkɔdhigümɛn ˗nu ˗wo dɔ ˗sü ˈka ga ˗yɛ ˈˈdhiʋ̈, ˗a ˗de ˗bha ˈˈsɔdha ˗nu ˗wa ˈˈpiʋ̈ ˈwo˗ zë, ˗gblüdë Saidhö ˗ya ˈˈpiʋ̈ kö ˈö˗ zë ˈpö. ˗Kwa kwa ˗zota zuʋ̈dhiʋ̈tɛ ˈö kun Davi ˗bha ˗a ˈgü.

˗Mën ˈö Davi ˗ya ˗kë ꞊taabha? ˗Yö ˗to mü ˈö «꞊faan ꞊slɔɔ Zoova ö ˗bha ˗Zlan ˈsaa˗ ˈgü.» ˗Mën ˈö˗ ˗kë? ˗Yö ˗bhɛɛ Zoova ˗dhɛ kö ˗yö ö ˗takun, ˈö ˗kɔ ˈö Zoova ˗ya ˗takun ˗a ˈka ˈˈdhiʋ̈ ˗be, ˈö ö ˗zota ˗a ˈgü. (1 Sam. 17:37; Ps. 18:2, 6) Davi ˗ya ˗yö ꞊dhɛ ö dua ˗mü kö ˈö Zoova dhɛɛˈˈ ˈkpɔ kö pë ˈö dho ˗a kë ˗ya ˗zɔn ö ˗dhɛ. ˈDhɛ Zoova ˗ya ˗daakë, Davi ˗yö ˗to mü ˈö˗ ˗ya ꞊bhlëë ˈgü. ˗A ˗wɔn ˈgü, Zoova ˗yö ˈdhuëë˗ ˗kpɔ waa ö ˗bha ˈˈsɔdha ˗nu ˗an ˗bha ˈö ˈwo wo ˗bha ˈkɔdhigümɛn ˗nu waa wo ˗bha ꞊kwɛɛ˗ ˗nu bho ˈˈgan ˈgü. (1 Sam. 30:7-9, 18, 19) Pë ˗yaaga ˈö Davi ˗ya ˗kë, ka ˗zo ˗ya ˈˈpiʋ̈ ˗ee? ˗Yö ˗bhɛɛ Zoova ˗dhɛ kö ˗yö ö ˗takun. ˗Yö ö ˗zota pë ˗nu ˈö Zoova ꞊yaa˗ kë ˗a ˗dhɛ ˈˈdhiʋ̈ ˗be ˗an ˈgü, ˈyö ˈwɔn ˗nu ˗kë ꞊dhɛ ˗kɔ ˈö Zoova ˗ya pö˗ ˈka ˗a ˈdhö. Kwa ˗dho ˈto Davi ˗bha ˈwɔnzuan ˈˈpiʋ̈ ˗kɔ ˗kë ꞊dhɛ? ˗Kwaa ˗yaaga ˗ga.

