AME la easa hleuhleu ke, kösë ketre ehnef ka tru pine laka, easa hnehengazo me akötr. (Ite edomë 12:25) Hapeu hna hane traqa lai koi epun? Hnei epuni kö hna hleuhleu matre thatreine hë epuni xomihnine la akötre cili? Tha tro kö epuni a mekune laka, epuni caasi hi la ka cile kowe la jole cili. Alanyimu la ka xatuane la ketre sinee i angatr. Maine jë, hna meci la ketre sinee i angeic, maine hna ketri angeice pena hnei hulö. Maine jë kola kucakuca hnene la sinee i angeic ke, pëhë trengecatre i angeic, maine kola hnehengazo, maine pena pëkö ka hnimi angeic. Ngo nemene la ka troa xatua së matre tha tro kö sa hleuhleu a?

Hanawang la tulu i Dravita. Hnei angeice hna cile kowe la itre jole ka tru, nge xönë hi tro angeic a mec. (1 Sam. 17:34, 35; 18:10, 11) Ngo nemene la ka xatua angeic matre tha tro kö a hnehengazo? Nge tune kaa la aqane tro sa nyitipu angeic?

Hna traqa itrai la itre jol koi Dravita. Tro sa ce wang la ketre jol hnei angeic hna cile kow. Hnei Dravita hna kötre mel ke, kola thele troa humuthi angeic hnei Saulo joxu. Ame la ketre ijin, hnei Dravita memine la itre sooce i angeic hna öhne laka, hnene la itre ithupëjia hna atrekënö la itre mo i angatr me dreuthetrije la itre uma, me akalabusine la itre sinee i angatr. Nemene la hna kuca hnei Dravita? “Ame hnei Davita me ite ate thei angeice hna teije draië trootro a tha ’teine hmaca kö angate troa teij.” Eje hi, hnene trahmanyi hna mejiune kow hnei Dravita, hna thele ‘troa tranyi angeic.’ (1 Sam. 30:1-6) Tru la akötr me hleuhleu i Dravita ke, angeic a xou troa humuthi angeic me itre atrene la fami angeic. Angeice fe a hnehengazo ke, Saulo palahi a weji angeic!

Kolo fe a qaja ka hape: “Ngo Davita a thue cate angeice kö göi Iehova Akötesi angeic.” Tune kaa? Hnei Dravita palahi hna thith, me sipo ixatua koi Iehova, me lapa mekune fe la aqane amele angeic ekö hnei Iehova. (1 Sam. 17:37; Sal. 18:2, 6) Atre hnyawa hi Dravita laka, ka sisitria catre la itre eamo qaathei Iehova. Celë hi matre, hnei angeice hna hnying koi Iehova. Thupene lai, hnei Dravita hna kuca la hnei Iehova hna qaja koi angeic. E cili, hnei Iehova hna amanathithi angeic memine la itre atre i angeic, me aijijë angatr troa amelene la itre sinee i angatr, me xome hmaca la itre ewekë i angatr. (1 Sam. 30:7-9, 18, 19) Nemene la köni ewekë hna kuca hnei Dravita? Hnei angeice hna catre thith matre sipo ixatua koi Iehova. Hnei angeice fe hna lapa mekun la itre aqane xatua angeic ekö hnei Iehova. Nge hnei angeice hna canga trongëne la itre eamo qaathei Iehova. Tro pena sa ce wang la aqane tro sa nyitipu Dravita.

1. Troa thith. Maine epuni a hleuhleu me akötr, loi e tro epuni a thith me sipo ixatua koi Iehova me inamacan. Nyipiewekë tro epuni a fe asë la itre aliene hni epun. Maine tha ijiji epuni kö, tha tro kö a aqeane la thith maine thithi thaupe pena. Maine tro palahi epuni a sipo ixatua koi Iehova, epuni hi lai a amamane laka, tru la mejiune i epun koi Nyidrë tui Dravita, ngöne lo angeic a hape: “Iehova: la giting, me hunapong, me ate amele ni;  Akötesingö, nge etë huting, lo hnenge hna lapaune kow; peteng, me jone amele ni, me ga draiëng.” (Sal. 18:2) Ngo hapeu, ka hetre thangane kö e tro sa thith? Öni Kahlia, ketre pionie: “Thupene la eni a thith, tingeting me lolo la hning. Nyipiewekë troa thith ke, kola xatua ni troa nyitipune la aqane waiewekë i Iehova, me acatrene la mejiuneng koi Nyidrë.” Ka hetre menene la thith, nge ketre ahnahna lai qaathei Iehova. Ej a xatua së troa xomihni ngöne la easa hleuhleu me akötr.

2. Troa lapa mekun. Hapeu, hetre jole kö hnei epuni hna cile kow jëne la ixatua i Iehova? Maine tro epuni a lapa mekune la aqane xatua epun hnei Iehova me itre xaa hlue i Nyidrëti ekö, tro hë lai a acatrene la mejiune i epun me aegöcatrenyi epun. (Sal. 18:17-19) Öni Joshua, ketre qatre thup: “Hnenge hna sija la itre thithing hna sa hnei Iehova. Celë hi lai ka amekunë ni la itre ijin eni a sipone la ketre ewekë koi Iehova memine la aqane xatua ni hnei Nyidrë.” Eje hi, maine tro epuni a lapa mekun la aqane xatua epuni ekö hnei Iehova, tro hë epuni a hetre trengecatre matre tha tro kö a hnehengazo.

3. Troa trongëne la eamo. Qëmekene troa axecië mekun, loi e tro epuni a ithel e hnine la Tusi Hmitrötr. Tro hë epuni a öhne la itre eamo ka troa xatua epun. (Sal. 19:7, 11) Alanyimu la ka qaja ka hape, ame la angatr a ithel göne la ketre xötr, canga trotrohnine hi angatr la nyine tro angatr a kuca. Öni Jarrod, ketre qatre thup: “Ame la eni a ithel göne la ketre xötr ke, kola xatua ni troa trotrohnine hnyawa la aliene ej, memine la nyine tro ni kuca. E cili, eni a thele troa canga trongëne la eamo hna hamëne koi ni hnei Iehova.” Eje hi, maine tro sa thele la itre eamo qaathei Iehova e hnine la Tusi Hmitrötr, tro hë sa atreine xomihni ngöne la easa hleuhleu me akötr.

Atre hnyawa hi Dravita laka, Iehova hmekuje hi la ka atreine troa xatua angeice troa xomihni ngöne la angeic a hleuhleu me akötr. Tru la hni ne ole i angeic koi Iehova, matre öni angeic: “Hnenge hna sheshë shashaithe la hna xupi hage hnei Akötesingö. […] Akötesieti la ate oteë ni hnene la men.” (Sal. 18:29, 32) Eje hi, ame itre xaa ijin, kösë ceitu me itre hage la itre jole ka traqa koi së. Ngo jëne la ixatua i Iehova, ijije hi tro sa cile kowe la nöjei pengöne jol! Maine tro sa catre thithi koi Iehova, me lapa mekun la itre aqane xatua së hnei Nyidrë, me trongëne la itre eamo i Nyidrë, tro hë Nyidrëti a hamë trengecatr me inamacan, matre xatua së troa xomihni ngöne la easa hleuhleu me akötr.