1. ˗Kwa bhɛɛˈˈ. ˈˈTʋ̈ŋ ˈˈoo ˗tʋ̈ŋ ˈgü, zuʋ̈dhiʋ̈tɛ ˗nu ˗wa kë kwa ˗bha, ˗kwa bhɛɛˈˈ Zoova ˗dhɛ kö ˗yö kwa ˗takun, ˗yö ꞊kpɔɔdhɛ nu kwa ˗dhɛ. Pë ˈˈpɛpɛ ˈö kwa zuʋ̈ˈˈ ˈˈpiʋ̈ ˈkwa˗ blɛɛˈˈ ˗a ˗dhɛ, ˗yö ˗dho kwa zuʋ̈ˈˈ ˈwaannu. Ɛɛnˈˈ ˈzü ˗a ˈˈsɩ ˈyii kë kwa ˗dhɛ, kwa ꞊mɔɔn˗ ˗bha ˈkwa ꞊bhɛɛ ꞊klöö˗ ˈka, kwa zuʋ̈ˈˈ ˈˈpiʋ̈. ˈKwa ˗takundhe ˗dhɛ Zoova ˗gɔ ˈˈtʋ̈ŋ ꞊gban ˈka, kö kwa˗ ˗zɔn ꞊dhɛ ˗zoyödhe suu do ˈö kun Davi ˗gɔ bhë, ˗yö kwa ˗gɔ ˈpö. ˗Ya ˗pö: «Zoova ˈnën ˗tɔ n ˗man ˗gwö gbɔŋ, n ˗bindhɛ waa mɛn ˈö n dha. N ˗man ˗Zlan ˈnën  ˗tɔ n ˗man ˗gwö ˈa n ˗bin ˗a ꞊zlöö.» (Ps. 18:2) Bhɛɛsü ˗yö kwa ˗takun ꞊dedewo ˗ee? Kwa ꞊dhegblüdhe do ˈö ˗yödhiʋ̈ ˈka ˈwo˗ ˗dhɛ Kalia ˗ya ˗pö: «ˈMan n bo bhɛɛsü ˈka, n zuʋ̈ˈˈ ˗yö ˈwaannu. Bhɛɛsü ˗yö n ˗zotakɔ ˗bɛ Zoova ˗bha ˗bha, ˈö n ˗man ˗zoyödhe ˗gɛn ˗gban.» Kwa ˗takunpë ˗së do ˈö Zoova ˗ya nu kö ˈkwa ˈto ˗a ˈˈgbɩɩ˗ ˈka kwa ˗bha zuʋ̈dhiʋ̈tɛ ˗nu ˗ta, ˈyö ˗tɔ bhɛɛsü.

2. ˗Kwa kwa ˗zota. ˈBha ü ˗zota ü ˗bha ˗tosɛta ˈgü, ˈwɔn ˈbha ˗yö ˗dhö ˈö ˈyii kë Zoova ˈka ˗be ü ˈti ˗dho ˗mɔn ˗bɔ ˗a ˈgü ˗sü ˗bha ˗ee? ˈKwa kwa ˗zota ˗kɔ ˈö Zoova ˗yö kwa ˗takun ˗a ˈka ɛɛnˈˈ ˈö ö ˗dhɔkëmɛn ˗nu ˗takun ˗a ˈka ꞊kwɛŋzü ˗a ˈgü, ꞊faan ˗kë kwa ˗gɔ ˈö kwa ˗bha ˗zoyödhe ˗gɛn ˗yö ˗gban. (Ps. 18:17-19) Kwa ꞊dhegblü do ˈö mɛn zii ˈka ˈwo˗ ˗dhɛ Ʒozue ˗ya ˗pö: «N ˗man bhɛɛwo ˗nu ˈö Zoova ꞊yaa˗ ˗an ˗daakë, a ˗an ˗bɛnzë ˈsëëdhɛ ˗ta. ˗Ya kë ˈˈdhʋ̈ n ˗zo ˈyaa bhɔ pë ˈa˗ ˗gbadhɛ Zoova ˗gɔ ˈö˗ nu n ˗dhɛ ˗a ˈka.» ꞊Ii, ˗kɔ ˈö Zoova ˗yö kwa ˗takun ˗a ˈka ˗be ˈkwa kwa ˗zota ˗a ˈgü, ꞊faan ˗yö ˗kë kwa ˗gɔ ˈö ˈkwa ˈkozë kwa ˗bha zuʋ̈dhiʋ̈tɛ ˗nu ˈka.

3. ˗Kwa ˈwɔn ˗nu kë. ˈKwa kë ˈwɔn ˈbha ˗nu ˈgü, ˈˈsanni ˈkwa pë ˈbha kë, ˗kwa ˗dhɛ ˗ga ˗Zlan ˗Wo ˈgü kö ˗yö ʒiaan ˗së ˗zɔn kwa ˗dhɛ. (Ps. 19:7, 11) Mɛn ꞊vadhɛ ˗wa ˗yö ꞊dhɛ ˈwa ˈˈtʋ̈ŋ ˈsü ˈwa Biblö ˈˈɲan ˈbha ˈˈpiʋ̈ ˈpɔn ˗së ˈka, wo˗ ˈgüman ꞊dhɛ ˗yö ˗gban wo ˗bha. Mɛn zii do ˈwo˗ ˗dhɛ Ʒarɔdö ˗ya ˗pö: «ˈWɔn ˗nu ˈˈpiʋ̈ ˈpɔn ˗sü ˗yö n ˗takun ˈö ˈman Biblö ˈˈɲan ˈbha ˗wo pö, ˈa ˈwɔn ˈˈpɛpɛ ˈö ˗gban ˗a ˗bha ˗a dɔ. ꞊Ya kë ˈˈdhʋ̈ pë ˈö Zoova ˈdhö˗ ˈˈpiʋ̈ ˈö˗ pö n ˗dhɛ, a˗ ˈgüman. ˗Yö n ˗takun ˈö pë ˈa˗ ˗wo pö ˗ni ˈgü bhë ˈa ˈdhaŋ˗ bho ˗a ˈˈdhiʋ̈, ˈa˗ ˗ya ꞊bhlëë ˈgü.» Ʒiaan ˗nu ˈö Zoova ˗yö ˗an ˗zɔn kwa ˗dhɛ ˈkwa ˗an mɛɛnˈˈ Biblö ˈgü, ˈkwa ˈto ˗an ˈˈpiʋ̈, kwa ˗kɔ ˗yö ˗ʒiö kwa ˗bha zuʋ̈dhiʋ̈tɛ ˗nu ˗gɔ.

˗Yö ˗kun Davi ˈˈɲaan ꞊dhɛ ˈya˗ pö ˈö ˈto ˗a ˈˈgbɩɩ˗ ˈka ö ˗bha zuʋ̈dhiʋ̈tɛ ˗nu ˗ta, ö ˗bhawɔn ˗yö Zoova ˗bha ˗takundhe ˗bha. ˈDhɛ Zoova ˗ya ˗takun, ˗yö ˗kë ˗a ˗dhɛ ˗së ꞊dedewo. ˗A ˗wɔn ˈgü, ˗ya ˗pö: «˗Zlan ˗bha ˈˈpiigbɩɩdhɛ ˈsaa˗ ˈgü, a ꞊mɔɔn˗ ˗bha ˈa ˗lö ˈˈkplʋʋ ˗zü. Mɛn ˈö ꞊faan nu n ˗dhɛ ˈyö ˗tɔ ˗Zlan ꞊dede.» (Ps. 18:29, 32) Kwa ˗bha ˈwɔn ˈˈgbɩɩ˗ ˗nu ꞊mɔɔn˗ ˗bha ˈwo ˗kë ꞊dhɛ ˈˈkplʋʋ ˈdhö, ˈö ˗lö ˗an ˗zü ˗dhɛ ˈyaa kë ˗dhö. ˈˈKɛɛ Zoova ˗ya kwa ˗takun, kwa ꞊mɔɔn˗ ˗bha ˈkwa ˗an bun. ꞊Ii, ˈkwa bhɛɛˈˈ Zoova ˗dhɛ, ˈkwa kwa ˗zota pë ˈö ꞊yaa˗ ˗kë kwa ˗dhɛ ˗be ˗a ˈgü, ˈkwa˗ ˗gban ˗a ˗bha ˗dhioo ˗nu ˗ta ˈkwa ˈwɔn ˗nu kë, ˗yö ꞊mɔɔn˗ ˗bha ˈö ga kwa ˈgü ꞊dhɛ kwa ˗dho ꞊faan waa ꞊kpɔɔdhɛ ꞊slɔɔ kö kwa ˗kɔ ˗yö ʒiö kwa ˗bha zuʋ̈dhiʋ̈tɛ ˗nu ˗gɔ.